Ma mărli evenimenti a stămănăllei ţi tricu 18.07 – 24.07.2021

Numirlu a cazurloru di SARS CoV-2 tru România tru creaştiri

Leyla Cheamil, 25.07.2021, 19:54

Numirlu a cazurloru di SARS CoV-2 tru România tru creaştiri

România nregistră, ñiercuri, cama di 100 di cazuri noi di COVID-19, tră pota oară după doi meşui tru cari media ndzuuă fu di 40 di lăndzidzări. Numiru a lăndzidzărloru di COVID-19 tru România spuni ună lişoară creaştiri, feaţi timbihi coordonatorlu ali campanie naţională di vaccinari, Valeriu Gheorghiţă. Uidisitu cu aestu, stămăna tricută, s-raportară cu aproapea 40% ma multi infectări andicra di stămăna di ma ninti. Aestă tendinţă di creaştiri s’nreghistreadză tru 20 văsilii europeani maxusu la tiniri. Tru România, numirlu a cazurloru ahurhi s’crească ditu 12 di alunaru.

Simfunu cu datili ditu platforma di prognoză europeană, s’estimeadză că, la bitisita a meslui tru România va s’nregistreadză până la 200 di cazuri năi ndzuuă. Tutunăoară, specialiştii estimeadză ună creaştiri a numirului di infectări cu naua lumaki Delta a coronavirusului, ama, toradioară, nu poati s’facă isapi cându va s’agiungă şi tru România dalga a IV a epidemiillei, cari zñiipseaşti ma multi craturi europeani. Tru ţi mutreaşti administrarea a unei a treia doză di vaccinu, lugursită di niscănţă experţă anănghisită tru cazlu a persoanilor cu imunitati scădzută, ministurlu a Sănătatillei, Ioana Mihăilă, spuni că s’aşteaptă urminiili a instituţiillei europeani axizită, ama sumliniadză că vaccinarea anti-COVID-19 tru schemă completă, asiguripseaşti protecţie contra a cazurlor severi şi a riscului di moarti.

Militarlli români ș-bitisiră misiunea tru Afganistan

Bitisita-a misiunillei ţi u avu Askerea Română tru Afganistan fu nsimnată, ñiercuri, pritu ună ţeremonie militară la Arcul di Triumf ditu capitală. Seflu a statlui, Klaus Iohannis, tiñisi hlamburili di alumtă a unităţilor participante la misiunile ditu teatrul di opearaţii şi a cundille tru zborlu a lui, curbanea faptă di militarill români şi di familiile aluştoru. Prezidentulu spusi că misiunea ali Askeri Română tru Afganistan va s’armână tru istorie ca nai cama lungă şi complexă operaţie militară di nafoara-a teritoriului naţional, după II-lu Polimu Mondial. Cama di 32.000 di militari ditu tuti categoriile di forţe loară parti la misiuni tru aestă văsilie. Protlu batalion arădăpsitu tru teatru tru cirişaru 2002, fu Batalionlu 26 Infanterie ditu Craiova, cu paranuma “Scorpioñilli Aroşi”. Tru teaturlu di opearaţii ditu Afganistan, cama di 200 di militari români fură pliguiţ, iara 27 ş-kirură bana. Tu bitisita-a misiunillei, s’turnară tru patridă tu sigurlăki 615 militari şi cama di 135 di tonuri di echipamente şi părmătii. Tutu cu tutu hărgili a participarillei ti Askerea ali Românie tru aestu teatru di operaţii sunt di 3 miliardi di lei ş-cama.

