Expoziţia di cadhuri ‘Istroromâñilli’, vernisată la Muzeulu a Hoarăllei Bucureşti

Tașcu Lala, 06.09.2021, 11:51

Expoziţia di cadhuri Istroromânii, realizată di Constantin Liviu Dimeter, Gheorghe Petrilă şi Ovidiu Gabor, fu vernisată, marţă, la Muzeulu Naţionalu a Hoarăllei Dimitrie Gusti tru prezenţa a ministrului ali Cultură, Bogdan Gheorghiu, şi a ambasadorlui ali Croaţie, Marija Kapitanovic.

Mi hărsescu că avem furñia ta s’yiurtusimu Dzuua a Limbăllei Române cu un proiect ahâtu muşeatu, practic ună xanaaflari a arădăţiñiloru a noastre tru locuri ti cari vahi nu mindueamu că nica avem arădăţiñi lingvistiţi. (…)

Nai cama muşeata turlie ta s’yiurtusimu limba română easti să u ţănemu yie, să u azburămu corect şi să-lli yiurtusimu diversitatea. La iţi ngrăpseari ălli easti atestatu un zburătoru şi aestu agiundzi unu ţi u ţăni tu bană tru kirolu ţi yini.

Aţeali patru dialecti ică tră graiuri, aşi cum spunu născănţă cercetători, a limbălleii română şedu mărtirie ti continuitatea a noastră la sud şi la nord di Dunări.

Simfunu a studiilor, dialectul istroromân ari nai ma puţăñi zburători, arăspândiţi tru hamunisia Istria ditu Croaţia. (…) Îlli hiritisescu tuţ atelli mintiţ tru realizarea-a proiectului şi am nădie că româñilli va s’yină tru muzeu tră ună cadealithea lecţie di istorie contemporană, declară ministrul a Culturălleii.

Paula Popoiu, directorlu a Muzeului Naţional al Hoarăllei Dimitrie Gusti, spusi că vizitatorllii va s’aibă posibilitatea s’veadă tru expoziţie masti cari nica bneadză aclo, tru Croaţia, cari au ună bană pi cari putemu cumu ţi s’hibă s’u ahulimu şi noi anda va mutrimu cadurli di pi mururi.

Ambasadorlu ali Croaţie, Marija Kapitanovic, spusi că populaţia istroromână ditu hamunisia Istria easti una ñică şi easti ti anami că elli aprăftăsiră ta ş’ţănă limba şi tradiţiili şi mărturisi că şi ea easti amintată tru Istria.

Istoriclu Constantin Liviu Dimeter spusi că aesti caduri fură adrati tru Istria tru perioada 24 agustu – 6 di yismăciuni 2019 prit un program cu finanţari nirambursabilă, asiguripsită di Ministerul tră Românlli di Pretutindeni, tru cadrul a proiectului Românii Apuseni: Istroromânii – Monografie fotografică. Alăgămu 2.629 di kilometri şi 26 di hori. Tru aesti hori aflămu comunitatea a istroromânilor, elli şi spun vlahi, şi nkisimu pi toarăăli a cercetărlor Silviu Dragomir cu harta al Sextil Puşcariu tru mână. (…) Noi vinimu ditu Istria cu 660 di imagini. Li deadimu a autoritatillei ministerială di atumţea, Departamentul tră Românilli di Pretutindeni di astăndz, şi ditu aesti 660 di imagini vrumu s’alidzemu tră un albumu.

Nu puteam s’băgămu tu un album 660 di imagini şi atumţea căftămu ună altă personalitate. Nă ufilisimu di Sextil Puşcariu tră cercetarea aclo, tora avem ananghi di Dimitrie Gusti. Şcoala monografică Dimitrie Gusti nsimneadză tru dumenea a cadhurloru portrete, nsimneadză casi, nsimneadză fisea şi nsimneadză instituţii. Aesti capitole s’vedu tru albumlu di 72 di frăndză, tru cataloglu ali expoziţie, spusi Constantin Liviu Demeter.

Expoziţia poati s’hibă mutrită tru Sala Gheorghe Focşa a Muzeului Dimitrie Gusti tru perioada 31 agustu – 3 di sumedru, di ñiercuri până dumănică, tru anamisa di săhăţli 10,00 – 18,00.

Hăbari priloată di la AGERPRES/

(A, AS – autor: Petronius Craiu, editor: Florin Marin) ID: 6867467; Auth: /ton/flm; Date: 2021-08-31

Ârmânipsearea:

RRI — Secţia armânească, Taşcu Lala