Habari dit bana romaneasca si internationala
Tașcu Lala, 17.05.2018, 16:53
Roma – Agiucătoarea română di tenis Simona Halep, di fara armaneasca, numirlu una mondial, s-califica, aza, tu cirecurli di finala a turneului WTA di Roma, dotat cu premii totali di 2,7 miliun’i di euro, dupa ti americanca Madison Keys (14 WTA) s-trapsi di furn’ia a unei accidentari, cu putan kiro ninti ta s-ahurheasca partida. Românca s-califică aesta turlie ti doilu an arada tu cirecuri. Di alta parti, prota adversara a Simonal’ei Halep tru turneulu di Roma, Garbine Muguruza (3 WTA) fu eliminată tru turlu secundu di australianca Daria Gavrilova (24 WTA).
Bucuresti – Ministerlu roman di Externe lo habari ti apofasea a autoritătlor di Ramallah tra s-cl’iama ti consultări ambasadorlu palestinian di Bucuresti si cundil’eadză, tru un comunicat, ananghea ti s-nu s-agiunga la iti actiuni cari poati s- compromită proteslu di irini. MAE lugurseasti că easti ananghi ma multu di candu s-hiba ti un dialog politic niacumtinat, nica si prit reprezentantili diplomatiti, si ti darea sila a ligaturlor diplomatiti, ti andruparea a unal’ei abordari constructiva tu atea ti mutreasti problematica israeliano-palestiniană. Tutunaoara, MAE napoi aduti aminti ti minduita di prota thesi ali Românie mutrindalui ceareai ti existenta a atilor dauă stati, Israel si Palestina, cari s-baneadza tru irini si securitati. N’iercuri, ambasadorlu ali Palestina tru România, Fuad Kokaly, fu cl’imat tu catastisi di ananghi Ramallah ti consultări. Ministerlu di Externi a Autoritatil’ei Palestinieana (ANP) feati demersul tru contextul tru cari România easti anamisa di vasiliili cari ambudyiusira declaraţia comună a UE mutrindalui rilocarea di cătra statili membri a misiunilor diplomatiti di Tel Aviv, tu Ierusalim, cundil’eadză comunicatul.
Bucuresti — Premierlu roman, Viorica Dancilă, avu moeabeti, gioi, Bucuresti, cu responsabilu tra Piata Internă, Industrie, Antreprenoriat si IMM-uri dit Comisia Europeana, Elżbieta Bieńkowska. Prota tema abordata fu ti yinitorlu buget comunitar, tra care premierlu spusi ca lipseasti s-ndrupască gaeretli ti n’icsurari a decalajilor anamisa di statili membre. Tru arada l’ei, comisarlu european lugursi evoluţia economică pozitivă ali Românie şi feati timbihi că yinitorlu buget lipseasti s-ahardzească ma multu ti cooperarea anamisa di industriili di apărare a vasiliilor comunitari. Di alta parti, tut gioi, premierlu Dancila lu astipta ministurlu israelian a Turismului, Yariv Levin. Atel’I doi zburara ti creastirea exponentiala, tu an’il’I dit soni, a cooperaril’ei bilaterala tu domeniu, Israelu hiindalui pi doilu locu, după Germania, tru toplu a vasiliilor cu nai ma mari numir di turişti agiumţa tu România. Atradzearea a capitalui israelian tu sectorlu turistic autohton si valorificarea a patrimoniului cultural evreiescu dit Romania, prit dezvoltarea a unui program turistic comun, nica eara tu arada a dzuual’ei di lucru ali andamusi.
Autor: Udalu a habarlor
Armanipsearea: Tascu Lala
