Dinăpoia a pirdeadzloru cu spectacolu Wagner
ră Africa daima eara spunearea că easti un continent defavorizat, ișit ditu mărli curente a evoluțillei contemporane.
Marius Tiţa, 06.08.2023, 13:46
Tră Africa daima eara spunearea că easti un continent defavorizat, ișit ditu mărli curente a evoluțillei contemporane. Tutunăoară, ari asparizma nicumtinată că aestă arămâneare năpoi va s’aducă efecte greali tră tut laolu. Cu tuti aestea, mărli puteri democratiţi, SUA și craturli ali Uniuni Europeană, disvărtescu di multu kiro programe uminitare, ghini finanțate, tră s’ñicureadză fenomenili dramatiţi ţi s’făţea tru Africa. Di altă parte, marli continentu s-ampulisi daima, pi ningă sumdezvoltari și foamiti, cu aruşfetea și eșeclu a niscăntoru state mări și cu mulţă bănători. Autoritarismul di mână forte, dictatura militară, cunuscu ună creaștire explozivă tru treilli añi ditu soni, maxus tru Africa di Vest. Easti și zona iu extremismul islamic di turlia ali Al Qaeda ică, ma nău, Daech, ș-mută epicentrul. Apandisea-a autoritățlor s’feaţi şi cu forțili speciale franceze și ditu alti state europene ică baş americane. Tru paralel, Rusia s’minteaşti subversiv tru ndilicata catandisi ditu Africa di Vest, tăxindalui ună acțiune ma hăirlătică andicra di atea ţi eara până tora.
Cara ceareia europeană yinea cu tută responsabilitatea democratică, inclusiv cu autorităț aleapti libir, ahurhindalui cu șeflu a statlui, pripunirea arușilor ş-aduţi ma multu cu ună acțiune di mercenari. Neise, aesta și easti. Cara videmu pisti tut, la atelli ţi ndrupăscu goadili di cratu, hlamburili arusești, askirladzlli nu suntu aţeli ali Armata Aroși. Prezența militară arusă tru Africa nu ari ună umbrelă oficială, moscovită, ama easti nviscută tru uniforma a unăllei parei privat, armătusită, cari s’cumăndusească dupu a llei reguli. Anamea a pareiillei Wagner criscu ntrăoară după declanșarea a polimlui arus contra ali Ucraina, tru cari avu un arolă cabaia mari. Tut tru şcurtu kiro, pareia Wagner, privat ama salami păltită di cratlu arus, agiumsi ună contrapondere di giunami și bună organizari andicra di askerea arusă oficială, cu xiki di hălăţ, apofasi și determinare. Tu idyiulu kiro, liderlu enigmatic ama omniprezentu a pareiillei, Prigojin, cădzu tru veacllea princă a notoritatillei cari ţă u mintea giudicata și feaţi amărtia di lezmajestate media. Dimi, işea tu videală ma multu și ma pozitiv tru media andicra di șeflu absolut di Moscova. A deapoa alathusea faptă di Prigojin fu turnarea-a armatloru cătă autoritățli militati ali Rusie, armata al Putin.
Mulță s’ntriba cum di armasi nica tu bană liderlu Wagner, ama Rusia ari ună istorie lungă di martiri politiţ, nu-lli lipseaşti nica unu. Ma multu, cara forțile Wagner ditu Ucraina suntu sumu control, scena africană easti tut ahântu cu tăxeari, pi cât easti di imprevizibilă. Incertitudinea mutrindamira al Wagner, nai ma pţănu până s’hibă băgatu sumu controlul efectiv a autorităților aruse, faţi ca pareia di mercenari Wagner s’hibă apărată, tru aistu kiro, di statele africane pi cari lipsea s’li apără. Si tamam tru aestă catandisi cari va s’hibă ridicolă, cara nu va s’aibă accente traghiţi, militarllii ditu Niger lu-avină prezidentulu aleptu dimocratic, avină Franța și s’alavdă cu naua a lor opțiune, dipărtoasa și inerta Rusie. Explicația va s’hibă aestu grup Wagner, prezentat ca ună forță militară cu hăirea a aţiloru ditu filmili di duzină. Maş că, fără ună situație limbidă, aclo, tru patrida-mamă, pareia canda easti abandonată, cu xiki di resurse și ordini limbidz. La nivel oficial, ditu trastul cu nădii, aștiptări și tăxeri lansate la atelu ditu soni summit Africa-Rusia di la Sankt-Petersburg, maş elicopterlu faptu dhoară di prezidentulu arus ti aţelu ditu Zimbabwe pari s’aibă ţiva șansi s’agiungă realitate. Alliumtrea, ateali aproapea 50 di state africane nu aprăftăsiră ici barimu să-lu căndăsească pi partenerul arus s’alasă biriketea ucraineană s’agiungă la eale, s’curmă foamitea. Și cara Rusia nu va s’yină tru Africa, că maş sumu turlia a unăllei parei debusolată di mercenari inutili, niţi Africa nu va s’ducă tru Rusia, că maş sumu turlia a resurselor pi cari idyea parei li ari tu kiniyi.
Autoru: Marius Tiţa
Armânipsearea: Taşcu Lala
