Eveniment Top – 22.03.2014
România Internațional, 21.03.2014, 12:12
Reacţii româneşţâ la anexarea ali Crimei
Tu unâ catandisi multu ayonrea, cum easti invadarea ali Peninsulâ Crimeea di Arusii, clasa politicâ di Bucureşti avu tut unâ reacţii ayoriea, ti unâ solidaritati cum nu s-mai vidzu. Caplu ali vâsâlii îi adusi câbati a omolglui a lui arus, Vladimir Putin, că alâxeaşti sinurli tu Europa, şi câ mutreaşti s-adarâ disnău Uniunea Sovieticâ. Idyul lucru îl dzâsi şi premierlu Victor Ponta, cari şi-aspusi nâdia că Ocţidentul va s-bagâ tu practico meatri la intervenţia militarâ, tu sinfuniili tu cari, pistipseaşti Ponta, existâ picirulu ca Arusia s-va ş-ma multu, nu maşi Crimeea. Ministerlu di Externi di Bucureşti spuni şi el că alichirea ali Crimei poati s-aspargâ eforturli, di dzâţ di an’I, di îndridzeari a întreglui continentu. Tu idyul chiro, diplomaţia românâ dzâsi că alichirea ali regiuni secesionistâ Crimeea easti un lucru paranom, iara independenţa, suveranitatea şi integritatea teritorialâ ali Ucrainâ nu suntu tin’isiti. Chiola nu ari ninga el pârghii ti vârâ apofasi, Opoziţia di Bucureşti şi-aspusi şi ea ţi minduiaşti. Protili dauâ formaţiun’i di opoziţii, PNL şi PDL, spun că România lipseaşti sâ-şi coordoneadzâ ghini acţiun’ili cu soţl’ii dit UE şi dit NATO. Cu furn’ia a summit-lui a liderilor europen’i, la cari România fu reprezentatâ di Traian Basescu, UE adusi năi numi pi lista a ofiţialilor aruşi ti cari caftâ s-li da sancţiun’i.
MCV şi Schengen
Aţel dit soni raportu mutrinda Mecanismul di Cooperari şi Vigl’ieari (MCV), prit cari Comisia Europeanâ mutreaşti giustiţia tu Românii şi Vâryârii, fu apruchiat stâmâna aestâ, di Consililu di Afaţeri Generali (CAGRE), andamusit Bruxelles. Cu aestâ furn’ii, Consililu alâvdă niscânti concluzii dit raportul dit Yinaru, cum suntu bilanţurili pozitivi mutrinda niscânti instituţii giudiţiari di mari simasii, ca Direcţia Naţionalâ Antiaruşfeti (DNA) şi Agenţia Naţionalâ di Integritati (ANI). Poziţia a Consiliului easti multu importantâ ti România, tu ţi mutreaşti intrarea tu spaţiul di libirâ urdinari Schengen. Pi di altâ parti, România, cari dzâţi că tin’iseaşti tuti sinfuniili tehniţi mutrinda aderarea, reclamâ ligâtura, ţi u pistipseaşti multu ayoriea, dintrâ intrarea tu Schengen şi MCV.
Giustiţia dişcl’idi năi dosari cu numi greali
Potoplu di ancheti, arestări, procesi şi sentinţi, multi dit eali cu hapsi cu executari, pi cari giustiţia li apufusi mutrinda catandisea a nâscântor numi cânâscuti, dusi ninti şi stâmâna aestâ. Prezidentul a Udălui di Comerţu şi Industrii ali Românii, Mihail Vlasov, fu arestat preventiv, tu un dosar iu îi si aduţi câbati di trafic di influenţâ. Uidisit cu procurorl’ii di la Direcţia Naţionalâ Antiaruşfeti — cavaleria greau s-alumtâ cu aestu fenomen dit administraţia româneascâ — Vlasov, fu acâţat tamam cându lua 200 di n’ii di euro ta s-agiutâ tu un litigiu di la Curtea di Arbitraj. Aeşţâ pâradz earau maşi prota parti dit un milion di euro, pi cari el lipsea s-îi li’a. Şi prezidentul a Consiliului Giudeţean Constanţa (sud-estu), Nicuşor Constantinescu, easti câftat tut di DNA, tu ţi mutreaşti vârâ 20 di infracţiun’i di abuz tu lucru.
