Hăbări dit bana românească şi internaţională: Mesaj MS Margareta

Tașcu Lala, 09.05.2019, 10:52

Custodili a Cărunăl’ei Română, Margareta, căndăsi n’ercuri dicseară tră cilăstiseari cu scupolu ti pricunustearea şi tin’isearea a latinitatil’ei sud-dunărene, aclo iu comunităţli macedo-români lipseaşti tra s-hibă agiutati tra ş-tănă identitatea şi cultura. S-nu agărşim ama că multi di comunităţli macedo-române nica băneadză tru locurli a lor di orighini şi eali lipseaşti tra s-hibă agiutati s-băneadză ma largu pritu ţănearea ali identitati şi a culturăl’ei. După urnechea a niintaşlor a noştri, s-nă ascumbusimu cu energhiili cătră pricunuştearea şi tin’isearea a latinitatil’ei sud-dunărene tru dzălili a noastri şi tru secolili yinitoari. Dumnidză s-vluiseascâ Armânamea!”, să spuni tru mesajlu pitricutu di Custodili a Cărunăl’ei, la Seara a Pălatil’ei Elisabeta, ndreaptă tră armăn’i. Tru mesajlu, ghivăsitu la evenimentu di prinţipili Radu, MS Margareta aduţi aminti că s-umplură tru 2019 140 di an’i di la thimil’iusearea ali Societati di Cultură Macedo-Română, la 23 di yismăciuni 1879, sum dumnil’ea a Prinţipilui Suveran Carol I, ama şi ti furn’ia că, tru 9 di mai 1905, aoa şi 114 di an’i, sultanlu Abdul Hamid al II-lea simnă decretlu imperial prit cari român’il’i di la sudlu a Dunăl’ei amintară pricunuştearea a ndrepturlor etniţi tru arada a Imperiului Otoman.

Hăbari priloată dit Jurnalu Naţional

Societatea de Cultură Macedo-Română organizeadză, tru chirolu 7 – 10 mai, Stămâna a Culturăl’ei Macedo-Română, cari acaţă tru isapi un şingiru di manifestări culturali şi ştiinţifiţi tră contribuția a macedo-român’ilor la istoria națională. Dit programlu a dzuuăl’ei:

Viniri 10 di mai, oara 10:00 – Te Deum cu itia că s-umplură 114 di an’i di la promulgarea a Iradeauăl’lei Imperială. Aduţearea aminti a martirilor macedo-români – la Băserica Mavrogheni, Str. Monetăriei nr. 4

Tulcea și Sarighiol de Deal: Ediția a XVI-a a Festivalului Internațional Multietnic al Picurăritlui

GIOI, 9 MAI 2019 Tulcea și Sarighiol de Deal va s-ţănă Ediția a XVI-a a Festivalului Internațional Multietnic al Păstoritului, a curi inițiator easti prof.ing. Dumitru Caimacan Popescu, va s-dizvărtească tru chirolu 9 – 13 di mai. Anamisa di parteneri media: Radio România Internaţional şi Radio România Constanţa.

Programlu a dzuuăl’ei:

● oara 18:00 — la Centrul Cultural dit Sarighiol di Deal — dişcl’idearea ali expoziţie di artă pastorală; părăstisearea a lucrărlor di la concursulu naţional di creaţie literală, desen şi caduri, ediţia a IX — a Tradiții și arădz di picurăritu”

● oara 19:00 — premierea a lucrărlor tră concursulu naţional di cătră juriul apufusitu

● oara 20:00 — părăstisearea a Revistăl’ei nr. 17 a Şcoalăl’ei Sarighiol di Deal; părăstisearea a născăntor tradiţii şi arădz ligati di picurăritu, oaspiţ va s-hibă auşi picurari a hoarăl’ei Sarighiol di Deal şi a localităţlor viţini

● oara 21:00 — 41 di an’i di activitate umpluţ di Ansamblul Folcloric Aromân Dor dit Sarighiol di Deal, comuna Beidaud, județlu Tulcea (festivitati di premieri a membrilor ansamblului folkloric și expoziţie documentară di diplomi a ansamblului folcloric).

Armânipsearea: Taşcu Lala