Ma mărli evenimenti a stămânăllei ţi tricu 16 – 23 yinaru 2022

Pandimia di COVID, pi trend ascendentu tu România

Corina Cristea, 22.01.2022, 18:11

Pandimia di COVID, pi trend ascendentu tu România

România a atins, tru aestă stămăna, recordul absolut di cazuri di COVID-19 nreghistrati tru 24 di oari – raportarea di gioi spusi cama di 19000 di lăndzidzări, ma multu andicra di iţi dzuuă ditu dăldzăli di ma ninti. Mortalitatea asociată SARS – Cov-2 easti, ama, tru prezent di până la dzaţi ori ma ñică andicra di sumedru, cându s’nregistra un numir aproapi idyealyui di mari di cazuri. Intereslu tră vaccinare easti ma largu multu ñicu, ama relativ constantu, cu circa 4000 di persoane ţi feaţiră prima doză ndzuuă. Până tora, pisti 8 milioane di români feaţiră nai puţănu ună doză, rata di imunizare a populaţiei eligibile di pisti 12 ani hiinda di 47,5% – dimăndă, gioi, prezidentulu coordonatorul a campaniillei di vaccinare, yeaturlu Valeriu Gheorghiţă.Tu aestu kiro, ministrul a Sănătatillei, Alexandru Rafila, cundille că tru şcurtu kiro va s’hibă disponibil şi tru România tratamentul antiviral inovativ. Tru spitale, rata di ocupare a apaturilor destinati a paciențăloru COVID easti di 22%, aşe că școlliurli pot ta ş-ducă ninti activitatea tru clase, stămăna yinitoare.

Grevă di avertismentu tru nvițământu, grevă tru transportul di suprafață di București

Sindicatele ditu nviţămintulu românesc năpoi ahuhriră protestili, prit ună grevă di avertisment di două săhăţ. Angajaţlli ditu Educație caftă a Guvernului ta s’da tiñiili di cafi mesu di bază pruvidzuti tru unu nomu ditu 2017, ţi spuni că lipsea s’lă si da nica di aoa şi doi añi ună crişteari a tiñiiloru di cafi mesu di 16%. Sindicaliştilli caftă nica şi alocarea 6 procente ditu PIB tră finanţarea a Educaţiillei, vor s’lă si da sporurli tră condiţiile di lucru, s’hibă păltiţ tră oarile suplimentare, ama şi s’hibă criscutu numirlu di posturi didactiţi. Ministrul ali Educaţie, Sorin Cîmpeanu, lugurseaşti căţe căftărli suntu pertinente, ama feaţi apelu la akicăsearea a profesorilor, cu ahât ma multu cu cât procesul di nvițare easti di multu kiro zñiipsitu di itia a contextului epidimiologic. Nu maş profesorlli nkisiră aestă stămăna protesti. Niifharistusiţ că nu lă criscură tiñiili di cafi mesu șoferlli autobuzelor, troleibuzelor şi tramvaielor ditu capitală nkisiră ună grevă generală, acţiunea lor zñiipsinda suti di ñilli di bucureşteni.

Noi misuri tră scădearea a facturilor la energie

Ceareia a guvernului di București tră păhadzlli mări la facturli di energhie acaţă dauă călliuri – plafonlu va să scadă, a deapoa limita di consum va s’crească. Misurli tră populație și firme fură tu akicăsearea nolgica di coaliția aflată la guvernari și va s’bagă tu lucru di la 1 di şcurtu până la 31 di marţu. La energie plafonlu va s4 scădă -păltirădi la 1 leu la 0,8 lei per KW, tru kirolu anda limita a consumlui tră cari s’faţi isapi ti aestu păhă va s’crească di la 300 la 500 di KW. Tră IMM-uri, păhălu va s’hibă plafonat la 1 leu per KW. La gaz, plafonlu va să scădă di la 0,37 la 0,31 lei per KW, iara limita di consum tră ţinţi meşi di dzăli va s’crească di la 1.000 la 1.500 KW. Tutunăoară, facturile cari fură emise alătusitu năpoi va s’hibă recalculate, tru idyiulu kiro hiinda interzisă debranșarea ică aplicarea di penalităț ti aţelli cari nu ș-păltiră facturile. Misurli va s’hibă promovate pritu ună ordonanţă di urgenţă, cari va s’hibă aprobată stămăna yinitoare.

Planlu național di combăteare a harkinlui

București, fu lansat Planlu Naţional di Combăteare a Harkinlui, cari fixeadză obiective realiste şi misurabile, spuni unu imnaticu standardizatu a pacientului şi bagă accent pi ancurayearea şi finanţarea suplimentară a investigaţiilor medicale. Tru şcurtu anlu tricut, Comisia Europeană lansa Planlu European di Combatere a Harkinlui, cari alocă 4 miliardi di euro tră finanţarea a programelor di prevenţie, cercetare şi yitripseari năuntrulu a Uniunillei. Cama deapoa, tru România s-adră un grup di lucru cari avu tu mengă transpunerea tru legislaţia românească a planlui european. România ari tru aestu kiro un program naţional di harkinu la Casa Naţională di Asigurări di Sănătate, prin cari sunt decontate ună parte ditu tratamente şi analize, ama şi ndauă programe di prevenţie la nivelu a Ministerului Sănătatillei. Prezidentulu Klaus Iohannis cundille că, tru aestu kiro, ari oportunitatea, ama şi hălăţli tră minduearea diznău a sistemului di sănătate, vulnearabilizat prin ixikea di investiţii uidisiti kiro di ndauă dekenii.

România, tru ecuația Rusia-NATO

Prezidentulu Klaus Iohannis salută, gioi, hăbarea di tahini a omologlui american, Joe Bidenu, mutrinda crişteaarea a prezenţăllei militare americane tru România, pi flancul di est al NATO, cara situaţia di securitate s’aspardzi. Parteneriatlu strategic România-SUA şi solidaritatea NATO sunt multu vărtoasi – ngrăpsi, pi Twitter, Klaus Iohannis. El declară, tutunăoară, că parteneriatlu strategic România-Franța va s’hibă anvărtuşitu tru regiunea Amarea Lae, după hăbarea a omologlui francez, Emmanuel Macron, mutrinda disponibilitatea a Franţei ta s’llia parti la prezenţa militară anvărtuşită a NATO tru România. Hăbărli yin utu unu kiro di mintireaşi tru estul Europii, iu Rusia arădăpsi cama di 100.000 di militari la sinurlu cu Ucraina, căftănda garanții că NATO nu va s’tindă cătă apirită și ritrădzearea askeriloru ditu stataili membre a Alianțăllei aflate tru est, văsilii ntră cari easti și România.

Asistență tehnică și financiară tră Republica Moldova

Guvernul di București aprobă memorandumul pi thimellilu a curi România va s’poată s’daa ma largu asistenţă tehnică şi financiară cătră Republica Moldova (ex-sovietică, majoritar românofonă) tru ma multe domenii, tră s’lli-andrupască imnaticlu european. Easti ună apofasi importantă și di ananghi, tru condițiile tru cari preţedentulu Acord di aestă turlie, semnat la 27 di apriliu 2010, işi ditu practico la 28 di marţu 2021. Prin apofasea di tora di București, practic s-deadi undă veardi tră negocierile și simnarea a unui nou acord mutrinda implementarea a programului di asistenţă tru thimellilu a unui agiutor financiar tru valoari di 100 di milioane di euro.

Autoru: Corina Cristea

Armânipsearea: Taşcu Lala