Fostul guvernu, anchetat di naulu Parlamentu (17.01.2017)
Senatlu şi Camera a Deputaţlor di Bucureşti, adunati tru andamusi comună, apufusira s-adra una ancheta mutrindalui rectificărli bugetari fapti anlu ti tricu di Guvernul tehnocrat cumandusitu di Dacian Cioloş. Verificărli va s-hiba adrati di cătra Comisiile di buget-finanţe, cari lipseasti s-parastiseaasca un raportu tru yinitoarili dzali. Va s-hiba anchetati procedura şi datili cari eara la thimel’iu tra adoptarea di cătra Guvernul Cioloş a rectificărlor bugetare dit agustu şi brumar 2016. Nchisita fu catugursita di PNL şi USR, cari sa spusira contra a aistei iniţiativa.
Mihai Pelin, 17.01.2017, 12:25
Ia ti spusi viteprezidentul a libearalilor, Cătălin Predoiu: “Partidlu Naţional Liberal nu aproachi aestă anchetă, ti furn’ia că ea nu ari altu scupo ca masi s-amâna momentul tru cari partidlu şi coaliţia di partid di la guvernare lipseasti s-da giueapi tru ligătură cu niputearea tra s-baga tru lucru un program irealizabil.” Al’iumtrea, liderlu social-democrat, Liviu Dragnea, cundil’e că una anchetă easti ananghisită, avândalui tru videala că fura vulusiti rectificări bugetare pozitive, tru condiţiile tru cari amintatitli scădea mes di mes.
Liviu Dragnea spusi: “S-videm desi easti di furn’ia a ixichil’ei di amintari a fondurlor europene, ica dit furn’ia că s-feati una slaba adunari a TVA şi cari suntu cauzili. Criscu evaziunea fiscală, slăghi controlu a ANAF-lui, avu una ţisătură di oameni bagata tru ANAF cari feati ca nascanti firmi s-nu hiba controlati, ca nascanti importuri s-intra ma lişor tru vasilie ? Că nascanti halat, mecanismi şi instalaţii di control la yimbruche vahi numata lucreadza ica nu lucrara una s-una?”
Tut la iniţiativa al Liviu Dragnea, plenlu di la Camera a Deputaţlor adopta una apofasi prit cari s-caftă una analiză pi idyea temă şi di la Curtea di Conturi. Fostul premier tehnocrat Dacian Cioloş apăndasi, pi un singir di socializari, la stepsurli ligati di execuţia bugetară ti anlu ti tricu. Tru minduita a lui, aestă idhee poate s-hiba lugursita ca una fumigenă di partea a atilor cari nu au cum să-şi tin’iseasca taxerli fapti tru campania electorală. Fostul premier aduti aminti di un recordu di ncasări di la UE – 7 miliardi di euro, paradz cari intrara tru România. Ma multu, ma s-acatam tru isapi evoluţia ali economie româneşti dit primlu semestru, eara ntimil’eata una rectificari bugetară pozitivă tru doilu.
Dacian Cioloş nica spusi că, prit tuti misurli loati tru anlu ti tricu, fu lişurată fortuma fiscală prit rambursări ma mari di TVA si eara ndreapti si condiţii favorabili atea turlie ca Guvernul dit aestu an s-adună ma mulţa paradz europeni, aproapea trei miliardi di euro.
Autor: Mihai Pelin
Armanipsearea: Tascu Lala
