Hăbări ditu bana românească şi internaţională
Japonia. Fostul premier japonez Shinzo Abe muri di itia a arăñilor ţi li avu dupu ţi fu tufikisitu pi geadei di un fost membru a forților di apărari japoneze, dimăndă postul public japonez NHK. Abe, tru ilikia di 67 di ani, țănea un zboru di campanie aproapea di ună gară ditu căsăbălu Nara, ditu vestul japonez, cându fu ținta a unăllei atacă armată. Prişcăvillea armată easti multu aretcu tru Japonia, iu armele di foc suntu interdzăsi. Shinzo Abe fu nai ma longeviv prim-ministru japonez ditu istorie. Cumăndusi executivul japonez ditu 2006 până tru 2007 și deapoa ditu 2012-2020. Demisionă aoa şi doi añi di furñia a sănătatillei.
Newsroom, 08.07.2022, 17:37
G20. Miniștrilli di externe a aţilorur nai ma mări economii a lumillei avură ună andamasi cu uşili ncllisi a G20, aumbrită di conflictul ditu Ucraina. Andamasea, dizvărtită pi hamunisia indoneziană Bali, aavea adunată Moscova și nai ma serţălli critit a llei, tră prima oară di anda ahuhri polimlu ditu Ucraina. La andamasea a miniștrilor di externe a văsiliiloru membre G20, la cari lo parti și ministrul rus di externe Serghei Lavrov, Analtul Reprezentant ali Uniuni Europene tră Afaceri Externe și Politica di Securitate, Josep Borrell, căftă a tutulor participanțălor s’llia meatri ti bitisearea a polimlui, restabilinda suveranitatea ali Ucraină și asiguripsinda că repercusiunile globale suntu limitate. Retno Marsudi, ministrul di externe ali Indonezie, căftă dănăsearea a polimlui ditu Ucraina prezentu hiinda şi omologlu a lui rus Serghei Lavrov. Easti responsabilitatea a noastră s’dănăsimu polimlu cât ma ayoñea și s’nă ndridzemu divergențele la masa di negocieri, nu pi câmpul di alumtă”, spusi Retno Marsudi. Tru apandisi, Serghei Lavrov lu stipsi Occidintul tră ixikea a unui armistițiu cu Ucraina.
Gaz. Un interconector anamisa di gazoductele ditu Grecia și Bulgaria, cari agiundzi s’hibă di adză operațional, da izini ali României la alte resurse di gaze naturale, tru un contextu internațional tru care agiundzi s’hibă tut ma di căuli ca Moscova s’dănăsească livrărli cătră Uniunea Europeană. România va s’poată s’agiută alti state ditu regiune să-și ñicureadză dipendința di gazul rusesc, diclară premierul Nicolae Ciucă la Atena, iu feaţi ună vizită di lucru și s-adună cu omologlu a lui grec, Kyriakos Mitso.
Număseari. Prezidintulu Klaus Iohannis simnă dicretul di număeari al Petre Daea tru funcția di ministru ali Agricultură și Dizvoltari Rurală. Cumăndusearea a Partidului Social Dimocrat votă, ñiercuri, tru unanimitate, yinearea diznău al Petre Daea la Ministerul Agriculturăllii. Fostul ministru ali Agricultură, diputatlu Adrian Chesnoiu, s-trapsi ditu functie si suspendă ditu Partidul Social Dimocrat, di itia că Directia Nationala Anticoruptie ankisi pusputearea penala tru un dosar tru cari easte stipsitu di abuz tru serviciu. El spuni că nu feaţi niţi ună faptă di turlie penală ică di corupție și lă căftă a soţloru a lui ditu Camera a Diputațlor s’voteadză curmarea a imunitatillei alui, aţea ţi s’feaţi tru bitisita a meslui ţi tricu.
Anotu. După trei dzăle di competiție la Campionatele Europene di giuniori di anotu di la Otopeni, ningă București, România alină pi primlu loc tru clasamentul pe văsilie cu ţinţi medalii, ditu cari trei di malămă și dauă di asimi. Adză dupu-prăndzu, David Popovici (17 ani), năulu dublu campion mondial la seniori la 100 și 200 m liber, va s’anoată tru finala probăllei di 50 m liber par, iara Aissia Claudia Prisecariu tru finala probăllei di 200 m păltări. Aduţemu aminti că gioi fu ună dzua multu bună tră România. Vlad Stancu aadră ună nauă performanță amintănda proba di 1500 m liber. Tră Stancu easte a doua medalie di malămă după atea amintată cu ștafeta 4×100 m, triumfu la cari avu contribut și David Popovici, Stefan Cozma și Patrick Dituu. Tut aieri, Bianca Costea amintă ună medalie di asimi la 50 m liber. Miercuri, David Popovici amintă a daua a lui medalie di malămă la aestă competiție, amintănda finala probăllei di 200 m liber. Tru idyea dzuuă, ștafeta mixtă a Româniillei, ntră cari David Popovici, Patrick Sebastian Dituu, Bianca Costea și Rebecca Aimee Diaconescu, a câștigat medalia di asimi la proba 4×100 m liber. La campionat llia parti aproximativ 500 di sportivi ditu 42 di văsilii. România easti reprezentată di 26 di anutători – 14 ficiori și 12 feati.
Autoru: Udălu a hăbărloru
Armânipsearia: Taşcu Lala
