HÂBARLI: Caplu a diplomaţiillei români, eara dusu unâ voltâ tu SUA
Caplu diplomațiillei români, Bogdan Aurescu, avu, Washington, muabeț politiți cu secretarlu di stat a SUA, Mike Pompeo, unâ furńie s’aproaki naetea ali SUA ta s’li creascâ efectivili militari pi teritoriul ali Românie. Tu arada-lli, ufițialu american salută parteneriatlu ți easti tu lucru di ma multi dzăț di ańi anamisa di ațeali dauă stati, yilipsitu tora ayońea pritu Acordul Interguvernamentalu vulusitu tu 9 di sumedru tră retehnologhizarea şi ta s’adrâ reactoari la țentrala nucleară di Cernavodă.
Daniela Budu, 22.10.2020, 06:24
Caplu diplomațiillei români, Bogdan Aurescu, avu, Washington, muabeț politiți cu secretarlu di stat a SUA, Mike Pompeo, unâ furńie s’aproaki naetea ali SUA ta s’li creascâ efectivili militari pi teritoriul ali Românie. Tu arada-lli, ufițialu american salută parteneriatlu ți easti tu lucru di ma multi dzăț di ańi anamisa di ațeali dauă stati, yilipsitu tora ayońea pritu Acordul Interguvernamentalu vulusitu tu 9 di sumedru tră retehnologhizarea şi ta s’adrâ reactoari la țentrala nucleară di Cernavodă.
Ațelli doi demnitari avurâ muabeti ti anvârtușearea-a ligâturloru tu dumenea ali apărari, criștearea-a securitatillei energhetiți tu Europa pritu extracţia di gazi ditu Amarea Lae, ama și ti potenţialu generator di crişteari a Iniţiativâllei a ațiloru Trei Amări. Ufițialli acâțarâ tu isapi cilâstâserli ți li fați SUA, nica și financiaru, ti proiectili di ligari a nordului cu sudlu a reghiunillei tu cari easti România, cu hâiri economicâ, ama şi cu scâpo strateghicu ti mobilitatea militarâ.
Caplu a diplomațiillei români exighisi, la Radio România, că proiectili va s’hibâ adrati pritu Fondul di Investiţii a Initiaţivâllei a ațiloru 3 Amări.
Ia ți spusi tu zborlu a lui Bogdan Aurescu: “Vârâ turlie, vahi pânu di bitisita-a anlui, Fondul di Investiţii va li facâ publiți proiectili ți li aleapsimu tu protlu mâńuclliu di proiecti ți va s’hibâ finanţati di Fond. Feațimu moeabeti şi ti simasia ți u ari ahurhearea câtu cama ayońea ti scuteari și lucrari resursili energhetiți ditu platoulu continental ali Amarea Lae cu cilâstâsearea americană, câte eali suntu multu anânghisiti tră asiguripsearea-a independenţâllei energhetiți ali Românie, ali Ripublicâ Moldova, ama şi ti alti stati ditu reghiuni”.
Di altă parti, Bucureștiul și Washingtonlu va s’aibâ unâ parei di lucru deadunu ta s-u-acațâ tu isapi România pritu programlu Visa Waiver. Cama multu, Parlamentul European lipseaști s’vuluseascâ unâ rezoluţie tu cari s’caftâ a Comisiillei Europeanâ s’llia meatri ti atea că româńilli au ananghi di viză ta s’agiungâ tu SUA.
Tu aestâ noimâ, nâpoi cu unu zboru Bogdan Aurescu:
“Ari muabeț ți s’dizvârtescu di multu kiro, di ma multi ori, câțe easti dealihea, s’țâni isapi, deapoa easti şi un dialog anamisa di Statile Unite şi Uniunea Europeană ti subiectul a mobilitatillei, s’clleamâ, pânu tu soni ti subiectul Visa Waiver. Ti muabetea ți u avumu, cundillemu maxusu simasia ți u da cetăţeańilli româńi ti aestu program ama şi ti intrarea ali României tu Visa Waiver, simasia simbolică şi sensibilitatea ți u au româńilli andicra di aestu obiectiv ți secretarlu di statu Pompeo lu-akicâsi multu ghini, sâ spusi simfunu cu obiectivili şi argumentili ți li pârâstisimu, unâ furńie ta s’thimilliusimu aestâ parei, ta s’videmu cari suntu hâlățli di lucru ți lipseaști s’nkiseascâ tu kirolu ți yini, ațea turlie câ aestu obiectivu s’hibâ bâgatu tu practiko”.
Bogdan Aurescu nica hâbârisi ș-ațea că tu aestu kiro s’ndreadzi a 7-a sesiuni a dialoglui strateghicu bilateralu, cari va s’țânâ Washington tu prota parti a anlui ți yini.
Autoru: Daniela Budu
Armânipsearea: Tașcu Lala
