Eveniment top – 6.06.2015
DNA apufusi pusputearea penala andicra di premierlu Victor Ponta.
Mihai Pelin, 06.06.2015, 16:28
DNA apufusi pusputearea penala andicra di premierlu Victor Ponta.
Premierlu român, Victor Ponta, declara că nu va s-da dimisia, aşi cum l’i-avea caftata prezidentul Klaus Iohannis, după habarea a Direcţiil’ei Naţionale Anticorupţie că caplu guvernului easti pusputit penal. Seflu a statlui a spusi că easti una situaţie imposibilă tra România ca primlu ministru s-hibă stipsitu şi feati timbihi că lucrul nai ma arău tra vasilie poati s-hiba fitrusearea a unal’ei criză politică. DNA dimanda, vineri, că premierlu şi liderlu PSD Victor Ponta, la data a faptelor avocat, easti pusputit penal tra fals tru nscrisuri sum semnătură privată, complicitati la evaziuni fiscală tru formă continuată şi larea paradzlor tru dosarlu di corupţie di la companiile energhetiti Turceni şi Rovinari(sud) mutrindalui simnarea a nascantor contracte di asistenţă juridică. Tru idyea cauză, procurorl’i agiumsira pi isapea că easti ananghi dutearea ma largu a pusputearil’ei penala andicra di Victor Ponta şi tra conflictu di interesi, tru ligătură cu funcţia a lui di prim-ministru. DNA feati sesizari, tutunaoară, la Camera a Deputaţilor, tra formularea a caftarlor ti nchisearea pusputearil’ei penala andicra di Ponta, deputat, cari tru perioada tru cari ari subei ca feati infracţiunile di conflictu di interesi avea funcţia di prim-ministru. Adutem aminti că tru dosarlu mutrindalui companiile Turceni si Rovinari, fostul ministru a Transporturlor tru cabinetlu Ponta, Dan Şova, easti pusputit penal tra complicitati la abuz tru lucru. Procurorl’i li teasira viniri stepsurli contra a lui şi lu bagara sum control judiciar tra 60 di dzali. DNA cafta tru daua ori arada a Senatlui apruchearea tra ncl’idearea al Sova, ama senatorl’ii s-ncuntrara.
TVA la alimente scadi di la 24% la 9%.
Di la 1 di cirisar, tru România s-baga tru lucru multu dimandata scădeari a TVA la alimente, di la 24% la 9%. Asi cum spun analiştil’i, n’icsurarea a taxal’ei va lu creasca consumlu şi va s-da sila tra criştearea a economiil’ei româneşti, cari nregistreadză un avansu pisti isachili a economiştilor fapti tru ahurhita a anlui. Comisia Naţională di Prognoză li feati cama cu hairi tora ayon’ea datili tra aestu an, la una crişteari di 2,8% la 3,3%, iara ritmul poati s-l’ia sila, tru an’il’i yinitori, până la un plus nica s-di 4% tru 2018. Tutunaoara, Comisia Europeal’nă, Banca Mondială şi Banca Europeană tra Reconstrucţie şi Dizvoltari, un ditru protl’i finanţatori ali Românie, lugursescu că economia va s-creasca cu una medie di pisti 3% tru yinitorl’i an’i. Di altă parti, prezidentul Klaus Iohannis lu promulga nomlu mutrindalui fatearea diplo alocaţia tra cilimean’i, di la 42 di lei (9,4 euro) la 84 di lei. Premierlu Victor Ponta deadi asiguripseri că Guvernul va li afla resursili financiari tra aestă apofasi.
Ministurlu german ali apărării, Ursula van dir Leyen, viziteadză Bucureştiul.
