Eveniment Top – 23.04.2016
Intrarea ali Românii tu Schengen, tu etapi?
România Internațional, 25.04.2016, 09:17
Intrarea ali Românii tu Schengen, tu etapi?
Comisia Europeanâ andrupaști intrarea ali Românii şi ali Vâryârii tu Spaţiul di libirâ urdinari Schengen, câ țe aesti vâsâlii tin‘isescu siyura tuti sinfuniili. Prezidentul ali Comisii, Jean-Claude Juncker, dzâsi aesti zboarâ, Strasbourg, tu Andamusea Parlamentarâ a Consiliului ali Evropâ, apândisindalui la unâ antribari a unui europarlamentar român mutrinda aestu subiectu.
Uidisit cu niscânti sursi diplomatiți adusi aminti di omlu pitricut di Radio România la Strasbourg, intrarea poati s-adarâ tu dauâ etapi, ahurhunda cu daua giumitati a anlui. Aștiptatâ, prota, tu meslu Marțu 2011, intrarea ali Românii tu spațiul comunitar di libirâ urdinari, fu amânatâ di ma multi ori, ti furn‘iea a nâscântor vâsâlii membri cari nu apruchiarâ apofasea, câ țe nu minduiau că s-adarâ cum lipseaști alâxearea ali giustiții icâ alâxearea mutrinda alumta contra a arușfetâl‘ei. Tu aestu chiro, autorităţli di Bucureşti dzâsirâ că tin‘isescu tuti sinfuniili di turlii tehnicâ di intrari tu Schengen.
Baia provocări ti năulu ministru a Lucurlui
Nomlu mutrinda amintaticlu a bugetarilor şi bâgarea tu practico a năilor pruvideri a Nomlui ți mutreaști chirolu di șideari acasâ și pâradzl‘ii ti criștearea a ficiurițlor suntu protili provocări a năului ministru român ti Lucru, Dragoş Pâslaru. Ma ninti consilier di stat pi problemi icunumiți la Cancelaria a protlui-ministru Dacian Cioloş, Pâslaru intră tu loclu ali Ana Costea. Aestâ dit soni ș-deadi demisia, dupu ma multi anvirinări a sindicatilor mutrinda proiectul di ordonanţâ di urgenţâ ti amintatițli a bugetarilor.
Tu aestu chiro, Viniri, premierlu Cioloş exiyisi, tu mouabețli cu soțl‘ii di turlii soțialâ, că tora, di oarâ, nu va s-hibâ zborlu ti alâxearea a Nomlui a amintatițlor bugetari şi că executivlu va s-yinâ cu unâ nauâ ordonanţâ di urgenţâ cari s-andreagâ dit problemili dit sistemlu public di amintatiți – prota, mutrinda amintatițli n‘iț. Pi di altâ parti, Pâslaru lipseaști s-aflâ cum s-bagâ tu practico năili pruvideri a Nomlui mutrinda pradzl‘ii ti criștearea a ficiurițlor, tora ayoniea apruchiatâ di caplu ali vâsâlii.
Aestâ dit soni pruvideari scoati dit practico plafonlu maxim a pâradz‘lor di cathi mesu ti criștearea a cilimean‘ilor, cari pânâ tora eara di 3.400 lei (760 di euro). Di tora ș-ninti, pâradzl‘ii va s-hibâ 85% dit amintatic şi s-da pi un chiro doi an‘i. Pârințâl‘ii cari s-toarnâ ma ayoniea la lucru au îndreptul la 50% dit indemnizaţia minim garantatâ.
Anvirinări şi protesti a sindicalişțâlor dit sânâtati, a minierilor şi energeticien‘ilor român‘i
Tu Românii, sindicalişțâl‘ii dit sânâtati dusirâ ș-urdinarâ stâmâna aestâ la sediili a prefecturilor dit ma multi municipii reşedinţâ di giudeț şi la Palatea a Parlamentului di Bucureşti ta s-caftâ scutearea dit sistemlu di sânâtati a lucrilor paranom şi finanţarea ași cum lipseaști aluștui dit soni.
