Ma mărli evenimenti a stămănăllei ţi tricu 05.09 – 11.09.2021
Criză guvernamentală di București
Daniela Budu, 13.09.2021, 12:41
Criză guvernamentală di București
Moţiunea di cenzură nkisită di USR PLUS, fostu numirlu doi tru coaliția guvernamentală, deadunu cu AUR, opoziţia ultranaţionalistă, contra a guvernului cumăndusitu di liberalu Florin Cîţu, fu ghivăsită gioi tru plenlu a Parlamentului di București, tru ună andamusi di licru cabaia apreasă. Textul a documentului ari tu amprotusa investiţiili, sănătatea, educaţia şi infrastructura. Aţeali dauă partidi fac timbihi că România easti cumăndusită di un guvern ţi nu ari andruparea a majoritatillei parlamentarăe şi di un premier ţi ari tru scupo competiţia internă ditu partid. Dezbaterea şi votlu a moțiunilli va si s’facă după ţi Curtea Constituţională va u spună minduita tu ligătură cu sesizarea a premierlui mutrinda existenţa a unui conflictu juridic anamisa di Legislativ şi Executiv. Prezidentulu a Camerăllei a Deputatlor, liderlu liberal Ludovic Orban, aflat tru competiție cu Florin Cîțu tră șefia a PNL, lugurseaşti că apofasea di amânari a călindarillei di dezbatere și votare easti niconstituţională. Tu arada a llei, prezidenta a Senatlui, Anca Dragu, ditu partea USR PLUS, spuni că liberalii ufilisescu tuti tertipurli tra s’ambudyiusească dezbaterea şi votlu ti moţiunea di cenzură. Prim-ministurlu declară că va s’caftă demisia a prezidenţăloru a aţiloru dauă camiri cara apofasea a CCR ti sesizarea a llei va s’hibă favorabilă. Aduţemu aminti că USR PLUS dipusi moțiunea di cenzură după ţi Florin Cîțu lu scoasi di pi ipotisi ministurlu useristu ali justiţie Stelian Ion. Cama deapoa, miniștrii USR PLUS demisionară, iara secretarllii și subsecretarlli di stat, cum și prefecțălli și subprefecțălli ditu partea aliştei formațiuni fură scoşi di pi ipotisi.
Vizita a prezidentului ali Românie tru Elveția
Aflat tru vizită ofiţială tru Elveția, seflu a statlui Klaus Iohannis spusi, gioi, anda adusi zborlu ti catandisea politică di Bucureşti, că situația guvernamentală nu easti ici găilipsitoari. Tru cadrul a andamusiloru cu omologlu a lui, Guy Parmelin, cari s’ţănură cu furñia a yiurtusearillei 110 añi di la ndridzearea a ligăturlor diplomatiţi bilaterale, caplu statlui român adusi aminti că tru România ari investiţii elveţiene multu importanti şi di mari sucţesu și lugursi că aestu trendu va s’ducă malargu. Tutunăoară, prezidentulu Klaus Iohannis ălli haristusi a omologlui a lui elveţian tră andupimintul ţi văsilia a lui u da ali Românie tru atea ţi mutreaşti aderarea la OCDI. Tu arada lui, prezidentulu elveţian spusi că ateali dauă văsilii au multi puncti di videari comune şi furñii di elpidhă. Ufiţialli avură muabeti, tutunăoară, ti educaţie, securitate cibernetică, cercetare şi inovare, iu ari un potenţial di colaborare multu bunu.
