Protili evenimenti a stamanal’ei ti tricu 19 – 25 di marţu

Mihai Pelin, 25.03.2017, 18:56

Doi români, anamisa di victimili a atentatlui di Londra

Doi români s-aradapsescu anamisa di victimili a atentatlui teroristu di n’iercuri, di Londra. Ataca, tru cari avu morţa şi pliguiţ, fu condamnata di liderl’i politit dit tuta lumea, di la prezidentul american, Donald Trump, şi cancelarlu german, Angela Merkel, la prezidentul francez, François Hollandi, şi prezidentul a Consiliului European, Donald Tusk. La si adavga şi şeflu a statlui român, Klaus Iohannis, cari, tru una convorbire telefonică cu premierlu Theresa May, şi spusi solidaritatea pan di mardzina cu Regatlu Unit. Poliţia britanică ncl’isi ma multi persoane suspecte şi cundil’e că teroristul, tru ilikie di 52 di ani, eara amintat tru Maria Britanie şi avea agiumta un adeptu a islamlui radical. Aestu intra cu aftuchina tru pietoni di pi Apun; tea Westminster, aproapea di Parlamentu, spantica, deapoa, un poliţist şi fu tufikisitu mortal. Atentatlu fu revendicat di gruparia Stat Islamic. Theresa May dimandă alertă teroristă tru Regatlu Unit ti armâni la nivelu sever.

Justiţia dit România, tru menga Strasbourg şi Bruxelles

România ari ananghi di revizuirea ali legislaţie mutrindalui imunitatea şi criştearea a transparenţal’ei tru achiziţiili publiti tra s-poata s-alumta ma ghini contra ali corupţie la nivel guvernamental, spusi procurorul-şef al DNA, Laura Codruţa Kövesi, luni, Strasbourg, la una conferinţă a organismului anticorupţie a Consiliului ali Europa. Ea exighisi că imunitatea a miniştrilor lipseasti limitată la durata a mandatlui a lor, atea turlie ca anchetarea a atilos tra cari ari subei ti corupţie s-poată sa s-duca ma largu. Laura Codruţa Kövesi deadi exemplu a unui ministru tra cari ari subei că lo aproapea 45 di n’il’i di euro tra s-licsureadza darea a nascantor contracte tra nascanti firmi, ama ancheta fu ncl’isă tra atea că Parlamentul di Bucureşti nu aproba caftarea tra loarea a imunitatil’ei a alustui. Pe di altă parti, tut stămâna aesta, tru Legislativlu European s-tanu una moeabeti pi tema ali democraţie şi ali justiţie tru România, la discuţii hiindalui calisiţ Tudorel Toader, ministrul ali Justiţie, dit partea a Guvernului, ama şi membri ali societati civila. Discuţiile di Bruxelles s-tanura după ti Guvernul di stânga di Bucureşti avu tru minti tra s-alaxeasca legislaţia penală, dizincriminândalui parţial delicti, tra haierea a nascantor politicieni. Aesta scoasira tru migdani nai cama marli protesti di la cădearea a regimlui comunistu, tru andreu 1989.

Andamusea deadun a guvernilor di Bucureşti şi Chişinău

Guvernili ali Românie şi Rip. Moldova vitina (ex-sovietică, majoritar românofonă) tanura, gioi, Piatra Neamţ (nord-estul României), treia andamusi comună. Premierlu Sorin Grindianu declara că Bucureştiul ma largu va lu-agiută Chişinăulu tru proceslu di integrari europeana şi că România va tra s-l’ia parti la privatizarea a nascantor companii di stat dit Rip.Moldova. Omologlu a lui di Chişinău, pro-occidentalu Pavel Filip, deadi asigurari că Rip. Moldova mutreasti cătra Vestu şi ma largu va s-baga tru lucru Acordul di Asociere cu UE şi reformili ahurhiti. Discuţiile anamisa di atel’i doi oficiali s-tanura dupu ti, stămâna ti tricu, prezidentul ali Rip. Moldova, socialistul pro-arus Igor Dodon, fu, diznau, Moscova, iu reitera că acata tru isapi denunţarea a acordurlor di asociere şi liber-schimb cu UE şi ahandusearea a relaţiilor cu Uniunea Eurasiatică, cata cum şi federalizarea ali Ripublica Moldova, ca soluţie tra pacificarea a regiunil’ei separatista pro-arusa Transnistria (est).

Programlu di armatuseari ali Askeri româna aprobat di CSAT

Consiliul Suprem di Apărari a Vasiliil’ei aproba mandatlu cu cari României va s-duca la summitlu NATO di Bruxelles, di la bitisita a meslui mai. Tutunaoară, fu aprobată şi una turlie actualizată a Programlui di modernizari ali Armata, cari ari tru scupo transformarea, dizvoltarea şi armatusearea a aistei până tru anlu 2026. Apofasea yini tru condiţiile tru cari Apărarea lo anlu aestu, tru premieră, una alocari bugetară di 2 la sută dit PIB. Di altă parte, ambasadorul SUA Bucureşti, Hans Klemm, dimanda că România va s-hiba nicukira tru meslu alunar ti un exerciţiu militar di amploari, la cari va s-l’ia parti aproximativ 30.000 di soldaţ dit vasiliili membre NATO. Em tru plan bilateral, em şi tru interiorul a Alianţal’ei, relaţiile anamisa di militarl’ii români şi atel’i dit SUA suntu multu bune, adusi aminti diplomatlu american.

Protesti a lucratorloru CFR şi Poliţie

Traficlu di călători pi căl’iurli di her române agiumsi la normal după greva spontană di n’iercuri, cându cama di 150 di trenuri fura danasiti. Dupu negocieri cu administraţia, sindicatele di la CFR amintara taxearea că lucratorl’i va s-aiba tin’ii di cafi mes ma mari unaoara cu simnarea a naului contractu colectiv di lucru, tru apriliu. La CFR Călători fondul di salarii va s-crească cu 17% s-cama, iara la Infrastructură cu 22 di procente. Şi lucratorl’i dit Poliţie pichetara la Ministerul a Lucurlui, iara după discuţii cu autorităţile amintara, tru arada a lor, crişteri salariale. Ase, atel’i cari au tin’ia di cafi mes la nivel minim, di 1.450 di lei (cca.320 euro), va s-aiba crişteri ahurhiindalui cu 1 alunar, unaoară cu intrarea tru practico a naului nom tra tin’iili di cafi mes unitari. Reprezentantal’ii a sindicatilor cundil’eara că agenţal’ii şi ofiţerl’ii di poliţie cu funcţii di execuţie va s-aiba cristeri la tin’iili di cafi mes di 100% s-cama tru yinitorl’i patru an’i.

Autor: Mihai Pelin

Armanipsearea: Tascu Lala