Ei caftâ nomuri ti buna imnari a cabinetilor medicali tu sculii şi darea a unui buget di 6% dit Produslu Internu Brut ti sânâtati. Tut ahât anvirinaț, ma mulțâ mineri și energeticien‘i di la Complexul Energetic Oltenia vinirâ 300 di kilometri pri padi pânâ Bucureşti, t-un marșu di protestu. Ministurlu ti energii, Victor Grigorescu, dzâsi că Guvernul va s-aflâ cum poati s-agiutâ catandisea finanțiarâ ali companii. El zburâ cu reprezentanţâl‘ii ți cumândisescu Complexul şi cu niscânțâ lucrâtori di aclo și s-achicâsrâ deadun tu ți mutreaști un plan di eficientizari, cari caftâ și alâxearea a shemâl‘ei di personal.
Liberal‘ii, numânâseri unâ dupu alantâ ti primaria generalâ a câsâbălui București
Liberal‘ii, prota puteari di dreapta dit Românii, vinirâ cu altâ numâ, ti patra oarâ, ti candidatura la ipotisea di primar general al câsâbălui București. Easti zborlu di ațel di tora lider al Organizaţil‘ei Bucureşti a partidlui, Cătălin Predoiu, ma ninti ministru la Giustiții. Dit pripunerli di ma ninti furâ și europarlamentarlu Cristian Buşoi, prot-vițeprezidentul PNL și Ludovic Orban, cari u alâsă candidatura și inși di pi ipotisili pi cari li avea, dupu ți fu cli‘mat la DNA şi bâgat sum vigl‘eari giudițiarâ ti arușfeti.
Niți yinitoarea numâ nu fu apruchiatâ – ațea al Marian Munteanu, ma ninti lider al studenţâlor tu chirolu a grealilor protesti ahurhiti contra a putearâl‘ei comunistâ instalatâ Bucureşti dupu revoluţia dit 1989. Munteanu s-deadi nâpoi și nu apruchie câbatea ți îi fu adusâ — ațea că ari lucratâ cu ațea di ma ninti poliții politicâ – Sicuritatea.
Vizita tu Românii a prezidentului ali Ucrainâ, Petro Poroşenko
Autorităţli români adusirâ aminti, Gioi, di andruparea ti suveranitatea, integritatea teritorialâ şi independenţa a viținâl‘ei Ucraina, cu furn‘iea a vizitâl‘ei Bucureşti, a prezidentului Petro Poroşenko. Liderlu di Kiev s-andamusi cu omologlu a lui român, Klaus Iohannis şi cu premierlu Dacian Cioloş.
Doil‘ii capi di vâsâlii zburârâ și ti evoluţiili di sicuritati tu regiunea a Amarâl‘ei Lai. Poroşenko dzâsi că Ucraina aproachi iniţiativa di adrari a unâl‘ei flotâ a Amarâl‘ei Lai cari s-agiutâ prezenţa NATO tu zonâ şi criștearea a sicuritatâl‘ei dit regiuni. Șidzurâ moaubeti şi tu ți mutreaști adrarea a unui grup militar româno-ucraineano-vâryar, dupu cum au și Polonia, Lituania şi Ucraina.
Prezidentul ali Ucrainâ s-adună şi cu premierlu Dacian Cioloş, cari dzâsi că adrarea a năului guvernu di Kiev easti un lucru bun ti alâxearea internâ şi stabilizarea ali vâsâlii viținâ.
Cu furn‘iea a vizitâl‘ei furâ anyrâpsiti dauâ achicâseri, acti — unlu mutrinda lucurlu deadun tu domenea a transporturilor militari şi alantu mutrinda vigl‘iearea, tut deadun, a sinurilor dintrâ dauli vâsâlii.
