Eveniment Top – 22.08.2015

Mihai Pelin, 21.08.2015, 12:18

Amintatiţli a yeaţârilor crescu cu 25% di la 1 di Sumedru

Executivlu român hâbârisi că amintatiţli a lucrâtorilor dit sistemlu public di sânâtati, ţi agiungu la vârâ 200 di n’ii di oamin’i, va s-creascâ cu 25%, di la 1 di Sumedru.

Aestâ meatrâ, ţi va s-hibâ apruchiatâ stâmâna ţi yini, tu andamusi di guvern, fu giudicatâ di Opoziţii, ama şi di alti turlii di bugetari, ţi caftâ idyul lucru – icâ dascăli şi poliţişţâ. Tut stâmâna alantâ, Executivlu va s-pitreacâ tu Parlamentu un proiectu di nom cari va s-limpidzascâ sinfuniili tu cari oamin’ii lândziţ pot s-da a yeaţârilor aşi-dzâsa “şpagă”.

Ministerlu di Giustiţii va s-ascoatâ un proiectu di nom cari s-dzâcâ sinfuniili tu cari pacienţâl’ii pot s-da ş-alţâ pâradz aţilor ţi avurâ angâtan di ei. Aşi, aestu lucru nu s-caftâ dupu el giuiapea di turlii penalâ, maca va s-hibâ tin’isiti, adunati, trei sinfunii: nu va s-hibâ câftati zorlea di yeatur icâ asistentu, va s-hibâ daţ dupu bitisearea a lucurlui medical şi va s-hibâ declarati ta s-poatâ s-hibâ fiscalizati.

Năul Cod Fiscal va s-hibâ alâxit — s-achicâsirâ reprezentanţâl’ii a partidilor parlamentari dit Românii

Luni, Bucureşti, va s-hibâ unâ andamusi parlamentarâ extraordinarâ, iu va s-hibâ zburâtâ şi votatâ câftarea di mutreari disnău a năului Cod Fiscal, pitricutâ di caplu ali vâsâlii, Klaus Iohannis.

Reprezentanţâl’ii a partidilor parlamentari s-achicâsirâ tu ţi mutreaşti detalii tehniţi di nai ma marea simasii a Codlui. Aşi, di la 1 di Yinaru 2016, TVA ti mâcari lipseaşti s-scadâ di la 24 la 20%, iara dit anlu 2017 la 19%. Pâhălu criscut la carburantu armâni tu practico şi anlu ţi yini, iara pruviderli mutrinda scutearea icâ ţânearea a altor taxi s-hibâ apufusiti dapoaia.

Meslu ţi tricu, prezidentul Iohannis pitricu ti nica unâ mutreari năulu Cod Fiscal, nâinti apruchiat tu Parlamentu, spunândalui că intrarea aluştui tu practico nu easti sustenabilâ. Premierlu Victor Ponta deadi ama asiguripseri că năulu Cod easti bun şi că impactul bugetar di 7 miliardi di lei (1,58 di miliardi euro) dit scâderea TVA a s-hibâ afiritâ maşi dit nivelu a colectărilor, ţi easti estimat iuva la 10 miliardi di lei (2,2 mld.euro).

Aţel di ma ninti ministru de Interni, liberalu Gabriel Berca fu pitricut tu giudicatâ

Tu Romanii, aţel di ma ninti consilier prezidenţial şi ministru la Interni, liberalu Gabriel Berca fu pitricut tu giudicatâ tu arestu di turlii preventivâ ti trafic di influenţâ.

Idyea meatrâ fu ş-ti aţel di ma ninti parlamentar Mihai Banu — deputat PDL cându adră faptili ti cari îi si aduţi câbati faptelor — ş-ti hiilu aluştui. Uidisit cu procurorl’ii, Gabriel Berca câftă şi luă, cu agiutorlu al Mihai Banu, tu chirolu 2010-2012, ahât ti el, ama ş-ti partidlu dit cari adra parti (PNL), 185.000 di euro di la un embur. Ti aeşţâ pâradz, el tâcsi că va ş-ufiliseascâ putearea tu ţi mutreaşti darea a nâscântor pâradz di la Guvernu ti unâ primarii.

