Un politicianu anamisa di oamiñi

Tru 2018, prim-ministrul japonez di atumţea, Shinzo Abe, feaţi ună voltă tru văsiliili a Estului European. Hopa ditu soni a voltăllei s’dizvărtea tru România, hiinda zborlu di prota vizită tru aestă văsilie ţi u ari faptă vărăoară un premieru nipon. Cându analtulu oaspi agiumsi Bucureşti, premierlu Mihai Tudose tamam ş-avea dată dimisia, di itia că avea chirută andrupămintul a partiillei a lui. Fortuma a muabeţloru bilatearale fu dusă pi livelu prezidenţial, dimecu premierlu Shinzo Abe s’andămusi cu prezidentulu Klaus Iohannis. Agenda a muabeţloru fu avută şi diversă. Japonia și România avea agiumtă pi isapea că ambărţiteadză idyili valori di thimelliu, cum libertatea, democrația, ndrepturile a omlui și statlu di dreptu. Să zbură ti anvărtuşearea a buniloru ligături bilatearale, nica şi agiundzearea-a aluştoru pi livelu a unui parteneriat strategic. Un rolu ahoryea tru cadrul aluştoru ligături lu-ari, cadialihea, economia. Tru aestă vizită, premierlu Abe eara vinitu cu ună misiune economică la cari loară parti reprezentanţăllii a niscăntoru mări companii japoneze. Muşeati imagini n-armasiră di atumtea ditu kirolu a vizităllei tru Gărdina japoneză di Bucureşti ama şi la Muzeulu Naţional a Hoarăllei “Dimitrie Gusti”, tutu ditu capitala a Româniillei.

Marius Tiţa, 10.07.2022, 20:41

Tru 2018, prim-ministrul japonez di atumţea, Shinzo Abe, feaţi ună voltă tru văsiliili a Estului European. Hopa ditu soni a voltăllei s’dizvărtea tru România, hiinda zborlu di prota vizită tru aestă văsilie ţi u ari faptă vărăoară un premieru nipon. Cându analtulu oaspi agiumsi Bucureşti, premierlu Mihai Tudose tamam ş-avea dată dimisia, di itia că avea chirută andrupămintul a partiillei a lui. Fortuma a muabeţloru bilatearale fu dusă pi livelu prezidenţial, dimecu premierlu Shinzo Abe s’andămusi cu prezidentulu Klaus Iohannis. Agenda a muabeţloru fu avută şi diversă. Japonia și România avea agiumtă pi isapea că ambărţiteadză idyili valori di thimelliu, cum libertatea, democrația, ndrepturile a omlui și statlu di dreptu. Să zbură ti anvărtuşearea a buniloru ligături bilatearale, nica şi agiundzearea-a aluştoru pi livelu a unui parteneriat strategic. Un rolu ahoryea tru cadrul aluştoru ligături lu-ari, cadialihea, economia. Tru aestă vizită, premierlu Abe eara vinitu cu ună misiune economică la cari loară parti reprezentanţăllii a niscăntoru mări companii japoneze. Muşeati imagini n-armasiră di atumtea ditu kirolu a vizităllei tru Gărdina japoneză di Bucureşti ama şi la Muzeulu Naţional a Hoarăllei “Dimitrie Gusti”, tutu ditu capitala a Româniillei.

Tora, româñilli, nviţară lăhtărsiţ că analtul oaspi japonez, ditu 2018, fu asasinat. Tru kirolu anda ţănea unu zboru informal, tru veclliulu căsăbă imperial Nara, politicianlu fu tufikisitu şi muri tru şcurtu kiro. Eara tru mplină campanie electorală, tră aprukeatili alidzeri. Nu zbura di la ună tribună babageană ama di pi unu postamentu improvizat, tamam anamisa di publicu. Lă zbura ndreptu a oamiñilor şi aesta u ñicură menga a procedurilor di securitate. Di altă parte, tru Japonia s’dizvărteaşti ună politică multu sertă di control a armelor ţi li ari populaţia. Neise, criminalu, cari fu arestat ună ş-ună, nu ufilisi ună armă alithea ama ună adrată artizanal, ama eara ună cari lucră ti anami. Asasinlu putu tra s’aproaki di politician şi lu tufikisi pi dinăpoi, di dauă ori. Scena fu filmată ditu ma multe direcţii ama mulţă ditu atelli cari fătea aestu lucru s’aspăreară şi imaginile cari yinu dupu tufikiseari marcheadză un şoc ti nipistipseari. Deapoa, ună ş-ună, easti vidzutu asasinul, imobilizat şi fără s’ţănă keptu. Easti un tiniru anvărliga di 40 di ani, di la cari ti aştiptai s’hibă mintitu tru cercetări şi discoperiri ştiinţifiţi ti bună tră aestu secol, şi nu tru nkisiti fuviroasi, distructive, criminale, ditu secolili di ma ninti ascăpitati.

Shinzo Abe easti lugursitu premierlu japonez cari fu nai cama multu kiro tu aestă funcţie. Amintatu tru 1954, tru ună prestigioasă familie di politicieni, Shinzo Abe aleapsi şi el aestă cale, tru arădărikili a Partidlui Liberal Democratic. Tru 2006 agiumsi prim-ministru, şi armasi pi ipotisi tamam un an. Vini diznău tru aestă ipotisi tru 2012, hiinda prim-ministru ali Japonie tră opt ani. Aeşti nauă ani tru caplu a guvernului di la Tokio îl fac s’hibă politicianul cari avu nai ma multu aestă funcţie. Japonia easti cunuscută şi tră faptul că guvernele nu rezistă dipu multu, avânda perioadi şcurte di funcţionare. Tutunăoară, premierlu lipseaşti s’hibă şi căpia a partidului la puteare, ase că turnarea pi funcţia di premier easti multu aretcu. Easti cazlu golu di reinvestire tru aestu secol, XXI, doilu di la polim pănă adza şi treilu ditu istoria modirnă ali Japonie. Asasinarea a fostului premier Shinzo Abe easti nica ună moarte absurdă şi inutilă, tru ună lume tru cari prişcăvillea u lugurseamu kirută di şi scoati cărinţălli pisti tut şi aclo iu nu ti aştepţă.

Autoru: Marius Tiţa

Armânipsearea: Taşcu Lala