Eveniment top – 9.05.2015
Roxana Vasile, 12.05.2015, 10:44
Volta a premierlui român, Victor Ponta tu patru vâsâlii dit zona a Golfului
Caplu a guvernului român, Victor Ponta, fu, ti aproapea unâ stâmânâ, t-un turneu tu Arabia Saudită, Qatar, Kuweit şi UAE, ta s-creascâ ligâturli politiţi şi icunumiţi.
Victor Ponta câtâpâţi sâ-i facâ pi aţei cu cari zburâ că lipseaşti s-adarâ emburlâchi cu România. La Ryadh, iu fu aştiptat di vâsâi’elu Salman, premierlu pricunuscu că România lipseaşti s-aibâ soţ di ca Arabia Saudită, cari s-investeascâ tu agriculturâ, construcţii, turismu di turlii medicalâ icâ industria di afireari.
Tu Qatar, moaubeţli cu ofiţialii di Doha mutrirâ, anamisa di alti lucri, un parteneriat ti alâxearea ali companii aerianâ româneascâ Tarom şi împrustarea a Aeroportului Otopeni di Bucuresti, nai ma marli dit vâsâlii. Aestu lucru fu zburât ş-tu UAE. Kuweit, pitu moaubeti furâ ş-proiecti tu domenii cum suntu agricultura, sânâtatea, IT şi infrastructura energheticâ.
Vizitâ a ministurlui di Externi, Bogdan Aurescum tu Ungaria vţinâ
Caplu ali diplomaţii di Bucureşti, Bogdan Aurescu, s-aspusi amvirinat că România şi Ungaria nu amintarâ s-bitiseascâ protocolu ţi mutraşti agiutorlu, afirearea a minorităţlor.
El dusi, Gioi, t-unâ vizitâ Budapesta, iu şidzu moaubeti cu ofiţalii ungari tu ţi mutreaşti ligâturli dintrâ vâsâlii, maxus tu domenea icunumicâ. Bogdan Aurescu: Zburâm ti baia subiecti, ahurhindalor di la aţeali mutrinda dauli vâsâlii, cu acţentu pi problema a bitisearâl’ei a Protocolului a Comitetlui bilateral mixtu mutrinda minorităţli naţionali, pânâ la lucri mutrinda icunumia – cari ahurhescu di la aţea că România şi Ungaria aveau alâxeari comerţiali di cama di 7,3 miliardi di euro tu-anlu ţi tricu.
Aurescu s-andamusi ş-cu reprezentanţâl’ii dit comunitatea româneascâ dit Ungaria a curi lâ deadi asiguripseri disnău tu ţi mutreaşti andruparea a autorităţlor di Bucureşti ti pâstrirea şi duţearea ninti a identitatâl’ei a lor etnicâ, lingvisticâ, culturalâ şi religioasâ.
Apofasi di politicâ monetarâ al Bancâl’ei Naţionalâ ali Românii
Banca Naţionalâ ali Românii n’icuşură, N’iercuri, disnău, la un minim isturic, la 1,75% pi an di la 2%, dobânda di referinţâ, ama şi rezervili minimi zorlea ti pasivili tu lei, di la 10 la 8%.
Aesti meatri nu earau aştiptati di pâzarea bancarâ. Nai ma mulţâl’ii dintrâ analişţâ minduiau că Banca Ţentralâ va s-ţânâ pi un chiro cama lungu nivelu di 2 proţenti pi an a dobândâl’ei di referinţâ, uidisit u inşita a meslui Marţu.
Tu minduita a guvernatorlui BNR, Mugur Isărescu, n’icşurarea a dobândâl’ei di politicâ monetarâ vini, prota, ti aţea că inflaţia armâni la niveluri multu scâdzuto, iara n’icşurarea TVA la mâcări, la 1 di Cireşar, di la 24 la 9%, va s-ducâ la unâ inflaţii apruchiatâ di 0 tu yinitorl’ii 12 meşi.
El exiyisi că, prit aesti apofasi, BNR caftâ s-creascâ activitatea di creditari t-unâ turlii cari s-andrupascâ ş-criştearea icunumicâ şi, tu idyul chiro, s-ţânâ dobândzâ dealihea pozitivi tu depozitili bancari. Specialişţâl’ii spun ca ti unâ crişteari a creditarâl’ei easti di mari simasii un mediu di afaceri bun, cama caldu, ş-nu unâ dobândâ di referinţâ scâdzutâ.
Bâgarea tu practico tu Românii a sistemlui a cardurilor di sânâtati dusi la baia ancâceri şi anvirinări
Di la 1 di Mai, tu Românii, cardul di sânâtati agiumsi golu instrumentu di decontari a serviţiilor medicali dit pachetlu di timeliu ti persoanili cu asigurari, tricuti di 18 an’i.
Minduit ca s-lişureadzâ proţeslu di asistenţâ medicalâ dit Românii, intrarea tu practico aluştui sistem minti pi tutâ lumea. Problemi furâ ahât la validarea cardului, ama, maxus, la ampârţarea câtâ oamin’i a aluştui instrumentu.
Tu aesti dit soni dzâli, suti di n’ii di asiguraţ nica nu aveau apruchiatâ cardurili, iar aţei ţi-s dusirâ cu eali la yeatur, aştiptarâ baia ta s-hibâ activati. Reprezentanţâl’ii a Casâl’ei Naţionalâ di Asiguripseri di Sânâtati dzâc, chiola suntu ahât multi problemi, că programlu easti bun, imnâ ghini – pânâ tora, hiindalor activati 5 milioani di carduri dit aţeali cama di 13,6 milioani.
Uidisit cu CNAS, problemili inşirâ ti aţea că unâ parti dit furnizorl’ii di serviţii medicali ufilisirâ ti prota oarâ cardul, chiola avurâ un chiro di anviţari CNAS adusi aminti că asiguraţl’ii fărâ cardu şi copiii au nica îndreptul, la serviţii medicali. Tu idyul chiro, aţei fârâ asigurari, s-hârsescu, ca pânâ tora, di pachetlu minim di serviţii medicali.
Deputaţl’ii român’i apruchiarâ proiectul mutrinda alidzerli locali
Udălu a Deputaţlor di Bucureşti apruchie, N’iercuri, proiectul mutrinda Nomlu a alidzerilor locali, cari mutreaşt alidzearea : a primarilor maşi dit un gol tur di scrutin, a prezidentului a Consiliului giudeţean di consilierl’ii giudeţen’i şi ţânearea a praglui electoral di 5% ti partidili politiţi.
Proiectul, apruchiat ş-di Senat, mai caftâ ca un cetăţean al UE s-poatâ s-candideadzâ, la yinitoarli alidzeri locali, şi ti ipotisea di primar, pânâ tora avândalor îndreptu maşi ti ipotisili di consilier local şi giudeţean.
Ascultaţ aoa –>
Armânipsearea: Cristina Mina