Andamusea Anuală a Diplomațiillei Române București
Andamusea Anuală a Diplomaţiei Române s’ţănu tru format hibrid, kiro di trei dzăli, Bucuresti, cu unu şingiru di sesiuni plenari găzduite şi moderate di ministrul di externe Bogdan Aurescu. Temele zburăti eara, ntră altele, provocările di securitate actuale, rezilienţa tru timpul pandimiillei şi anvartuşearea-a cooperarillei anamisa di parteneri. Să zbură şi tră rolul Româniillei tru perspectiva a Conferinţăllei mutrinda Yinitorlu ali Europa şi elementele di reformă consulară dirulate la nivelul MAE tu anlu ditu soni, deadunu cu misurli avute tru videală ma largu pi aestă comată. Oaspiţ speciali eara ministurlu a afacerilor externe al Greciei, Nikos Ditudias, şi Secretarul Genearal al OSCE, Helga Schmid. Caplu diplomaţiei române a sublinie emergenţa a nascantoru noi provocări di securitate ahatu tru regiune, cât şi tru lume, iara ministrul grec diclară că solidaritatea easti esenţială tru abordarea fuvirserloru transnaţionale. Tu arada a lui, Secretarul General al OSCE sumlinie că diplomaţia multilatearală easti goala soluţie viabilă tru gestionarea eficientă a fuvirserloru actuale di securitate. Calisitu special la reuniune eara și ministrul di Externe ali Republica Moldova, Nicu Popescu. Republica Moldova (ex-sovietică, majoritar românofonă) şi vecinătatea estică s’confruntă ma largu cu presiuni di tuti tipurile ditu exterior, declară Bogdan Aurescu. Ministrul moldovean exighisi că vasilia a lui s-ampulisi tru añilli ditu soni cu ună creastire a corupţiillei şi ună slăgheari a statlui şi a instituţiilor a lui, ti aţea rezilienţa scădzu, inclusiv dinintea a efectelor di tuti turliili a pandemiillei.
România – tru dalga patru apandemiei di COVID-19
România nastricu aesta stămână pragul di două ñilli di infectări cu COVID-19 tru 24 di oari. Criscu și numirlu a decesilor la ndaua dzăţ ndzuua, iara la Tearapie Intensivă suntu tutu cama mulța pacienți infectați. Specialiștii tru sănătate spun că vasilia easti tru patra dalgă a pandimiillei di COVID-19 și recomandă, diznou, tiñisearea meatrili di protecție sanitară și imunizarea. Românii nu s’ayuñiusescu, ama, ase că anvalearea vaccinală anti-COVID la nivel naţional, ditu populaţia rezidentă eligibilă di pisti 12 ani, easti di circa 31%.Până tora, cu schema completă fura imunizate circa 5,2 miliuni di persoane. Potrivit Institutului Național di Sănătate Publică, pisti 80% ditu cazurile di COVID-19 nregistrate stămâna ti tricu fura tru cazlu a persoanelor nevaccinate.
Tutunaoară, aproapea 93% ditu dicesele nregistrate fura la persoane neimunizate, iara 5% la persoane vaccinate cu schema incompletă. Autorităţile dimandara că s’fac eforturi tră creaştirea a apaturilor di la Tearapie Intensivă și, tutunaoară, că va s’ndreaga centre mobile di vaccinare, maxusu tru satele iu nu ari yeaţră duri. Idyea va s’faca şi tru campusurile universitare, iui studentalli va s’aiba posibilitatea să se imunizeadza. Tră nvățământul preuniversitar, cursurile va s’ahurheasca luni, pi 13 yismaciuni cu elevii tru băntă, iar autorităţile spun că şcolile va s’arămână discllisi ahât kiro cât rata di infectare tru una localitate nu treati di 6 la nille. Tru aestu kiro, starea di alertă fu diznou, prilundzită cu 30 di dzale, ama guvernul nu intenţionează s’yină cu misuri restrictive suplimentare, spusi secretarul di stat Raed Arafat.
Gioi, Comitetul Naţional tră Situaţii di Urgenţă actualiză lista a statiloru cu riscu mari tră cari s’caftă intrarea tru carantină a persoanelor cari s’toarna tru România, listă cari va s’intra tru lucru ditu 12 yismaciuni. Ntra altele, Bulgaria intră tru zona aroșie, iara Germania tricut ditu zona verdi tru atea galbină. Aţelli vaccinați contra a COVID-19 nu lipseaşti s’şeadă tru carantină ma s’yină ditu zone aflate pi lista galbină i pi aţea aroșe.
Autoru:Daniela Budu
Armânipsearea: Taşcu Lala
