Habari dit bana romaneasca si internationala
Imigranta si Arifugat — Di Londra pana Copenhaga, dzat di n’il’i di europeni işira, sâmbătă, pi geadei tra s-faca apel la ma multă filotimie andicra di arifugaţl’ii cari yinu tru numir cabaia mai tru Europa. Al’iumtrea, ma multi vasilii ale UE, inclusiv România, şi spusira opoziţia andicra di politica a nascantor cote obligatorii promovată di Bruxelles tra ampartarea a migranţalor cari agiungi pi auseaticlu continentu. Ungaria dimanda că, di stămâna yinitoare, atel’i cari va s-mindueasca s-intra paranom pi teritoriul a l’ei va s-hiba arestaţ. Cancelarlu austriac, Werner Faymann, lu cutugursi sertu premierlu Viktor Orban, comparândalui tratamentul la cari suntu bagat migranţal’ii pi teritoriul ungar cu atea ti s-fatsea tru perioada nazistă. Uidisitu cu minduita ali Organizaţie Internaţionala tra Migraţie, tra s-yina tru Europa, dit yinar, cama di 430.000 di imigranţa şi arifugiaţ dit Orientul di Mesi ica nordul ali Africa tricura Meditearana. Aproapea 2.750 ş-chirura bana tru amare ica suntu daţ chiruţ.
Roxana Vasile, 12.09.2015, 19:29
Moscova — Prezidentul rus, Vladimir Putin, hiritisi, sâmbătă, danasearea a alumtilor militare di cătra forţale ucraineane şi separatiştil’i proaruşi dit estul ali Ucraina, luyursindalui că aesta easti printipala realizare a gaeretlor tra instaurarea ali irini tru regiune – dimanda Reuters. La 1 di yismaciuni fu apufusita danasearea a alumtilor tra s-nu hiba cutulburat anlu şcolar tru estul ali Ucraina, iu priscaviili featira aproapea 8.000 di morţa di la nchisita a conflictului armat, tru apriliu 2014. Kievlu şi Occidentul u stipsescu Moscova că vindi armie ti aribeli’i ş-că dizvarti, tru zonă, şi trupe regulate. Rusia nu aproachi categoric stepsurli. Premierlu ucrainean, Arseni Iatseniouk, cafta a Occidentului s-nu curma sancţiunile bagati ti Moscova tra mintearea tru conflictu masi cara va s-agiunga la una irini durabila.
Washington — Fosta mari gimnastă dit România, Nadia Comăneci, baga, sâmbătă, pi frandza a l’ei di Facebook un cadhur tru cari easti deadun cu Simona Halep, pi cari u numaseaşti ‘vasiloan;ea-a tenislui’. Postarea fu faptă dupu ndauâ sahat di anda Halep, numirlu 2 WTA, u rata calificaria tru finala di la US Open tru favoarea a italiencal’ei Flavia Pennetta. Tru dzalili dit soni, la meciurli dit cirecuri şi semifinali di pi arenele Flushing Meadows di New York, Nadia Comăneci fu un susţinător importantu ali Simonal’ei Halep. Semifinala di la US Open easti nai ma bun rezultat a l’ei la turneele di Mare Şlem tru 2015, după cireclu di finală di Australian Open, turlu doi la Roland Garros şi primlu tur di la Wimbledon.
Luxembourg — Miniştri dit zona euro sa spusira, sâmbătă, Luxembourg, cabaia isihasiţ tu perspectiva a alidzerlor parlamentari ninti di kiro di tu 20 di yismaciuni dit Gartia. Tru minduita a lor, aesti nu va s-baga sum semnul a întribaril’ei angajamentili ti li lo tora ma nainti Atena andicra di creditorl’ii a l’ei internaţionali tra s-la si da treilu agiutor financiar ti ari scupolu să scoată dit colapsu vasilia, intrată aoa si ndoi mesi tu niaxizeari di plată. Easte tra a treia oară tru un an cându gretl’i sunt cl’imaţ la urne. Scrutinlu di stămâna yinitoare fu apufusitu după ti, tru insita a meslui agustu, premierlu Alexis Tsipras demisiona di furn’ia a niifharistuserlor dit a lui partid, Syriza, di stânga radicală, ligati di achicasearea la cari agiumsi Guvernul a lui cu creditorl’ii.
Armanipsearea: Tascu Lala
