Eveniment Top – 25.04.2015

Andamusi UE mutrinda imigraţia clandestinâ

Roxana Vasile, 26.04.2015, 15:02

Liderl’ii europen’i, andamusiț Gioi, Bruxelles, apufusirâ s-da di trei ori ma mulțâ pâradz ti scâparea a imigranţâlor dit Amarea Mediteranâ, ama și s-caftâ andruparea a ONU ti acţiun’i di turlii militarâ contra a traficanţâlor dit Libia, vâsâlii di iu fug câtâ Europa nai ma mullțâ’ii oamin’i.

Di partea ali Românii s-dusi preyidentul Klaus Iohannis, cari easti deadun cu vâsâliili dit Mediterana, cari trag nai ma marli greu. Tu minduita a caplui ali vâsâlii, lipseaști criștearea bugetului ali Agenţii ti cumândisearea a sinurilor di nafoara a Uniunâl’ei Europeanâ (Frontex) ti acţiun’ili dit zonâ, Bucureştiul hiindalui dișcl’is, cara va-i si caftâ vârâ aestu lucru, s-pitreacâ ma mulțâ experţâ.

Ma multu, pi chiro di mesi şi lungu easti di mari simasii lucurlu la furn’ia aluștui fenomen di migrații — icâ greulu dit vâsâliili dit Africa. Andamusea UE fu andreaptâ di urgențâ, dupu aestâ dit soni tragedii, lâiațâ, dit Mediteranâ, iu chirurâ 800 di migranţâ african’i.

România şi agiutorlu a ei tu Europol

Unlu dit ținți experţâ cari lucreadyâ tu domenea a afirearâl’ei țiberneticâ la Europol easti dit România — dzâsi Bucureşti, directorlu aliștei instituţii, Rob Wainwright. Poliţia românâ easti alâvdatâ ca hiindaei unlu dintrâ membri cu nai ma marea activitati dit organizaţia europeanâ ti dânâsearea a vâtâmarâl’ei, hiindaei, tu idyul chiro, pi loclu 6 dit 12 tu ți mutreaști numirlu di alâxeri di dati dit sistemlu Europol – spusi şi ministurlu di Interni, Gabriel Oprea.

Tu aestu contextu, el andrupaști intrarea ali Românii tu Spaţiul di libirâ urdinari Schengen: România ari borgea s-dânâseascâ numirlu a migranţâlor ți trec paranom sinurlu dit Estul a Uniunâl’ei Europeanâ şi putem s-videm tora că meatrili bâgati tu practico asiguripsescu sicuritatea a spaţiului di libirtati, sicuritati şi giutiții. Avem nai ma modernul sistem integrat di sicurizari a sinurilor şi avem unâ dit nai ma bunili contribuţii la acţiun’ili Frontex. Ti ațea, minduiescu io că intrarea ali Românii tu Schengen va s-yinâ cu baia lucri buni tu ți mutreaști sicuritatea a Uniunâl’ei, ama și a vâsâliilor membri.

Țentru CIA tu Românii?

Ațel di ma ninti prezidentu di stânga ali Românii, Ion Iliescu, zburâ, ti prota oarâ, ti publicaţia ghermanâ Der Spiegel” și dzâsi că, dupu grealili atentati dit 11 di Yismârciun 2001, dit SUA, România deadi un sediu ti CIA.

El exiyisi că fu un lucru cari s-aratâ dișcl’idearea andicra di american’i nâinti di intrarea, tu anlu 2004, tu NATO. Ion Iliescu dzâsi și că autorităţli români nu s-misticarâ tu activităţli a serviciului american şi că nu şteau ți lucri s-adrau aclo. Uidist cu ziarişțâl’ii ghermani, el easti, dupu ațel di ma ninti prezidentu polonez, Aleksander Kwasniewski, doilu cap di vâsâlii cari aproachi existenţa a țentrilor ascumti ali CIA tu Europa.

Cu tuti că s-adrarâ baia ancheti, aesti hapsi dit niscânti vâsâlii Estu-europeani, prit cari și România, armân un mister, un lucru ascumtu dupu aproapea 10 an’i di cându s-zburâ prota oarâ di eali.

