Unu virusu tru mplină veară
Marius Tiţa, 05.07.2021, 11:29
Ideea că a viruslui SARS-CoV-2 nu ălli arisesescu temperaturli ma mări işi tu vidială tru ahurhita-a pandemiillei, cându să ştea multu pţănu ti naua şi lăhtăroasa fuvirseari medicală. Până tru soni, specialiştilli nu aprukeară vără acţiuni distructivă a căldurăllei contra-a viruslui, ama veara-a anlui 2020 nsimnă ună ňicurari a lăndzidzărloru, nai ma pţănu tru România. Şi aesta tamam tu kirolu anda dănăsi izolarea sertă băgată tră tuţ, fenomenu agiumtu tu sinidisea colectivă ca hiindalui lockdown.
Tru idyiulu kiro, ună văsilie exotică, dominată di temperaturi mări, Brazilia, s’ampulisea cu ţifri lăhtăroasi mutrinda zňiili a pandemiillei. S-nu agărşimu, ama, că regimlu a prezidentului Bolsonaro dusi şi ma largu duţi ună politică ti negari a viruslui, cari u băgă Brazilia pi doilu loc tru lumi tru clasamentul lăhtărosu a victimiloru panedemiillei.
Ună văsilie caldă şi cu populaţie multu mari, India, agiumsi pi treilu loc tru aestu clasamentu. Tru văsiliili europeani, maxus, cari băgară meatri salami di protecţie şi di distanţari, arăspăndirea-a viruslui ňicură tu veara-a anlui ţi tricu şi aesta easti şi tora, cându veara năpoi s’turnă.
Cadealihea, căldura nu vatămă viruslu, automat, ama aerlu uscat nu da izini a particuliloru microscopiţi purtătoari di virus s’azboairă şi s’arăspândească lăngoarea. Aluştui efectu a căldurălli ălli adăvgămu purtarea-a prusupidăllei, igienizarea hăirlătică, distranţarea fizică şi, maxusu, vaccinarea. A deapoa vaccinarea easti, până tu soni, evoluţia esenţială tru pirmitusearea ţi canda nu ari bitiseari a pandemiillei. Tuti aesti adunati stogu avură contributu esenţialu ti ňicurarea a impactului pandemicu tu ahurhita-a aliştei veară, cu scădearea cabaia multu numirlu di infectări, infectărli greali şi a morţăloru.
Ti mulţă, bitisita-a pandemiillei canda eara aproapea. Ama mathima-a pandemiillei Canada nu easti nviţată multu ghni. Vigilenţa s’ňicură şi ea, tu kirolu anda criscu elefterisirea ţi s’deadi di itia-a restricţiiloru tră curmari a pandemiillei. Easti aţelu sticu di oară, nai ma pţănu tu emisfera nordică, aclo iu easti şi China, şi Europa, şi SUA, când aerlu uscat ňicureadză arăspândearea-a viruslui ama urdinarea a oamiňiloru easti multu ma mari. Aşi, puteam s’nă aştiptămu că ňicurarea ţi u avemu dininti tora să s’tindă cama multu şi ma ahăndosu, dimi pandemia s’hibă faptă afanu, s’keară tră totna.
Asparizma goală yini ditu comata-a vaccinarillei, iu nu suntu duri dozi ti tuţ oamiňilli ditu lumi, nu suntu niţi capacităţ medicali ti vaccinarea-a tutăloru oamiňiloru. Ama nu avem niţi aprukearea ghenerală a vaccinlui, iara purtaticlu activu anti-vaccin easti multu vărtosu. Cu tuti aestea, ari ună comată esenţială di oamiňi cari aşteaptă vaccinlu anti-COVID, suti di miliuňi, ama a curi duňeaua nu easti nica axi ş’lă u aducă a loru.
Tru 2020, după relaxarea ditu veară vini ună a daua dalgă ică ună treia dalgă, nu easti dipu limbidu numirlu di ordini di itia că evoluţiili nu suntu unitari ama multu di multu pi len turlii, di la ună văsilie la alantă. Tora s’aşteaptă ca, după ună relaxare di veară, năpoi s’yină cotili mări a infectarillei, vahi nu ahătu mări, di itia a imnaticlui ţi easti cu vaccinarea. Ică ş’cama mări, di itia că tu muabeti easti anămusita Delta, ună turlie ma virulentă a viruslui, cu ună ma mari capacitate di tindeari. Putemu să spunemu că aestă a patra dalgă canda şi ahurhi, aclo iu părea că easti pi cali ta s’keară. Cabaia găilipseaşti zňiia a variantăllei Delta a coronaviruslui ti persoanili vaccinate, tru formula completă. Acă vaccinlu easti acreditat cu efectu di imunizari şi tu ligătură cu aestă lumaki, criştearea ntrăoară a infectărloru tru spaţiul a Israelui şcurtă harauua-a unăllei gaereti cabaia mari ti vaccinari şi adusi catastisea aşi cumu eara ma ninti, cu interdicţii di călătorie şi meatri di ncllideari. Lă s bagă zori s’adară testi şi carantină nica şi vaccinaţlli, atelli cari s’luyursea ună categorie di privilegiaţ, di s’hărsea di ndrepturi şi elefteriseri ma mări andicra di atelli ţi eara dinintea a piriclliului fără agiutorlu a unlui vaccinu.
Alănci şi tru România varianta Delta, tru unu contextu di restricţii multu ňicurati ama şi di ňicurari a vaccinărloru, cari aspardzi orizontul di vaccinari dimăndatu di guvernanţă. După un an şi giumitati di evoluţie tru era COVID, România spuni ţifri câtu s’poati mplini di nădii ama fenomenili cari s’manifestă cabaia multu şi ntrăoară tru alti locări nă aducu aminti că bănămu tru ună lumi globală, tru cari ştim ţi ari tra să s’facă, ama nu himu sigura cându.
Autoru: Marius Tiţa
Armãnipsearea: Taşcu Lala
