Prima pagină » Actualitate » Focus » Manchester United

Manchester United

Cadealithea, nu va sa zburam ti aesta echipă di fotbal cu anami Mancheastir United, acă tamam aminta Europa League. Acă, s-pricunustemştem, una fantastică trutâmplare fati ca pareia cu aesta numă s-amintâ trofeulu european golu ti nu lu-avea tru palmares la ma puţan di 2 dzali di la ataca terorista cari vatama 22 di oamin’i la un concertu, tru casabalu Manchester. Paul Pogba easte fotbalistul francez cu părinţa dit Guineea, cari marca primlu gol a partidal’ei amintatoari. Easti nai ma scumpu agiucător dit lume, iara cu 10 dzale nintea ali ataca terorista, tatăl a lui kirea alumta cu langoarea. La Stockholm, după victorie, Pogba spusi că amintara tra atel’i cari murira tru laşul atentat. Mancheaster United agiumsi una deviză cari nastricu sfera fotbalului. Tora, Manchester United nsimneadza tut laolu cari condamnă terorismul şi disemneadză starea di spirit a unei comunităţ umineşti unită dinintea ali crima. Dispre incredibila unitate manifestată di oameni zbura şi regina a Regatului Unit, la capitan’ilu a tinirlor pliguiţ tru atentat. Dispri unitate zburara liderl’ii a marlor naţiuni şi oamin’i di iutido, Manchester, tru Marea Britanie, tru Europa, iutido tru lume şi pe stadionul iu Manchester United aminta cupa cluburilor europene. Crimele teroriste cari li bagara ti jeali aproape tuti vasiliili a Europei, tru kirolu dit soni, adusira frixi, andoieli şi dezamăgiri ama şi unitate. La Manchester, idyea cum Paris, Bruxelles, Nisa, Berlin, Londra şi Stockholm, işira dininti gesturile umane şi n’itile fapte di abnegaţie ili nica s-di eroism cari dimonstreadză că him nica una societate axi di solidaritate şi compasiune. Spaţiul colectiv easti stăpuit, tora, di exemple di abnegaţie, di implicari, di partitipare. Tuti tra andruparea a unei comunităţ dit cari fac parte şi atel’i cari l’i-agudira şi l’i-vatamara pi sotl’i a lor. Nu cu multu kiro ma ninti, sinistra organizaţie auto-numasita Statlu islamic lansa manifestul dementu a crimal’ei cu iti paha, tru lumea a Vestului cari tra mulţa fu apanghiu, ascapari ica loclu a nadiil’ei. Atel’i cari acţionara tru aesta 7 casabadz ansândzirat suntu membri a comunitatil’ei, cari loara tut ti vrura ica avura ananghi dit partea a atilor pi cari, ma amanat, al’i vatamara, tru numa a unei idei cari până nu di multu kiro la eara xeană. Orlea zorlea, terorismul cu ti ari tru mână va tra s-aspargă, prota s-prota, solidaritatea a societăţilor dizvoltate, s-aruca tru aera pistipsearea şi akicasearea. Dit atel moment ali discordie, lucarlu a teroriştilor vrea s-hiba dusa ma largu di membrii a societatil’ei, di vitin’i, di oamin’’il’i a titatil’ei. Di nai multe ori, solidaritatea nu easti arodlu a unal’ei isapi seaca cate easti una reacţie hirească, uminească. Aestă realitate nu poate s-hiba manipulată şi iasi totna tru videală, tru momente dramatiti ica cadealithea traghiti. Marea Britanie s-ampuliseasti di aproape un secol cu terorismul, iara plascanerli prescavi s-featira, la dimensiuni incredibile, di ma multe ori. Există şi va s-exista tendinţa tra s-cafta stisiţ, tra s-aduca arăzbunare. Pi aest fundal, niti autoritatea statală nu aduti dininti haristusearea a unei securităţa impecabile şi ti atea s-aminta fenomenul di nipistipseari andicra di stat şi autoritate. Tru atea ti tani di oamin’i, ama, anaparti di sinferuri polititi, economice ica religioase, avem gestul di Manchester a muslimanlui şi ali uvreaua cari plâmsira deadun la aestu mur di lilici a plândzearil’ei pi cari oamin’il’i îl analta daima aclo iu sotl’i a lor suntu vatamat di terorişti. Una nauă imagine emblematică aduti tru menga valori sutiale perene cari s-ved diznau tru momentili di cumpănă. Totna alithil’i ti andrupascu si tin’isescu Dumidzalu, cari ti s-hiba pistea a lui, va s-aiba tin’ia a societatil’ei, cum şi senectutea easti tin’isita di oamin’i. Ti furn’ia ca anvarliga a aistor valori s-aduna oamin’i, ca la Manchester, şi varnaoara terorismul nu va s-azinga.