Eveniment Top – 30.04.2016

Alidzeri locali tu Românii

Bogdan Matei, 03.05.2016, 11:59

Tu Românii, pânâ di 1 di Maiu, candidaturili ti alidzerli locali dit 5 di Cireșar pot s-hibâ contestati. Partidili politiți, suțatili electorali, organizaţiili a cetăţen‘ilor dit minorităţ naţionali şi independenţâl‘ii puturâ ș-pitreacâ candidaturili pânâ Marța ți tricu.

Aesti dit soni va s-armânâ definitivi pi 4 di Maiu, iara campania electoralâ va s-ahurheascâ pi 6 di Maiu şi va s-bitiseascâ di 4 di Cireșar. Easti treia oarâ tu isturia post-comunistâ cându un guvern di turlii tehnocratâ andreadzi alidzerli, dupu ațeali cumândisiti di Theodor Stolojan, tu chirolu 1991-1992, şi Mugur Isărescu, tu 1999-2000.

Dauâ inșiri di pi ipotisi tu trei dzâli

Dupu prota demisii dit cabinetlu tehnocrat al premierlui Dacian Cioloş — ațea a ministurlui ti Lucru Ana Costea — stâmâna aestâ alţâ doi minişțrâ apufusirâ s-iasâ di pi ipotisi. Easti zborlu ti ministurlu ti Fonduri Europeani, Carmen Aura Răducu, di lucurlu a curi premierlu s-aspusi anvirinat, şi ti ministurlu ti Culturâ, Vlad Alexandrescu, pi timeilu a scandalui di la Opera Naţionalâ.

Tu aesti soni dzâli, trei reprezentaţii furâ amânati ti furn‘iea a anvirinărilor aspusi di lucrâtori mutrinda numânâsearea, unâ dupu alantâ, ti ipotisea di director general ali Operâ Naţionalâ di Bucureşti, ama şi mutrinda diferența dintrâ amintatițli a balerinilor roman‘i şi aței xen‘i. Corpul di control a premierlui ahurhi unâ acţiuni di control la Operâ, ți ari ma mulțâ scupadz, prit cari şi vigl‘earea ali turlii cum furâ bâgati tu lucru, angajati, persoanili cari avurâ și cari nica au ipotisi di cumândiseari. Demisiili dit cabinetlu Cioloş vinirâ la ma pțân di şasi meși di cându agiumsi la puteari executivlu.

Augustin Lazăr – năulu procuror general ali Românii

Prezidentul Klaus Iohannis anyrâpsi bâgarea pi ipotisea di procuror general ali Românii al Augustin Lazăr. Nâinti apruchiatâ di Consililu Superior ali Magistraturâ, pripunearea fu pitricutâ a caplui ali vâsâlii di ministurlu ti Giustiții, Raluca Prună. Dit protili lucri ti adrari ali Augustin Lazăr adarâ parti și alumta cu infracționalitatea tu domeniili cama pțân afiriti, cama vulnerabili, alumta contra a arușfetâl‘ei tu administraţia localâ, vigl‘earea a nâscântor investigaţii cari mutrescu larea di pâradz și evaziunea fiscalâ, ama şi infracțiun‘ili contra ali umanitati, cum easti dosarlu ali Revoluţii anti-comunistâ dit 1989.

Moaubeț la Ministerlu a Lucurlui

La Ministerlu a Lucurlui dit Bucureşti furâ, stâmâna aestâ, baia moaubeț cu sindicatili mutrinda naua ordonanţâ di urgenţâ ti amintatițli dit sistemlu bugetar. Năulu ministru di resortu, Dragoş Pîslaru, dzâsi că s-lucreadzâ la ma multi varianti a documentului, a curi prințipiu di timel‘iu easti scâparea di tuti problemili di echilibru dit sistemu.

Reprezentanţâl‘ii a mărilor suțati sindicali câftarâ s-creascâ tuti amintatițli a bugetarilor, nu mași ațeali n‘iț, cum va Executivlu, şi dzâsirâ că, maca nu, va s-adarâ mări protesti. Uidisit cu Pîslaru, ordonanţa poati s-hibâ adratâ, deadun cu partenerl‘ii soțiali, pânâ pi 15 di Maiu. Proiectul va s-hibâ, ti dauâ stâmân‘i, tu moaubeti di turlii publicâ, dupu cari poati s-u aproachi Executivlu, la 1 di Cireșar. Aestâ easti data limitâ, şasi meși ninti di alidzerli generali dit Românii, pânâ la cari, uidisit cu nomlu, poati fi s-hibâ apruchiatâ unâ ordonanţâ di urgenţâ.

Șasi meși di la foclu dit Colectiv

La giumitati di an di la foclu dit clublu Colectiv, dosarlu fu pitricut tu instanţâ. 139 di persoani, 11 spitali şi 5 instituţii suntu părţâ țivilâ tu aestu caz. A aților ți aveau clublu şi a reprezentanţâlor a firmâl‘ei di efecti pirotehniți — lâ si aduți câbati di vâtâmari și ti ațea că nu bâgarâ tu practico meatri di sicuritati şi sânâtati tu lucru, ași cum caftâ nomurli.

Tu aestu dosar suntu pitricuti tu giudicatâ şi dauâ persoani giuridiți — firma ți avea clublu Colectiv şi ațea di artificii. Uidisit cu procurorl‘ii, extinctoarili dit club earau expirati, iara materialili ufilisiti nu earau contra a foclui.

Foclu di aclo tricu di 900 di gradi Celsius și agiumsi la tavan tu 33 di secundi. Pi 30 di Sumedru, tu Colectiv chirurâ 64 di oamin‘i şi cama di 100 furâ arși.