Eveniment Top – 29.03.2014
România Internațional, 28.03.2014, 13:21
Candidaţl’ii român’i la alidzerli europarlamentari dit meslu Mai
15 formaţiun’i politiţi dit Românii pitricurâ listi di candidaţ ti alidzerli europarlamentari di la 25 di Mai, ama ş-angrâpsirâ candidaturli şi 11 di independenţâ. Campania electoralâ va s-ahurheascâ pi 25 di Apriiur. Tu yinitorlu legislativ comunitar, România va s-aibâ 32 di mandati, cu unlu ma pţân andicra di aţel di tora Parlamentu di Bruxelles. Suţata di stânga PSD-UNPR-PC, la guvernari, soaţa lor tu Executiv, UDMR, opoziţia liberalâ şi aţea democrat-liberalâ ţânurâ ti locurili di pi listi numi ţi confirmarâ tu mandatlu di tora. Uidisit cu sondajili mutrinda intenţiili di vot, alianţa cumândisitâ di PSD poati s-li’a giumitati dit mandati. Alanti va li amapartâ PNL, PDL, Mişcarea Popularâ şi UDMR.
FMI apruchie dauli evaluări a acordului di turlii preventivâ cu România
Cumândisearea FMI apruchie şi prota şi daua evaluari a acordului preventiv angrâpsit cu România tu toamna a anlui ţi tricu. Fondul va s-agiutâ Bucureştiul cu nica aproapea 440 di milioani di euro, iara resursili totali pi cari poati s-li li’a România trec di 650 di milioani di euro. Acordul cu FMI şi UE easti di 4 miliardi di euro. Autorităţli români spun că nu caftâ s-intrâ tu aeşţâ pâradz, scupolu aliştei achicâseri hiinda afirearea ali Românii di iţi vârâ şoc pi pâzărli finanţiari
Unâ parti dit pensionarl’ii român’i va s-li’a ma mulţâ pâradz tu meslu Mai
Cama di 230 di n’ii di român’i ţi s-pensionarâ dupu 1 di Yinaru 2011 va s-li’a indemnizaţii cama mări, cu vârâ 63 di lei (vârâ 14 euro), pânâ tu inşita a meslui Marţu, dupu bâgarea tu practico a unui indiţi di corecţii şi criştearea a punctajilor, hâbârisi ministrul a lucurlui, Rovana Plumb. Ea dzâsi că easti zborlu di unâ diferenţâ di pi meşl’ii Brumar şi Andreu 2013. Opoziţia spuni că nu easti zborlu ti vârâ crişteari a pensiilor şi că a Guvernului îi si avea bâgatâ zori nica dit Brumar 2013 di Curtea Constituţionalâ s-calculeadzâ iara pensiili dupu ţi bâgă tu practico un indiţi di corecţii cari nu fu bun.
Recomandări di la Comisia di Veneţia ti proiectul di nom mutrinda alâxearea a Nomlui di Timel’iu ali Românii.
Comisia di Veneţia, parti dit Consiliul ali Europâ, evaluă proiectul di alâxeari mutrinda Constituţia ali Românii. Zu un raportu publicat Marţâ, Comisia pistipseaşti că nu easti ici limpidâ forma di guvernământu ţi va s-u bagâ România tu practico şi caftâ vârâ sinur tu ţi mutreaşti competenţili a prezidentului şi a premierlui. Alti recomandări mutrescu limitarea a cadrului proţedural tu ţi mutreaşti ordonanţili di urgenţâ, ama şi alâxearea a timeilui legal a Consiliului Superior a Magistraturâl’ei, ca aesti dit soni s-poatâ ş-tin’iseascâ misiunea di garantu ali independenţâ a magistraţlor. Viţeprezidentul a Senatlui di Bucureşti, soţial-democratlu Ioan Chelaru, dzâsi că moaubeţli mutrinda proiectul di alâxeari a Nomlui di Timel’iu s-duc ninti, maxus cu partiţiparea CSM şi a societatâl’ei ţivilâ. El dzâsi că referendumlu ti alâxearea a Nomlui di Timel’iu ali Românii nu va s-adarâ mai ayoniea di 2015.
Catandisea dit Ucraina, implicaţiili tu plan reghional şi internaţional – tu mutrita a autorităţlor români.
Triţearea ali Crimei la Arusii şi mărli implicaţiili tu plan reghional şi global aluştui evenimentu furâ zburâti di Consililu Suprem di Afireari ali Vâsâlii, andamusit sum cumândisearea a prezidentului ali Românii, Traian Băsescu. Nâinti, la bilanţul a Ministerlui di Afireari, caplu a statlui dzâsi că, tu catandisea a evenimentilor dit reghiuni, armata românâ lipseaşti s-aibâ un nău scupo – icâ criştearea a putearâl’ei di reacţii. Traian Băsescu: Nu mai putem s-mutrim inţidentili dit 2008, cându Federaţia Arusâ luă Abhazia şi Osetia di Sud, ca hiindalor fârâ importanţâ. Fu Ucraina – şi iţi om politic, ca iţi strateg militar, lipseaşti s-antreabâ ţi yini la rându. Că va s-hibâ Transnistria, icţ tutâ Republica Moldova, suntu anribări pi cari iţi vârâ poati s-li aibâ şi maxus Armata Românâ, ţi lipseaşti s-aibâ un nău scupo — criştearea a puteatârl’ei di reacţii”. Prezidentul mai zburâ ş-ti darea di ma mulţâ pâradz tu sectorlui di afireari ali vâsâlii, ta s-poatâ s-ducâ ninti proţeslu di modernizari.
