Eveniment Top 28.11.2015

Bugetlu pi anlu ţi yini va s-hibâ bitisit tu yinitoarli dauâ stâmân’i

Mihai Pelin, 27.11.2015, 11:38

Bugetlu pi anlu ţi yini va s-hibâ bitisit tu yinitoarli dauâ stâmân’i

Tu Românii, proiectul di buget di vâsâlii ti anlu 2016 caftâ s-limpidzascâ tuti lucârli ligati di stabilitatea di turlii fiscalâ şi va s-adunâ t-un loc tuti alâxerli legislativi la nivelu a amintatiţlor, dzâsirâ autorităţli.

Bugetlu va s-hibâ bitisit pânâ pi 15 di Andreu, dapoaia pitricut tu Parlamentu ta s-intrâ tu moaubeţli a comisiilor di speţialitati, şi tu soni pitricut tu votlu dit plen. Pânâ atunţea, va s-hibâ, ama ş-un chiro tu cari documentul va s-hibâ zburât public. Prezidentul Klaus Iohannis dzâsi că bugetlu pi anlu yinitor lipseaşti s-aibâ unâ viziuni pi chiro lungu ti împrustarea ali Românii, ca tu meşlâii ţi yin s-poatâ s-hibâ andreapti timiliili a alâxerilor tu domeniili di nai ma marea simasii.

Şi premierlu Dacian Cioloş dzâsi că România va s-amintâ s-ţânâ pi cicioari ţinta di deficit di sum 3% şi deadi asiguripseri că mutreaşti s-ţânâ, tu bugetlu pi anlu ţi yini, meatrili dit năulu Cod Fiscal.

Caplu ali vâsâlii româneascâ, Klaus Iohannis, apruchie Nomlu mutrinda criştearea a amintatiţlor ti lucrâtorl’ii bugetari

Prezidentul român, Klaus Iohannis, apruchie Nomlu prit cari amintatiţli a lucrâtorilor dit sistemlu di sânâtati crescu cu 25% di la 1 di Sumedru, iara a alantor bugetari cu 10% di la 1 di Andreu.

Premierlu Dacian Cioloş dzâsi că, dupu tuti aesti indexări, ta s-nu hibâ scâdzuti sumili di pâradz ti investiţii, timeilu va s-hibâ pi luarea di pâradz europen’i. Premierlu mai spusi că, dinclo di aesti crişteri di amintatiţi, cari suntu di mari simasii, România lipseaşti s-aibâ şi un stog di investiţii, ca-ntreaga crişteari icunumicâ s-nu s-întimil’eadzâ maşi pi consum.

Prota, nomlu mutrea maşi criştearea a amintatiţlor dit sânâtati, ama un zbor, un amendamentu PSD adus tu comisiili di speţialitati dit Parlamentu, câfta ta s-creascâ şi salariili a tutulor lucrâtorilor bugetari. Ama, ti intrarea tu practico a aliştei meatrâ, lipsea ca aeşţâ dit soni lucrâtori s-nu avurâ ş-alti crişteri di amintatic tu anlu 2015.

Proiectul a nomlui mutrinda stindzearea a creditilor, prit darea a bunlui ipotecat, fu apruchiat di Parlamentu.

Român’ii cari au crediti ipotecari şi nu mai pot s-şi pâlteascâ rati di cathi mesu, pot s-ascapâ di borgi maca va s-da a bancâl’ei bunlu cu cari garantarâ. Uidisit cu nomlu apruchiat tora ayoniea di Udălu a Deputaţlor, aţel care lua ampârmutlu lipseaşti s-pitreacâ la bancâ unâ carti prit cari s-aspunâ că apufusi sâ-i da bunlu ipotecat, iara creditorlu nu mai poati s-caftâ alti lucri.

Omlu cari ahurhi aesti proiectu, diputatlu PNL Daniel Zamfir, dzâsi că banca va s-poatâ s-li’a maşi bunlu ipotecat şi va s-pâzâripseascâ disnău, tu sinfunii isa ti cathi parti, darea nâpoi a pâradzlor ampârmutaţ.

Bancherii suntu, ama, anvirinaţ di năulu nom, cari, tu minduita lor, easti un piricul ti pâzarea a creditilor imobiliari şi nu easti uidisit cu Nomlu di Timel’iu (Constituţia), cu îndreptul european di tora şi niţi cu Codlu Ţivil.

Fu apruchiat Nomlu cari mutreaşti dânâsearea a activităţlor dit imobili cu piricul mari la cutreambur.

Dauâ ţinematografi şi dauâ teatri di Bucureşti, nâscânti multu cânâscuti, di mari simasii, cari dizvârteau activităţ tu imobili cu piricul, s-încli’isirâ dupu intrarea tu practico a nomlui cari mutreaşti dânâsearea a activităţlor tu imobili cu riscu mari la cutreambur.

Catandisea a teatrilor dit ahtări imobli ţi pot s-cadâ la un cutreambur mari, easti pi frândzâli a agendâl’ei a Guvernului. Premierlu Dacian Cioloş şi ministurlu di Culturâ, Vlad Alexandrescu, va s-andamuseascâ ta s-achicâseascâ cum s-andreagâ aestâ problemâ, ti cari easti aştiptatâ şi Primăria a Bucureştiului. Uidisit cu năulu nom, tuţ aţei ţi au casi cu piricul şi iu s-dizvârtescu activităţ publiţi, cluburi, restauranti, duchen’i, teatri, ţinematografi icâ instituţii bancari, lipseaşti s-adarâ expertiza a imobililor.

Maca aesti locuri intrâ tu categoria di riscu mari, atunţea lucurlu lipseaşti dânâsit. Bucureştiul armâni câsâbălu cu nai ma marli piricul dit Evropa, tu catandisea a vârâ cutreambur. Suti di imobili suntu baia erodati di chiro, maxus dupu marli cutreambur dit anlu 1977, di 7,2 pi Richter, iu chirurâ aproapea 1.600 di oamin’i .