Eveniment Top – 7.05.2016

Tu Românii ahurhi campania si turlii electoralâ ti alidzerli locali

Corina Cristea, 16.05.2016, 15:34

Tu Românii ahurhi campania si turlii electoralâ ti alidzerli locali

Tu Românii, pi 6 di Maiu, ahurhi campania ti alidzerli locali dit 5 di Cireșar — protlu prag electoral dit anlu aestu ti suțatili politiți. Campania va s-bitiseascâ pi 4 di Cireșar, iara primarl‘ii va s-hibâ alepțâ mași tu un tur. Va s-l‘ia parti suțatili politiți ghinicânâscuti – PSD, PNL, UDMR, ALDE, UNPR, PMP, ama şi baia partidi năi, tu sinfuniili tu cari, uidisit cu nomlu a partidilor, ahurhindalui dit 2015 pot s-hibâ adrati partidi cu trei membri.

Easti treia oarâ tu isturia di dupu Andreu 1989, cându un guvernu tehnocrat andreadzi alidzerli tu Românii, dupu ațel cumândisit di Theodor Stolojan tu chirolu 1991-1992 şi ațel cumândisit di Mugur Isărescu, tu 1999-2000. Ti alidzerli di meslu ți yini, suntu andreapti cama di 18.000 di secţii. Ministurlu di Interni, Petre Tobă, da asiguripseri că acţiun‘ili di andridzeari a alidzerilor s-dizvârtescu uidisit cu calendarlu aleptu.

Sânâtatea dit Românii, tu mutrita a autorităţlor

Premierlu Dacian Cioloş îi câftă a ministurlui ti sânâtati, Patriciu Achimaş Cadariu, s-aflâ cât ma ayoniea cum s-andreagâ un laborator cari s-mutreascâ substanţili ufilisiti ti dezinfectarea tu spitali, hâbârisi purtâtorlu di cuvendâ a Guvernului, Dan Suciu. El dzâsi că easti borgea a ministerlui şi a întreglui executiv s-asiguripseascâ imnarea bunâ a sistemlui di sânâtati dit Românii.

Aesti zboarâ yin dupu tuti controalili adrati tu spitali dit Românii dupu unâ investigaţii jurnalisticâ cari aspusi că substanţili a protlui producător şi furnizor di dezinfectanţâ ti spitalili româneşțâ au unâ concentraţii multu ma scâdzutâ andicra di ațea ți easti anyrpsit. Controlu a autorităţlor tu 300 di spitali dit Românii arătă, ama, că tu 95 tru sutâ dit cazuri, dezinfectanţâl‘ii ufilisiț di yeațârii şi asistențâ suntu bun‘I, iara ministurlu ti sânâtati da asiguripseri că oamin‘ìi nu au câ țe s-aibâ gaile tora. T-un raportu adrat tu anlu 2014 di Țentrul European di Prevenții şi Control al Bolilor, România easti pi protlu loc mutrinda bacteriili dit spitali și rezistența a lor la iți tratamentu.

Nău ministru la Culturâ

Andridzearea a catandisl‘ei di la Opera dit Bucureşti şi afirearea, protecția a patrimon‘iului naţional – sunt îndauâ dit protili lucri ti mutreari ti năulu ministru roman ti culturâ. Corina Şuteu dzâți că va s-ducâ ninti tu mandatlu a lui cu moaubetea cu sectorlu independentu şi cu soțietatea țivilâ şi caftâ s-hibâ cama atentâ la instituţiili publiți di culturâ.

Cându aestâ dit soni intră pi ipotisi, prezidentul Klaus Iohannis îi dzâsi că va s-l‘ia ministerlu tu un chiro baia greu, cându aștiptărli suntu multu mări. Numânâsearea ali Corinâ Şuteu vini dupu ți premierlu Dacian Cioloş lu scoasi di pi lucru pi ațel di ma ninti ministru, Vlad Alexandrescu, giudicat ti turlia cum cumândisi scandalu di la Opera Naţionalâ di Bucureşti, iu, tu mași un mesu, furâ trei directori. Corina Şuteu fu secretar di stat tu Ministerlu di Culturâ şi director la Institutlu Cultural Român di New York.

Apofasi tu PSD

Scutearea al Valeriu Zgonea di pi ipotisea di prezidentu a Udălui a Diputaţlor fu amânatâ și lipseaști s-hibâ azburâtâ la yinitoarea andamusi. Zgonea dzâți că scutearea a lui di pi ipotisi easti paranom și aduți căbati a soțial-democraţlor că vor loclu a lui ti interesi personali şi di grup. Valeriu Zgonea fu ma ninti scos dit PSD, la șcurtu chiro dupu ți-l giudică pi liderlu soțial-democrat, Liviu Dragnea, cari nu vru ș-iasâ di pi ipotisea dit partid chiola fu condamnat la doi an‘i di hapsi cu suspendari ti fraudâ di turlii electoralâ tu dosarlu mutrinda referendumlu dit 2012 di scuteari di pi ipotisi a prezidentului Traian Băsescu.

Vizita a comisarlui european Corina Creţu

Hiindaei t-unâ vizitâ tu Românii aesti dzâli, comisarlu european ti politicâ regionalâ, Corina Creţu, dzâți că Bucureştiul lipseaști s-creascâ ritmul di luari a pâradzlor europen‘i, tu sinfuniili tu cari nu hârgiui niți un euro dit pâradzl‘ii daț ti chirolu 2014-2020.

Ofițialu european dzâsi şi că tu ți mutreaști ufilisearea a pâradzlor di coeziuni daț a câsâbadzlor dit România şi ti cari chirolu s-dusi pânâ tu meslu Cireșar, easti ti prota oarâ tu isturia ali UE cându unâ parti dit buget va s-hibâ cumândisit direct di câsâbadz. Uidist cu vițepremierlu Vasile Dâncu, Guvernul lucreadzâ la lișurarea a proțedurilor ti luarea a fondurilor comunitari, iara tu an‘ii ți yin, România poati s-aibâ unâ explozii dealihea mutrinda luarea di pâradz europen‘i.