Ministurlu ti Afireari dit Republica Moldova, Anatolie Şalaru, vini Bucureşti

Adrarea a unui nău Guvernu pro-ocţidental la Chişinău dicşl’idi calea a criştearâl’ei a proiectilor bilaterali – dzâsi, Bucureşti, ministurlu român di Externi, Bogdan Aurescu, tu unâ andamusi cu ministurlu ti Afireari dit Republica Moldova, Anatolie Şalaru.

Aurescu zburâ ş-ti andruparea ali Românii mutrinda calea europeanâ a Republicâl’ei Moldova, ama ş-ti proţeslu di modernizari ali vâsâlii, maxus tu domenea a afirearâl’ei. Cându-i vini oara ta s-zburascţ şi el, Şalaru dzâsi protlili lucri ti adrari tu mandatlu a lui, protili direcţii di acţiun’i ligati di alâxearea a sectorlui di Afireari şi hâbârisi ti tutâ andruparea ali Românii.

El s-adunâ Bucuresti şi cu omologlu a lui român, Mircea Duşa, cari hâbârisi că un birou di ligâturâ al NATO va s-dişc’lidâ toamna aestâ Chişinău, ta s-andrupascâ integrarea euroatlanticâ a Republicâl’ei Moldova. Viţeprezidentu a Partidlui Liberal, Şalaru luă scamnlu di la Afireari meslu ţi tricu, tu năulu Executiv di Chişinău cumândisit di liberal-democratlu Valeriu Streleţ.

Guvernul d Bucureşti va s-agiutâ lucrâtorl’ii ţi au culturi asparti ti furn’iea a câroarâl’ei

Dupu ma multu di doi meşi di câroari, tu Românii ahurhirâ ploili. Câroarea adră baia ghideri tu tuti giudeţili ali vâsâlii, estimati di lucrâtori iuva la cama di dauâ miliardi di euro. Guvernul di Bucureşti adră ş-unâ analizâ a meatrilor ţi pot s-i agiutâ pi lucrâtorl’ii a curi culturi furâ asparti — suntu aştiptati şi agiutoari di la Comisia Europeanâ ti mărli culturi.

Ti culturli cama n’iţ, autorităţli tâcsirâ agiutoari di la bugetlu di stat. Misurlu easti nai ma multu aspartu, ama, dzâc specialişţâl’ii, problemi mări suntu şi la lilicea a soarilui icâ la soia. Furâ asparti ş-alti culturi, cum easti gârnul icâ rapiţa, ama şi legumili ş-fructili. Ti furn’iea aluştui lucru, s-aşteaptâ criştearea a pâhălui la aesti dit soni — dzâc producătorl’ii.

Dauâ echipi româneşţâ di fotbal giucarâ tu Euroapa League

Echipa româneascâ di fotbal Astra dit Giurgiu u azvimsi, Gioi, acasâ, cu 3-2, formaţia olandezâ AZ Alkmaar, tu protlu tur a play-off-lui Europa League. Cumândisitâ cu 0-2 dupu protili 15 minuti, Astra s-diştiptă şi tricu ninti pânâ la pauzâ.

Tut Gioi, Bucureşti, di campioana en titre ali Românii, Steaua, tricu, cu 0-3, echipa norvegianâ Rosenborg Trondheim. Vidzutâ di presâ ca hiindaei arşiunoasâ, aestâ catandisi vini dupu ţi, meslu ţi tricu, Steaua fu scoasâ tu treilu tur a Ligâl’ei a Campion’ilor di echipa dit Sârbii Partizan Belgrad.

Armânipsearea: Cristina Mina