Protili evenimenti a stămănăllei ţi tricu 16.05 – 22.05.2021
România tru sţenariul veardi
Bogdan Matei, 28.05.2021, 12:53
România tru sţenariul veardi
Bucureştiul şi tuti giudeţili a văsiliillei suntu, ma largu, tru sţenariul veardi ditu videala-a infectărloru cu SARS-CoV-2, dimi rata di contaminari armăni tu idyea scară ma ñică di 1,5 proţenti — dimăndă, gioi, Gruplu di Comunicari Strateghică. Premierlu Florin Cîţu deadi asiguripseri că, ditu meslu ţi yini, va s-hibă apufusiti şi alti hăbiniseri a meatriloru anti-COVID, după ţi, s-trapsi mănă di la obligativitatea ti purtarea-a unăllei prusupidă di protecţie sanitară tru locuri dişcllisi şi la interdicţia ti urdinari noaptea. Caplu a Guvernului spusi că aestu lucru nu ţăni orlea zorlea ti agiundzeari ţinta di ţinţi miliuñi di oamiñi vaccinaţ până tu 1di cirişaru.
Şi coordonatorlu a Campaniillei Naţională di Imunizare anti-COVID, Valeriu Gheorghiţă, lugurseaşti că easti puţănu di căbili ta s-agiungă la aestu scupo până tu bitisita-a meslui mai, ama easti cu nădie că ţinta va s-hibă agiumtă tru prota parti a meslui cirişearu. Cama di patru miliuñi di oamiñi feaţiră vaccinlu, pănă tora, anti-COVID-19, România hiinda pi şaptili locu la nivelu european mutrinda administrarea tru schema completă di imunizari şi loclu 19-ţi pi nivelu mondialu. Tru aestu kiro, vacţinarea s-faţi fără programari, hiinda ananghi maş duţearea la unu ţentru, cu un actu di identitati. Dzăţ di ñilli di oamiñi fură imunizaţ, tru dzălili ditu soni, tru sistem drive-through şi tru arada-a aşi-număsitilor maratoani di vacţinare organizati tru mulţă căsăbadz. Armănu, ama, dramatiţi disuiduserli anamisa di căsăbadz shi hori. Cara Bucureşti proporţia-a aţiloru vaccinaţ tricu di unu cirecu, tru văsilie ari hori tru cari vărnu nu va ta s-vaccineadză.
Dişcllidearea diznău a sculiiloru
Di luni, a eleviloru români numata lă si bagă zori s-poartă prusupida di protecţie sanitară tru avlia a sculiillei. Uidisitu cu dimandarea-a ministurlui ali Educaţie, Sorin Cîmpeanu, aproapea trei miliuñi di cilimeañi ditu tută văsilia pot s-hibă prezenţă fizic la cursuri. Pridarea s-faţi online maş tru clasili tru cari fură confirmati cazuri di infectare cu SARS-COV-2. Ministurlu spusi că programa tră examinili ditu anlu aestu fu ndreaptă tru condiţiile tru cari cursurli eara ţănuti ma multu online, ama că nivelu di dificultati a testilor la Evaluarea Naţională şi Bacalaureatu va s-armănă idyiulu.
Economie şi politică
Produslu Internu Brutu ali Românie criscu tru termeni reali cu 2,8% tru protlu trimestru a aluştui anu, andicra di paturlu trimestru ditu 2020 — dimăndă Institutlu Naţional di Statistică. Premierlu liberal Florin Cîţu spuni că easti nai cama pi iruşi ascumbuseari economică ditu istorie, ca apandisi la nai ma marea criză tu aeştă ditu soni ună sută di añi. El nica spuni că guvernul a lui di coaliţie ndreadzi năi meatri ca economia postpandemie ali Românie s-hibă ma vărtoasă şi ma competitivă. Ditu opoziţie, liderlu PSD Marcel Ciolacu apăndăasi că, tru averu, istorică easti maş cădearea galopantă a putearillei di ancupărari a românilor. El spuni ti paradigmă tră facturli ţi suntu cu 17% ma mări la energhie, combustibilii cu 9 proţente mai scumpi şi ună inflaţie di 3% ş-cama.
Ampuliseri şi pi tema-a Planlui Naţionalu di Relansari şi Rezilienţă
Planlu Naţionalu di Relansari şi Rezilienţă, a curi miză suntu aproapea 30 di miliardi di euro pi cari România va-lli aproachi di Bruxelles, fu tru arada a unăllei andamusi anamisa di premierlu Forin Cîţu şi ună delegaţie a PSD cumăndusită di Marcel Ciolacu. Aestu ditu soni să spusi niifharistusitu că planlu nu fu zburătu cama pi largu şi că fură prezentati maş prinţipiili a aluştui. Nu suntu cunuscuti — stipsi liderlu a stângăllei — niţi reformili pi cari guvernul li băgă tu aestut planu ni ţi păradz va s-llia IMM-urli. După ţi varianta iniţială nu fu aprukeată Bruxelles, Guvernul va tra s-bitisească şi s-pitreacă a Comisiillei Europeani un PNRR revizuit tru bitisita-a meslui mai, cu un mesu amănatu andicra di vadelu apufusitu. Majoritatea-a alăntoru stati membri ali Uniuni ş-dipusiră planurli la Comisie.
Premieră sportivă
Anotătorlu român Robert Glinţă amintă medalia di malămă şi feaţi un nău recordu naţional tru proba di 100 meatri pi păltări, la Campionatili Europeani di anotu di Budapesta. Ma ninti, el amintă şi medalia di asimi, la 50 meatri anotu pi păltări. Easti prota medalie di malămă amintată di România la un Campionat European di anotu tră seniori, tru probili masculini, şi protlu după ună pauză di 17 di añi. Atea ditu soni medalie di malămă fu amintată di Camelia Potec tru 2004, Madrid, tru proba di 200 di meatri libiru. La fotbal, pareia CFR Cluj (nord-vest) amintă, marţă, patrulu titlu consecutiv şi şaptilu ditu istorie di campioană naţională. CFR va s-hibă goală ea reprezentantă a Româniillei tru preliminariili a Ligăllei Campionilor. Viţcampioana, FCSB, va s-agioacă tru nău-thimilliusita Conference League.
Autoru: Bogdan Matei
Armânipsearea: Taşcu Lala