Raportu UE mutrinda statlu di dreptu

Raportul tu ţi mutreaşti statlu di dreptu tru văsiliili membre fu publicatu, marță, di Comisia Europeană. Tru cazlu ali Românie, concluziili spunu tu ma marea parti ti reformili tru dumenea ali justiţiei. S-agiumsi pi isapea că suntu tru lucru demersuri tră revizuirea a alăxerloru adusi tru legislaţiie tru perioada 2017-2019, tu ligătură cu găilipserli ţi li adusi dişcllidearea-a Secţiilei Speţială di Investigare a Infracțiunilor ditu Justiție, la condiţiile di admitere şi di pensionari a magistraţlor ică ti număseari a procurorlor di rangu analtu. Iniţiativa di ncllideari a Secţiei Speciale lipseaşti s’acaţă linia-a ndreptului european, spuni Comisia, cu pitriţeari la ună apofasi a Curtillei di Justiţie a Uniunillei tru aestă noimă. Easti adusă aminti şi ună apofasi a CCR cari statuă,tora ma ninti, că nomlu di thimelliu naţională ş-u prezervă poziţia ieararhic superioară atumţea cându giudicătorllii lipseaşti să s’raporteadză la ndreptul european. Tru raportu să spuni că, ase, nu s’tiñiseaşti prinţipiul a supremaţiillei legislaţiillei comunitare, iara aest lucru poati s’reprezintă un4 keadică importantă tră instanţe.

Agiutoru financiar tră giudeţili zñiipsiti di nicări, aprobatu di Guvern

Executivul di București aprobă aestă săptămână, darea aproapea 150 di milioane di lei tră 17 di giudeţi ditu România zñiipsiti di nicări şi arkiuşurări di locu tru proţlli şasi meşi a anlui. Apofasea di guvernu adoptată ahărdzeaşti păradz tră 243 di localităţi ditu 17 giudeţi cari afură zñiipsiti di fenomenele naturale extreme ditu ahurhita-a anlui şi până tru 15 di alunaru inclusivu. Ministurlu a Dizvultarillei, Cseke Attila, spusi că aesti fonduri va s’hibă ufilisiti ti znuearea-a a călliurloru giudeteani, a apunţăloru şi apuntiţiloru zñiipsiti. El nica spusi că fondurli cari va s’hibă ahărdziti ti znuearea a localităţloru nicati ahurhinda ditu 16 di alunaru va s’hibă tru ună altă apofasi di guvernu. Isapea a ploiurloru cabaoia mari ţi cădzură tu kirolu ditu soni spuni că dauă persoani muriră şi cama di 80 fură evacuate, aproape 200 di casi fură nicati, a deapoa tutu cu tutu 80 di localităţ ditu 20 giudeţi fură zñiipsiti. Alba (centru) easti giudeţlu iu s-feaţiră nai cama mărli zñii.

Ordonanță di ananghi mutrinda protecția contra a uriloru

Guvernul ali Românie aprobă ñiercuri, ună Ordonanţă di Urgenţă cari reglementeadză metodile di intervenţie ună ş’ună tră prevenirea și combaterea atacurlor fati di ursi contra a cetățenilor și a bunurlor u aluştoru tru intravilanlu a localitățloru. Ase, cara riscul easti ñicu, dimi ursa fudzi di om, aestu va s’hibă avinatu. Cara ursa nu fudzi di om, atumţea aesta va s’hibă tranchilizată ică relocat, a deapoa cara ursa atacă omlu ică prăvdzăli ditu nicukirati, el poati s’hibă tufikisitu. Documentulu spuni că sesizarea a cazurlor tru cari easti ananghi intervenţia s-faţi di iţi insu, pritu aşuirarea la numirlu unic di urgenţă 112. Ordonanţa di Urgenţă pruveadi şi amendză ma mări tră atelli cari va s’hărnească ursili.

România, la Agiocurli Olimpiţi di Tokyo

101 sportivi români, 46 di feati și 55 di ficiori, s’antrecu la 17 disţiplini la Agiocurli Olimpiţi di Tokyo, ditu 22 di alunaru și până tru 8 di agustu. Programati tu ahurhită tru veara-a anlui ţi tricu, Agiocurli Olimpiţi fură amânate cu un an ditu itia a pandemiillei. Antriţerli s’dizvărtescu fără public, tut ditu aestă furñîe. Turneul di fotbal debută, gioi, cu ună dzuuă nnti di marea dişcllideari. Naționala di fotbal Under-23 a Româniillei amintă cu 1-0 mecilu cu Honduras, la Kashima tru grupa B a turneului olimpic.

Autoru:Leyla Cheamil

Armânipsearea: Taşcu Lala