Hăbări ditu bana românească şi internaţională
CHIROLU – Căñină va s’facă malargu tru România, tru yinitoarili 24 di săhăţ, tru tuti reghiunile, a diapoa tempearaturli va s’agiungă maximi recordu ti aestă perioadă tru vestul și nord-vestul a teritoriului. Vestul și nord-vestul și local centrul, sudul și estul a Româniillei suntu di ndauă dzăli cu căñină, iara inditili di temperatură-umiditate va năstreacă praglu critic di 80 di unități tru locrli di tu cmpu şi pi măyuli. Tempearaturli maxime va s’hibă anamisa di 26 și 38 di gradi Celsius, cu nai ma mări valori tru ascăpitată. Sâmbătă, furtunile feaţiră mări zñii tru notlu av4siliillei, di arupsiră citiili a casilor și surpară poñi.
Newsroom, 03.07.2022, 20:12
Judo – România amintă doilu locu tru clasamentul tră medalii la Openul European di Judo disvărtitu sâmbătă și dumănică, Cluj-Napoca (nord-vest). Tutu cu tutu, România amintă 11 di medalii – 2 di malămă, 4 di asimi, 5 di brundzu, ditu arada a curi șapte fură amintati dumănică. Azerbaidjanlu amintă protlu locu, iara Turchia treilu locu. Tră competiție s-ar4dăsiră 202 di judoka ditu 32 di văsilii, 142 tră competiția masculină și 60 tră competiția feminină. România fu reprezentată di 31 di sportivi, 23 bărbaț și 8 mulleri.
Ucraina – Căsăbălu Sloviansk, ditu estul ali Ucraină, fu aguditu dumănică cu vărtoasi bombardamente, cari vătămară şi pligiră multi persoane, diclară primarul a căsăbălui. Ună purtătoare di zboru ali administrație reghională năpoi feaţi apelu ti bănători s’fugă ditu reghiuni, avânda tu vidială că linia a frontului easti maş la ndauă kilomeatri di Sloviansk. Cama tru notu, căsăbălu Kramatorsk fu aguditu tră a daua dzuă arada di rachete. Dumănică, Rusia diclară că anăkisi căsăbălu Lisiciansk, ditu estul ucrainean, și tută reghiunea Lugansk. Ocuparea a căsăbălui Lisiciansk poati s-da izini ali askeri arusească s’niinteadză cătă Sloviansk și Kramatorsk, dauli tru reggiunea industrială Donbas, pe cari Moscova cilăstăseaşti s-u anăkisească.
Paris – Peter Brook, ună masti leghendară ditu industria a teatrului și unu di nai ma influență regizori a secolului XX, muri sâmbătă, la ilikia di 97 di ani, dimăndă dumănică AFP. Amintatu tru Marea Britanie, ama cu ună mare parte ditu carieara a lui artistică dizvărtită tru Franța, Peter Brook u xanaamintă arta regiilei, favorizânda elementele a llei di thimelliu – un actor dinintea a publiclui a lui tru loclu a dicorurilor tradiționale. Nai ma cunuscut spectacol a lui easti Mahabharata” — ună epopee di nauă săhăţ inspirată ditu mitologia hindusă — cari avu premiera tru 1985 și fu adaptată ma amănatu tru un filmu pi marli ecran lansat tru 1989. Peter Brook fu tiñisitu cu multi premii și nişeñi, cu ma multe Tony și Premii Emmy, un Laurence Olivier Award, un Praemium Imperiale și un Prix Italia.
Autoru: Udălu a hăbărloru
Armânipsearea: Taşcu Lala
