Eveniment Top – 22.11.2014

Amintâtor niaştiptat a alidzerilor prezidenţiali dit Românii

România Internațional, 22.11.2014, 11:00

Un lucru ici aştiptat tu doilu tur al alidzerilor prezidenţiali dit Românii, dit 16 Brumar — amintarea limpidâ, la unâ diferenţâ di vârâ 9 proţenti, a candidatlui a Suţatâl’ei Criştin-Liberalâ, primarlu a câsâbălui Sibiu, Klaus Iohannis, dinâintea a candidatlui PSD — UNPR- PC, premierlu Victor Ponta, vidzut ca hiindalui prot favorit.

Niaştiptatâ fu şi prezenţa multu mari la vot a român’ilor, 64,10%, nai ma marea dit aeşţâ dit soni 18 di an’i. Numirlu mari al român’ilor dit diasporâ, aproapea 380 di n’ii, cari vinirâ la vot tu doilu tur fu dealihea unâ surprizâ îmşatâ. Ama, codzli kilometriţi cu român’i aşteptândalor, tu arcoari ş-ploi, dinâintea a ambasadilor şi a consulatilor dit ma mulţâ câsâbadz europen’I, ta s-voteadzâ, nu fu ici un lucru di apruchiat.

Curtea Constituţionalâ apruchie, Viniri, alidzearea al Klaus Iohannis tu ipotisea di cap ali vâsâlii. El va s-hibâ aţeal de-am patrulea prezidentu ali Românii di la Revoluţia dit anlu 1989. Tora primar a câsâblui Sibiu, năulu prezidentu va s-intrâ pi ipitisi dupu 21 di Andreu, cându s-bitiseaşti mandatlu a prezidentului di tora, Traian Băsescu.

Efectili a andridzearâl’ei slabâ a alidzerilor ti român’ii dit diasporâ

Slaba andrizeari tru xeani a alidzerilor prezidenţiali nu armasi fârâ efecti. Dusi la demisia a ministrului di Externi, Titus Corlăţean, dupu protlu tur di scrutin, ama şi a aţilui cari-i ţânu loclu ti niham di oarâ, Teodor Melescanu – dupu doilu tur, doil’ii ş-luarâ borgea, ama adusirâ câbati a legislaţâl’ei electoralâ, multu greau, cari nu deadi cali la dişcl’idearea di năi secţii di vot.

Laia andridzeari a votlui di la secţiile di tru xeani, adusi borgea a Parlamentlui di Bucureşti ta s-zburascâ iara andicra di alâxearea a legislaţâl’ei electoralâ. Pi di altâ parti, Gioi, Parchetlu General hâbârisi ahurhearea a câftarâl’ei di turlii penalâ tu cazlu mutrinda turlia cum autorităţli cu borgi tu aestâ domeni, asiguripsirâ îndreptul la vot ti românîii di nafoara sinurilor.

La Parchet agiunsirâ baia sesizări contra a nâscântor minişţrâ şi reprezentanţâ a autorităţlor, cari, tu minduita a petiţionarilor, avurâ borgea ti andridzearea a daulor tururi di vot.

Mai mulţâ senatori şi deputaţ român’i armasirâ fârâ imunitati, ca giustiţia s-poatâ ş-aspunâ zborlu mutrinda câbăţli tu ma multi dosari di aruşfeti icâ incompatibilitati.

Udălu a Deputaţlor di Bucureşti ş-aspusi votlu, Marţâ seara, tu cvasiunanimitati, ti niapruchiarea a nâscântui proiectu di turlii legislativâ mutrinda graţierea şi amnistierea.

Pitricut cu aproapea un an nâinti, proiectul dusi la protesti di partea ali societati civilâ. Tu idyul chiro, dupu aestu vot, deputaţl’ii Ion Diniţâ – PC, Ioan Adam – PSD (la guvernari) şi Mircea Roşca — PNL (tu opozitii), a curi lâ si aduţi câbati ti acti di aruşfeti, armasirâ fârâ imunitati parlamentarâ.