Germania easti conştientă di simasia strategică ti u ari regiunea ali Amarea Lae şi easti interesată di ahandusearea a ligaturlor cu România em tru plan bilateral, em şi tru arada UE şi NATO. Suntu declaraţiile fapti, Bucureşti, di ministurlu german ali apărari, Ursula van dir Leyen cari s-andamusi, gioi, cu omologlu român Mircea Duşa şi fu astiptată di prezidentul Klaus Iohannis. Dialoglu cu autorităţli române avura tu arada di lucru şi situaţia dit Ucraina, ufitialu german afirmândalui că Berlin ari gailipseri majori ligati di efectili a political’ei di Moscova tru Ucraina. Di alta parti, pi fondul a gailipserlor mutrindalui situaţia dit fosta ripublică sovietică, Caplu a Statlui Major General ali Armata, general-locotenent Nicolae Ciucă, spusi că tru aestu kiro, tru România, nu s-baga problema ti bagarea diznau tru practico a serviciului militar obligatoriu. Ma multu, el lugursi că tru insita a anlui yinitor ateali 12 di avioani F16 pi cari România li ancupara dit Portugalia va s-intra tru serviciul a Forţilor Aeriene Români.
România s-ndreadzi ti adeararea la zona euro.
Situaţia economică ali Românie easti una multu bună tru aestu kiro, lugrseasti premierlu Victor Ponta, tru condiţiile tru cari, asi cum dimanda INS, investiţiile neti realizate tru economie criscura cu 8,5% pi primlu trimestru, andicra di idyea perioada a anlui tricut. El nica spusi că apufusearea a obiectivlui 2019 tra adeararea la zona euro ari şi una noima simbolica, cate tru atea perioadă România va u aiba prezidentil’ea rotativă a UE. Tru opinia a lui, după ti va s-hiba bitisiti procedurli tehnice ti suntu ananghi ti adoptarea euro, poati s-hiba organizată şi una consultari populară pi aestă temă. Guvernatorlu a BNR, Mugur Isărescu, fati timbihi ama că România ari nica multu tra lucrari ti adeararea la euro şi lipseasti s-aiba tu minti prota s-prota reformili structurale . El feati timbihi tra piricl’iul a nascantor alathusi di politit economice, criza globală demonstrândalui că aesta suntu zorlea ti corectari. Caplu a BNR cundil’e că tritearea ali România la moneda euro lipseasti s-hiba fapta tru oara uidisita, după ti s-bagara tru lucru tuti reformili ananghisiti.
Năili pruvideri a nomlui electoral fura vulusiti tru Senat.
Proiectul di nom mutrindalui alidzerli parlamentari, cari pruveadi că aesta va s-hiba pi liste, cu prag electoral di 5%, fu votat di cătra Senatlu di Bucuresti. Reprezentanţal’i a tutlor formaţiunilor polititi votara aestă pripuniri legislativă. Ase, norma di reprezentari va s-hiba di un deputat la 73.000 di banatori şi un senator la 168.000 di banatori. Uidisit cu aestu proiectu, tru 2016, Legislativlu va s-aiba 308 di deputaţ si 134 di senatori, a curi va la si adavgă atel’i 18 di parlamentari a minorităţlor şi şase dit partea ali diaspora. Turlia di bitisita a nomlui va s-hiba apufusită di Cameara a Deputaţlor, ca for dicizional. Adutem aminti că, la ateali dit soni alidzeri parlamentari, tru 2012, fura alepta 412 di deputaţ şi 176 di senatori.
Una nauă strategie tra nvăţămintu easti tru disvarteari.
Ministurlu ali educaţie, Sorin Câmpeanu, deadi asiguripseri că un nau nom a nviăţămintului va s-hiba elaborat masi după consultarea a nascantor experţa, cata cum şi a reprezentanţalor a patronatilor. Moeabetli va s-tana până tru bitisita a anlui. Di altă parte, Executivlu vulusi tora ayon’ea una strategie tra n’icsurarea a numirlui di tiniri cari trag mana di la sculie după ciclul gimnazial. Documentul acaţa tru isapi mecanisme şi meatri cari suntu tru plan tra s-hiba bagati tru practico până tru 2020, tra s-n’icsureadza procentul a tinirlor cu ilichia anamisa di 18-24 di ani cari bitisira nai multu clasa a opta şi nu urdina la niti una alta turlie di şcolarizari ica formari profesională.
Angrâpsearea: Mihai Pelin
Armânipsearea: Taşcu Lala
Audio –>