Cara sâ șteam ți s-adra aclo, nu va s-apruchiam darea a sediului — dzâsi Ion Iliescu, pitricândalui zboarâ câtâ ațea catandisi ti cari s-aspuni că membri mări dit suțata teroristâ Al-Qaida furâ torturaț aclo.

Achicâseari ti sânâtati

Premierlu român, Victor Ponta, pripusi, stâmâna aestâ, anyrâpsearea a unâl’ei achicâseari ti sânâtati cari s-hibâ apruchiat di tuti partidili politiți dit vâsâlii.

Caplu a guvernului minduiaști că garanția a finanțarâl’ei a sistemlui, criștearea a bunilor sinfunii di lucru şi criștearea a amintatiților pot s-dânâseascâ vgarea a specialişțâlor tru xeani. Victor Ponta: Nu pot s-dzâc că di mâni criștem di trei ori amintatițli — nu easti dealihea, lipseaști unâ perspectivâ pi-un lungu chiro, icâ tu doi, trei, patru an’i. Di nu, cara s-nu hibâ perspectivâ, competiţia europeanâ va nâ alasâ sigura fârâ di nai ma bun’ii yeațâri.

Nâinti di aesti zboarâ, ministurlu ti Sânâtati, Nicolae Bănicioiu avea dzâsâ că, cara tu trei an’i, nu va s-creascâ dealihea amintatițli, tu domenea medicalâ va s-hibâ ș/ma lai catandisea. Dit alanțâ factori cari duc la vgarea a yeațârilor câtâ Vestu adarâ parti blocarea a locurilor di lucru tu domeni, numirlu n’ic di spitali şi numărlu tut ma mari di oamin’i lândziț.

Bacşiş impozitat

Executivlu di Bucureşti apruchie unâ ordonanţâ di urgenţâ ți mutreaști impozitarea a tutulor amintatițlor, icâ și a pâradzlor daț bacşiş. Uidisit cu aestu actu normativ, pâradzl’ii daț di clientu ti servițiili a operatorilor icunumiț va s-hibâ tricuț pi un bon fiscal ahoryea.

Prota, salariatlu cându yini tahinărli la lucru ari borgea s-înregistreadzâ pâradzl’ii pi cari îi ari la el tu registurlu ţânut ahoryea di angajator — dzâsi ministurlu a finanţilor, Eugen Teodorovici. Bacşişlu va s-hibâ impozitat cu 16% și armâni ca angajatorlu s-apufuseascâ ma sâ-l țânâ el icâ va-l da a lucrâtorilor.

Fârâ vizi, tu Canada

Român’ii s-hârsirâ N’iercuri, di lucri buni di pisti Ocean! Guvernul a Canadâl’ei apufusi s-u treacâ România anamisa di vâsâliili ti cari va s-intrâ tu practico, dit anlu 2016, pruviderli a sistemlui di Autorizari Electronicâ a Urdinarâl’ei (eTA).

Ași, aței cari avurâ tu aeșțâ dit soni 10 an’i unâ o vizâ canadianâ icâ unâ vizâ temporarâ ti SUA va s-poatâ s-intrâ fârâ vizâ tu Canada, dupu înregistrarea electronicâ tu sistemlu eTA.

Uidisit cu Ministerlu di Externi di Bucureşti, aestâ apofasi — lucru di mari simasii tu proțeslu di scuteari a vizilor canadieni — aspuni disnău di ghini mutrinda moaubetea constantâ a autorităţlor români cu ațeali canadieni mutrinda andridzearea aluștui dosar. Easti şi un semnu că politiclu vru s-veadâ andreptu cât ma ayoniea aestu lucru, scupo idyea ti România, Canada şi Uniunea Europeanâ tu ți mutreaști dânâsearea a regimlui a vizilor canadieni ti tuţ cetăţen’ii român’i, ca aeșțâ dit soni s-hârseascâ isa cu alanțâ cetăţen’i europen’i, di urdinarea fârâ vizâ tu Canada.

Ascultaţ aoa –>

Armânipsearea: Cristina Mina