Hăbări ditu bana românească şi internaţională
COD FISCAL. București s’duc ninti consultările anamisa di autorităț, sindicate și patronate, după ţi reprezentanțălli a mediului di emburlăki, sindicatelor și autorităților locale și spusiră niifharistusearea andicra di alăxerli pi cari guvernul ari naeti s’li facă la Codlu fiscal. Tru cadrul a muabeţloru purtate luni cu premierlu Nicolae Ciucă și ministrul di finanțe Adrian Câciu, aești căftară, ntră altili, amânarea ti anlu ţi yini a misurlor pi care guvernul ari naeti s’li bagă tru lucru di la di 1 agustu. Anamisa di aestea s’arădăpsescu acciza la alcool, taxe, plafonlu ma ñicu ti facilitățile fiscale tru sectorul a construcțiilor și ideea ca lucrătorlli cu fracțiune di normă s’păltească contribuții sociale uidisitu cu tiñia di cafi mesu minimă națională.
Newsroom, 12.07.2022, 18:13
INFLAȚIA. Rata anuală a inflațillei agiumsi la 15,1% tru cirisaru, andicra di 14,5% tru mai, dimăndă adză Institutlu Național di Statistică. Uidisitu cu instituția, păhadzlli la produsele nealimentare criscură cu aproapea 18%, păhadzlli la alimente criscură cu aproapea 15% și păhălu a serviciilor criscu și el cu aproapea 8%. Banca Națională a Româniillei ș-ajustă prognoza di inflație la 12,5% ti bitisita aluştui anu și la 6,7% ti bitisita a anului 2023.
COVID. Ahurhinda di adză, actualizările COVID-19 va s’hibă lansate cafi dzuă tru România, andicra di cu si făţea siptămânal, după ună creaștiri cabaia mari a numirlui di cazuri, dublânda numirlu di noi infecții la cathi 7 dzăli. Autoritățli dimăndară marță că pisti 4.000 di persoani fură testate pozitiv tru 24 di săhăţ, ditu aţeali cama di 21.000 di teste fapti. Fură raportate și nauă decesi ligate di COVID, tuti la paciență cari avea afecțiuni tu kirolu di ma ninti. Numirlu a paciențălor cu COVID internaț easti di 1.361, cu 90 di paciență tru terapie intensivă. Uidisitu cu experțăll, naua sumvarianta Omicron cari aduţi dalaga di tora cu infecție tru tută lumea, și cari fu aflată și tru România, zniipseaşti protecția oferită emu di vaccin, emu și di imunizarea naturală, ama tru general pare ca aduţi turlii cama apridunati a lăngoarillei. Ministrul a Sănătatillei Alexandru Rafila dimăndă că misurli di prevenire armân tru vigoare, maxusu ti anvălearea a prosuplui și distanțarea fizică. Vaccinurile contra a COVID-19 suntu nica fapti urminie di autorități, maxus ti categoriili vulnerabili.
PARTENERIAT România nu are niţi un soţ ma bun” andicra di SUA, declară secretarlu di stat ali SUA Antony Blinken, cu furñia că s-umplură 25 di ani di la lansarea a Parteneriatului Strategic anamisa di Washington și București. Tu arada a lor, foștilli ambasadori ali SUA la București declară tru ună carti că parteneriatlu strategic cu România fu ună ditu nai cama buni investiții ditu Europa tră SUA. Elli nica spunu că România agioacă un rol decisiv tru apărarea și anvărtuşearea a flancului estic al NATO și tru anvărtuşearea a stabilitatillei și securitatillei la Amarea Lae.
Autoru: Udălu a hăbărloru
Armânipsearia: Taşcu Lala
