Ma mărli evenimenti a stămânăllei ţi tricu 06.02 – 12.02.2022
Pandemia bate tru ritradzeari?
Roxana Vasile, 13.02.2022, 11:05
Pandemia bate tru ritradzeari?
Tru yinitoarili 3-4 stămăni, numirul a lăndzidzărloru di Covid va să scada tru România, iara incidenţa va s’hibă aprukeată di un caz la ñillea di bănători, feaţi isapea, stămâna aesta, ministrul Sănătatillei, Alexandru Rafila. El spusi că tru aţel moment va să zburască ti relaxarea etapizată a misurilor sanitare nica şi trădzearea mănă di la niscanti di eali, cum easti certificatul digital. Alliumtrea purtarea-a prusupidăllei tru spaţiile ncllisi va s’armănă tu lucru. Un punctu di referinţă easti data di 7 di marţu, când expiră prilundzirea a catandisillei di alertă și cându va s’llia ună apofasi andicra di evoluţia indicatorilor pandemiţ. După 1 di şcurtu, tru mplină dalgă 5, cându s-nregistră un record di infectări – pisti 40 di ñilli – numirul aluştor scădzu constantu. Ministrul Rafila adusi aminti şi importanţa vaccinarillei, maxusu tru cazul persoanelor vulnerabile. Di la debutlu a campaniillei, pi 27di andreu 2020, aproapea 8,1 milioane di români loară nai ma pţănu ună doză di vaccin, dimi aproximativ 50,5% ditu populaţia adultă, iara ditu populaţia generală circa 42%.
Minări di askeri tru sud-estul a Europăllei
România beneficiadză, ca membru al NATO şi ca partener strategic al SUA, di tute garanţiile di securitate di cari ari ananghi, tru contextul a naima greauăllei criză după cădiarea a Pirdelui di Heru – diclară prezidintulu Klaus Iohannis, cari vizită, vineri, diadunu cu secretarul general al NATO, Jens Stoltenberg, Baza 57 Aeriană di la Mihail Kogălniceanu, ditu sud-estul a Româniillei. Aclo, tru stămăna ţi tricu, agiumsiră elemente di tehnică militară ale ditaşamentului pi cari SUA lu pitricu ca parte a agiutorlui tră aliaţllii NATO ditu Europa di Est, date hiinda mintireaşili anamisa di Rusia și Ucraina. Aproximativ 1.000 di militari americani suntu dislocaţ tru România. Elli s’adavgă la aţelli a soţloru a loru, cama di 900, ţi suntu di ma ninti,pi teritoriul românesc. “Pi tutu flancul estic, di la Amarea Lae până tru zona baltică, NATO lanseadză askeri și capacităţi militare suplimentare” – spusi Jens Stoltenberg, cari, tru numa Alianțăllei, c4ftă ali Rusie s’dizescaladiadză situația şi s’aibă un dialog tru bună credinţă. “Noi arămânem pregătiţ tră ună soluţie politică. Tru idyiulu kiro, himu vărtoşi, vigilenţă şi uniţ.” – cundille șeful NATO. Gioi, prezidentulu Klaus Iohannis v izită și sediul a Brigadăllei Multinaţionale Sud-Est di Craiova (sud), ţi ari scupolu s’anvărtuşadză catandisea di discurajare şi apărare a NATO tru regiunea ali Amarea Lae şi pe flancul estic. Ucazie tră șeflu a statului s’li salută apofasili di dată recentă ale SUA şi Franţă mutrinda prezenţa a lor militară tru România. Klaus Iohannis lansă invitaţia și cătrî alte stati aliate ta s’acaţă tu isapi şi s’contribuie cu forţe la structurli multinaţionale di pi teritoriul a Româniillei.
