Hăbări ditu bana românească şi internaţională
Covid-19Ro. România nregistră, gioi, pisti 32 di ñilli di cazuri noi di Covid ditu pisti 100.000 di testi și 111 dicese asociate. Aproapea 1.000 di paciență cu Covid suntu la tearapie intensivă. Rata di incidință București a trecut di 24 di cazuri la o mie di locuitori – cea mai mare di la ahurhita-a pandemiillei. Năpoi aduţemu aminti că, marță, România năstricu praglu di 40.000 di noi infecții tru 24 di săhăţ, ditu 122 di ñilli di analize fapti. Easti recordul absolut di tu ahurhita a pandemiillei și di pisti dauă ori kipita-a dalgăllei precedentă. Guvernul prilundzi catandisea di alertă cu nica 30 di dzăli di luni, 7 di şcurtu.
Newsroom, 03.02.2022, 20:31
Askeri. Statele Unite dimăndară că va s’pitreacă aproapea 3.000 di militari suplimentari tru România, Polonia și Germania tră s’protejeadza Europa di Est di ună potențială escaladare a crizăllei nkisită di arădăpsearea a trupelor aruse apropea ali Ucraină. Ună ñille ditu elli va s’yină tru România. Pentagonlu spusi că aesteaa va s’hibă misiuni temporare, cu scupolu ta s’anvărtuşeadză apărarea aliațlor europeni pi fondul a tensiunilor cu Rusia. Moscova negă planurli di invadare ali Ucraină, ama spusi că nu aproaki s’facă compromisuri și faţi timbihi că poati s’nkisească acțiuni militare nispeţificate cara căftărli nu suntu tiñisiti. Ahtări căftări includ tăxearea NATO că Ucraina nu va s’agiungă vărăoară membră a alianțăllei.
Afaceri xeane. Franța u spuni vrearea ti tindearea-a spațiului Schengen tru kirolu a actualăllei prezidenţille a Consiliului UE, declară ministrul francez di externe Jean-Yves Le Drian după ună andamasi a Formatului Nouă București. El spusi că Parisul poati s’dizvărtească ndauă sute di militari tru România, ca parti a politicăllei a llei di apărare și discurajare pi flancul estic al NATO. Ministrul român di externe Bogdan Aurescu ndreapsi ună rundă di discuții a statelor ditu Formatul Nouă București tră săv zburască ti situația securitatillei ditu cartierlu ali Ucraină și ali Amarea Lae. El spusi că actuala criză spuni ti securitatea generală a spațiului euro-atlantic, spunânda că statili aliate lipseaşti s’ducă ma largu s’coordoneadză anamisa di eali tră s’află misuri concrete tră detensionarea a catandisillei. La andamase lo parti și ministrul di externe ucrainean Dmytro Kuleba. Muabeţli analizară ateali ditu soni evoluții ditu viţinătatea di est și regiunea ali Amarea Lae, cu impact ti securitatea euro-atlantică generală. Tut gioi, prezidentul Klaus Iohannis lu avu oaspi ministrul francez di externe Jean-Yves Le Drian. El sumlinie importanța ti u da România ti parteneriatlu a llei strategic cu Franța, ună relație bazată pi ligături istoriţi di lungu kiro și pi afinităț culturali, coopearare dinamică tru multe domenii și interese și obiective comune.
Corupţie. Radu Mazăre, fostul primar a portului Constanţa di la Amarea Lae sentinţă dfinitivă di la Aalta Curte di Casaţie şi Justiţie la ţinţi ani di hăpsani tră loari aruşfeti şi trafic di influenţă tru aşi-dzăslu dosar Polaris. Inițial, tru martie 2019, Mazăre lo tru prima instanță ună pideapsă di 9 ani și 10 meşi di hăpsani, pideapsă ñicurată tru apel di Curtea Supremă la 5 ani, după ţi giudicătorllii lu achitară fostul primar tră nascanti ditu infracțiuni. Tru idyiulu dosar, omlu di afaceri Sorin Gabriel Strutinsky fu condamnat la 5 ani di hapsani tră accesorii la loare di arusfeti. Fu achitat și fostul deputat social-democrat Eduard Stelian Martin, nicukirlu Polaris. El avea loată ma ninti ună pideapsă di ţinţi ani și giumitate di hăpsani.
Autoru: Udălu a hăbărlor
Armânipsearia: Taşcu Lala
