Furn’iili a traghediil’ei di la clublu Colectiv
Atea ti lipsea ta s-hiba una seară di viniri isiha, tricuta deadun cu sotl’I tru un club bucureştean agiumsi, ti nandaua secunde, un cadealithea iad tra suti di tiniri, cari avura taxiratea tra s-hiba aclo. Artişti, fotografi, jurnalişti, arhitecţa, elevi olimpit, studenţa xen’i, corporatişti, ingineri loa parti, tru Clublu Colectiv, tru dzua fatidică di 30 di sumedru 2015, la contertul di lansari a unui nau album a pareiil’ei rock Goodbye to Gravity. 64 di aeşta ş-chirura bana şi cama di 100 fura pliguit tru traghedia cari u adusi tu jeali tuta România şi cari scoasi tru migdani mari protesti pi geadei, cari featira tra s-da demisia premierlu social democrat Victor Ponta.
Leyla Cheamil, 25.04.2016, 13:24
Dupu giumitati di an di anda s-feati traghedia, Parchetlu General bitisi ancheta tru dosarlu a marlui foc di la clublu Colectiv. Dit rechizitoriul di 170 di frandza a procurorlor iasi tru videala că, tru aestu club, nu fura tin’isiti normili contra a incendiilor. Uidisitu cu atea ti spun procurorl’i, tru marli fac s-featira temperaturi di 900 di gradi Celsius, foclu s-teasi până di davani ti 33 di secundi, iara atel’I ti eara năuntru s-tran’ipsira multi minuti s-discl’idă a doaua uşă a localui. Un di atel’I ti armasira tru bana declara că, tru discl’idearea a concertului, s-apresira artifitiile di pi scenă cari era ca vara vulcan şi arca scânteali la mari anălţimi. Aestu spuni că, scântealili arichisurara pi un stur cari lo foc una s-una, a deapoa fleamili s-teasira cata davani.
Tru rechizitoriul adrat di procurori nica sa spuni că stingătoarili dit club era expirati, a deapoa după ti s-apreasi marli foc un bărbat vru tra s-astinga foclu si arca cu bira. Ma multa insi, nica si acţionarl’ii a clublui, va s-hiba pitricut tru giudicata tru dosarlu Colectiv. Atel’I trei patroni suntu stipsit ti vatamari şi vătămari corporală dit culpă tru formă agravantă şi că nu loara apofasili legali di securitati şi sănătati tru lucru. Declaraţiili a aistor tru ligătură cu parmatiili filisite tra izolarea fonică a localui nu suntu idyea cu ateali a constructorlui. Atel cari lucra ti znueari spuni că atel’I trei aleapsira parmatii ieftini şi neignifudzi, chiro tru cari patron’il’i spun că loara asiguripseri di la constructor că parmatiili filisiti erau tratati contra a foclui.
Tutunaoara, atel’I trei patroni suntu stipsiţ că deadira izini la un numir multu mari di oamin’I ti eara pisti limita admisă a localui, tru condiţiili tru cari spaţiul nu era pruvidzut cu ma multi căl’iuri di evacuari tru caz di ananghi, şi că fura simfun’I cu dizvartearea a unui spectacol pirotehnic, aca amenajărli interioare era improprii. Si patroana a formal’ei di artificii va s-hiba pitricuta tru giudica, cate ancupara şi vindu parmatii pirotehniti cari nu avea instrucţiuni tru limba română şi ti atea că nu la feati instructajlu a lucratorlor pitricuţ ti montarea a artificiilor tru Clublu Colectiv.
Armanipsearea: Tascu Lala