BNR intervine tră s’dănăsească inflația
România va s’aibă ună creaştire economică di 4,2% anlu aestu şi di 4,5 tru 2023, uidisitu cu previziunili economiţi di iarnă ale Comisie Europeană. Cum va s’agiungă s’ampulisescu, ama, cu nai marea inflație ditu 2005, iara tendința a llei easti di creaștere. Nai ma mări scunkiri suntu la gaz (pisti 50%) și la energie electrică (28%). Cum, uidisitu cu isăkili a Băncăllei Centrale, inflația va s’agiungă la un numir cu dauă ţifri tru şcurtu kiro, tru scupolu ti temperari, BNR criscu până la 2,5% tru an dobânda di politică monetară, prima consecinţă hiinda că va s’crească tocurli la mpărmuturli tru lei, va s’ñicureadză consumul, iara creaştirea economică va s’ayălisească. Aesti hărgi suntu, ama, acceptabile, spun specialişti economiţ, tră dănăsearea-a inflațiillei, inamiclu public numirlu 1 a primăllei giumitati a anului.
Ministrul Energiei ascapă di moțiune
Sertu criticat tră turlia tru cari kivernisi actuala situație ditu Energie, ministrul liberal Virgil Popescu lipsea s’tănă keptu, stămâna aasta, a unei moțiuni simplă pi cari Uniunea Salvaț România, tru opoziție, u dipusi tru Camera a Diputațlor. Pi şcurtu, USR califică ca hiinda dizastruoasă kivernisearea-a crizăllei facturilor la energie, diciziile a ministrului Popescu periclitânda, tru opinia Uniunillei, securitatea energetică a Româniillei. Dizbaterea moţiunillei simplă, programată tră luni, fu, ama, suspendată după ţi lidirul a diputaţilor naționaliști ditu AUR, George Simion, lu pimsi pi ministrul Energiei tru kirolu anda ufiţiaalu zbura la tribuna Camerăllei. Ședinţa fu riloată, ama dizbaterile s-dizvărtiră maş cu diputaţllii USR, AUR şi niafiliaţ, tru absenţa, tru semnu di protestu, al Virgil Popescu și a reprezentanţilor PSD, PNL și UDMR, la puteare. Moțiunea nu tricu. Alliumtrea, reprezentanţii a partidilor aflate la guvernare alăxiră regulamentul a Camerăllei Diputațlor, ase câ parlamentarllii cari au un purtaticu nitiñisitu tru kiorlu a şedinţelor di plen s’poată s’hibă sancţionaţ cama sertu. AUR şi USR spusiră că va s’sesizeadza Curtea Constituțională, di itia că alăxerli aduc zñie ti transparenţa activitatillei parlamentare.
Agiutoru românesc tră Republica Moldova românofonă
Șednţă comună, viniri, la Chișinău, a Guvernilor ali României şi ali Ripublică Moldova, ucazi tră simnarea ma multi acorduri di coopearare tru domenii cum energie, educaţie ică infrastructură! Vidim Chişinău nai ma marea dişclldiare nregistrată vărăoară tru relaţia cu Bucureștiul – cundille premierul român, Nicolae Ciucă. Tu arada a lui, șefa a Executivului moldovean pro-european, Natalia Gavriliță, vidzu tru şedinţa comună un simbol, pritu agenda a llei cabaia ambiţioasă tru hăirlăticlu a cetăţenilor ditu dauli state.Bucureștiul va s’da a Chişinăului fonduri di 100 di milioane di euro asistenţă financiară nirambursabilă. Ntră altele, va s’hibă construite reţele di apă şi canalizare şi va s’hibă reabilitate instituţii di nviţământu şi di cultură. Va s’hibă construită și ună nauă apunti pisti arâul Prut, cari va s’integreadza tru yinitorlu sistem di autostrădz ditu România. Tutunăoară, ateali dauă părţă va s’colaboreadză tra s’evalueadza, prevină şi s’kivernisească situaţiile di criză tru aprovizionarea cu energie şi gaze naturale.
Autoru: Roxana Vasile
Armânipsearia: Taşcu Lala