Dupu aestu proţes, instanţa Supremâ apufusi arestarea ti 30 di dzâli al Ioan Adam şi Mircea Rosca, icâ cercetarea tu libirtati, sum control giudiţiar al Ion Diniţă.

Pi di altâ parti, tu Senat fu apruchiatâ mutarea a imunitatâl’ei tu dosarlu a doi parlamentari a curi lâ si aduţi câbati ti cazlu Microsoft — soţial-democrata Ecaterina Andronescu şi Şerban Mihăilescu, di la UNPR. Prezidentul Traian Băsescu apruchie ş-el câftarea penalâ a aţilui di ma ninti ministru liberal, Cristian David, a curi procurorl’ii îi aduc câbati că ari datâ pâradz, mitâ.

Premierâ tu isturia giudiţiarâ ali Românii post-comunistâ – a unui procuror-şef tu ipotisi îi si dişcl’isi dosar penal.

Caplu a Direcţiei di Investigari a Infracţiun’ilor di Criminalitati Organizatâ şi Terorismu (DIICOT), Alina Bica, fu arestatâ tu un dosar tu cari DNA îi aduţi câbati di abuz tu lucru.

Infracţiunea easti dit chirolu tu cari caplu a DIICOT eara sumsecretar di stat tu Ministerlu di Giustiţii, ama şi membrâ a unâl’ei comisii ţi mutrea restituirea di terenuri. Aliştei dit soni îi si aduţi câbati că, tu anlu 2011, deadun cu doi soţ di comisii, şi ei tora cercetaţ, ari adratâ cama lişoarâ pâltearea a nâscântor despăgubiri supraevaluati ti un teren di 13 hectari di la periferia a capitalâl’ei. Prejudicilu ali vâsâlii pari că ansari di 62 di milioani di euro.

Arusia easti câlisitlu di tin’ii a aţil’ei de-a 21-a ediţii a Târgului internaţional di carti di Bucureşti

Bucureşti easti, pânâ Duminicâ, gazda a 21-a ediţii a Târgului Internaţional Gaudeamus – Carti di Înviţâmintu. Cama di 300 di edituri româneşţâ şi xeani, tipografii, instituţii di înviţâmintu şi instituti culturali prezintâ cărţâ ti tuti gusturli. Câlisitâ di tin’ii a ediţâl’ei 2014 easti Federaţia Arusâ. 17 scriitori, critiţ literari şi jurnalişţâ aruşi va s-aibâ lansări şi prezentări di carti, sesiun’i di autografi şi moaubeţ.

A vizitatorilor li si andreapsirâ 750 di evenimenti editoriali — un numir recordu tu isturia a târgului. La aestâ ediţii, aduţem aminti şi di lansarea a volumlui bilingvu Dipârtărli nu va n-ampartâ canâoarâ/Distance will never come between us, lucrat pi timeilu a interviurilor, a zboarilor şi a fotografiilor a ascultâtorilor RRI dit aproapea 20 di vâsâlii, cari amintarâ Mărli Premii a concursurilor di culturâ generalâ andreapti di Radio România Internaţional dit anlu 1995.

2014 fu un an bun ti naţionala di fotbal ali Romanii

Naţionala di fotbal ali Românii amintă aţel dit soni meci dit 2014, amicalu di Bucureşti cu Danemarca, cu scorlu di 2-0.

Dupu aestu rezultat, echipa va s-alinâ, meslu aestu, pi loclu 15 tu clasamentul FIFA, nai ma bunlu loc dit Yismârciun 2008 ş-încoaţi. Dupu 1-0 cu Gârţia şi 2-0 cu Finlanda, dauli giocuri tu deplasari, 1-1 cu Ungaria şi 2-0 cu Irlanda di Nordu la Bucureşti, naţionala easti pi protlu loc tu Grupa F a preliminariilor.

Tu aeşţâ dit soni doi an’i, România agiunsi di nâpoi 42 di locuri tu ierarhia FIFA, dupu ţi, tu Yismârciun 2012, eara pi loclu 57. Nai ma bunlu loc ali Românii tu clasamentul FIFA fu tu Yismârciun 1997, treilu loc.

Armânipsearea: Cristina Mina

Ascultaţ aoa –>