Un nău vot tră Brexit
Poate s’hibă spus că britaniţl’i votară di ma multe ori tra ieşearea dit Uniunea Europeană, nu maşi la 23 di cirişaru 2016. Şi votlu di la alidzerle parlamentare anticipate dit aestă stămână easti tut un vot tru favoarea a Brexitlui, vahi nai ma limbidu şi ma apufusitu. După şoclu a referendumlui dit 2016 şi anda niţi un vade ti ieşeare dit Uniunea Europeană nu fu tin’isitu, s’ndreapsi doilu referendum ti Brexitu. Eara cu nădia că un nău referendum vrea u alăxea acuotalui situaţia tră armăneari tru Uniunea Europeană, situaţie ţi canda easti ma logică, normală. Aestă poziţie ari la thimel’iu ixichea a născăntoru argumenti decisivi ti fudzeari, işeari şi un şingiru di prişmănlăchi manifestati public, după referendumlu di ampărtari. Cu chirolu, ama, realitatea fu altă turlie, i situaţia s-alăxi.
Marius Tiţa, 29.12.2019, 08:07
Poate s’hibă spus că britaniţl’i votară di ma multe ori tra ieşearea dit Uniunea Europeană, nu maşi la 23 di cirişaru 2016. Şi votlu di la alidzerle parlamentare anticipate dit aestă stămână easti tut un vot tru favoarea a Brexitlui, vahi nai ma limbidu şi ma apufusitu. După şoclu a referendumlui dit 2016 şi anda niţi un vade ti ieşeare dit Uniunea Europeană nu fu tin’isitu, s’ndreapsi doilu referendum ti Brexitu. Eara cu nădia că un nău referendum vrea u alăxea acuotalui situaţia tră armăneari tru Uniunea Europeană, situaţie ţi canda easti ma logică, normală. Aestă poziţie ari la thimel’iu ixichea a născăntoru argumenti decisivi ti fudzeari, işeari şi un şingiru di prişmănlăchi manifestati public, după referendumlu di ampărtari. Cu chirolu, ama, realitatea fu altă turlie, i situaţia s-alăxi.
Tru cirisaru 2017, la un an di la referendum, fură ndreapti alidzeri parlamentari anticipate cari lipsea s-da aintaticu di cauză a opozanţălor la Brexit, hiinda ună itie di alăxeari ali situaţie, di convocari a unui nău referendum ica di trădzeari măna di la ideea ti fudzeari. Suporterl’ii a Brexitlui nica şi conservatorl’i chirură teren salami ama nu duri că laburiştil’i s-yină la puteare, cu ună platformă antibrexit. Conservatorl’i armasiră la puteare ama aprăftăsiră maşi ună haotică chiverniseari ali situaţie, ma avură la thimel’iu ună majoritate multu creahtă tru Parlament. Ahât haotică câ britaniţl’I fură grit să-şi voteadză reprezentanţăl’i tru Parlamentul european dit cari nu mata lipsea s-facă parti.
Tru chirolu anda partidile tţi băna maşi dit ideea a Brexitului kirură teren, criscu areapta separatistă a conservatorlor, sum cumăndusearea a unui dedicat extrem ti ieşearea dit UE, Boris Johnson. Ase, moeabetea fudzi alargu dit zona ma puţăn tradiţională a politicăl’ei şi agiundzi la nivelu a acelor dauă partidi di bază ali democraţie britanică. Iara votlu di gioi spusi limbidu că politicien’l’i pro-Brexit suntu aţel’I cari au ndriptatea a urnilor şi agiutorlu a bănătorloru cu ndrept di vot. Pot s’hib2 adusi multe argumente cari s-demonstreadză că alumta fu ună politică, cu argumente di bună kiverniseari a văsiliil’ei, ama cadealihea easti că tuti tricură prit lentila a poziţionaril’ei andicra di fudzearea dit Uniunea Europeană. Niţi nu eara qananghi di performanţa economică ica di altă factură a membrilor a guvernului, câţe pi measă eara, tru regim di ananghi, problema a Brexitlui, amorsată tru 2016.
Votlu dit aestă bitisită di anu fu ună turlie di doilu referendum mutrindalui Brexitlu, tra aţea că un cadealihea nu putea s-hibă organizat. Cara vrea s-aminta babageanu laburiştil’i sastipta că Brexitlu s-hibă amânat ica anulat. Al’iumtrea, maca puteearea agiundzea tru mân’ili a conservatorilor, a premierlui tru exerciţiu, Boris Johnson, aţel cari ş-adră dit Brexit un scupo a lui işişi, aestă vrea s-dzăcă ieşearea dit Uniunea Europeană cu iţi păhă.
Votlu fu limbidu, multu limbidu, tru aestă paradigmă. Britaniţl’I spun majoritar politica Brexit a premierlui Boris Johnson iara năulu guvern ari tu scupo băgarea tu lucru a lui. Tora, guvernul conservator ari tuti pârghiile tra ş-bagă marca personală pi evenimentul istoric ti ieşearea dit organizaţia europeană. Cara evoluţia easti limbidă, tora lipseaşti s’hibă fapti isapi minuţişu itiili tră cari s-agiumsi aoa, la aestă poziţie fermă anti-europeană a britaniţlor.
Va s-hibă zori ti determinari tra atea că boaţea pro-europeană ghiuşbilea s-avdi şi nu pari s-aibă ţiva ti spuneari. S’hibă zborlu di politica laburistă cabaia slăghită şi nicăndisitoari, cari hărni oprobiul ti armâneeari tru Europa? Tra atea că nu poati s-hibă zborlu ti ună politică exemplară a conservatorlor cari s-amintă pi thimel’ilu a născăntoru prinţipii sănătoase şi filotimi. Nica ari şi căbili că aţeali dit soni evoluţii di pi continent, di Bruxelles şi Strasbourg, s’nu lă arisească a britaniţlor. Ica, ma multu, că stadiul actual a politicăl’ei europene s-hibă cu nvirinari nica şi suporterl’i britaniţ ţi suntu ti armâneari tru UE ahătu multu câ s-aleagă fudzearea ică, niifharistusiţ, s-armănă nanăparti. Armâni tora s-hibă ndreapti lucărli concreti a Brexitlui, cari agiumsi, prit vot universal şi liber, inevitabil.
Autor: Marius Tiţa
Armânipsearea: Taşcu Lala
