Eveniment Top – 22.02.2014

România Internațional, 21.02.2014, 12:35

Tensiun’i tu USL, suţata di ţentru stanga di la guvernari

Cari mai pistipseaşti că USL ari yinitor, suţata di ţentru stânga di la guvernari tu Românii, dupu ţi criza dit uniuni pari s-creascâ di la unâ dzuâ la alantâ? Liderl’ii USL, premierlu soţial democrat, Victor Ponta, şi prezidentul a Senatlui, şeflu PNL Crin Antonescu, câtâpâţescu szâmâna ţi yini, s-andreagâ catandisea şi s-aflâ iţi vârâ soluţii la niachicâserli politiţi pi cari li au di pisti dauâ stâmân’i. Mărli tensiun’i cari agiunsirâ suţata cari easti tut cama slabâ, dusirâ şi la niachicâseri mutrinda naua structurâ a Cabinetlui Ponta. Liberal’ii li aduc câbati a soţial-democraţlor că vor s-spargâ un guvernu legitim al USL, cari amintă alidzerli tu 2012. Şeflu a liberalilor, Crin Antonescu, dzâsi că omologlu a lui, soţial-democratlu Victor Ponta, caftâ s-adarâ, anamisa di alanti formaţiun’i di la puteari, PC şi UNPR, un guvernu ali Uniuni Soţial Democratâ (USD), tu cari aţeali trei s-adunarâ tora ayoniea. Pi di altâ parti, Ponta dzâţi că mutreaşti s-ţânâ formula di tora a USL, ama minduiaşti că adră baia concesii ti liberali.

Sancţiun’i contra a regimului di Kiev

Catandisea greauâ di Ucraina aduţi mari gaile a comunitatâl’ei internaţionalâ. Adunaţ Bruxelles, miniştrâl’ii di externi dit UE apufusirâ s-bagâ sancţiun’i a regimlui di Kiev. Aeşţâ dit soni nu mai deadirâ cali ti vizi a ofiţialilor ucrainen’i şi niţi ti pâradzl’ii dit xeani. Romania, reprezentatâ la andamusi di caplu ali diplomaţii, Titus Corlăţean, nu apruchie ici zurbâlâchea di aclo, iu îşi chirurâ bana şi niscânţâ dit protestatari, ama şi dit forţili di ordini. Şi prezidentul ali Romanii, Traian Băsescu, îi câftă nica unâ oarâ a omologlui ucrainean, Viktor Ianukovici, s-nu mai ufiliseascâ armata tu alumtili di pi sucăchi cu protestatarâl’ii. El dzâsi că aestâ catandisi dit Ucraina poati s-agudeascâ tutâ Europa.

Nomlu a terenurilor agricoli, apruchiat di deputaţl’ii român’i

Dupu ţi apruchiarâ ma multi obiecţii a prezidentului Traian Băsescu, deputaţl’ii român’i simnarâ, stâmâna aestâ, Nomlu a terenurilor agricoli, cari dzâţi că cetăţen’ii şi persoanili giuridiţi dit Europa pot s-ancupârâ teren agricol tu Românii, tu sinfunii di reciprocitati. Ministrul a Agriculturâl’ei, Daniel Constantin, pistipsea că aestu nom adarâ cama lişor tut proţeslu di vindeari a terenurilor dit nafoara a câsâbadzlor, iara aţei cari amintâ dealihea sunt aţei cari vor s-aibâ activităţ di turlii agricolâ. Unâ dit protili alâxeri ţi li caftâ nomlu, mutreaşti ca aţei ţi vor s-vindâ terenuri agricoli dit nafoara a câsâbălui, lipseaşti s-aspunâ prota ali primării şi s-aşteaptâ dapoaia unâ listâ cu aţei cari au îndreptu ti ancupârari.

Nai ma marea soţietati di asiguripseri dit Românii — Astra — sum administrari ayoriea

Autoritatea di Vigl’ieari Finanţiarâ bâgă sum administrari ayoriea nai ma marea soţietati di asiguripseri di pi pâzarea româneascâ – Astra. Aestâ meatrâ vini unâoarâ cu un control, cându s-aflarâ ma multi lucri paranom tu administrarea a pâradzlor. Un prot exemplu dat di Autoritatea di Vigl’ieari easti aţea că, tu catandisea a unui mari cutrembur, aţei cari şi-adrarâ asiguripseri ti casâ la Astra nu va ş-li’a pâradz, câ ţe compania nu estimâ ghini daunili. Catandisea easti cu ahât ma greauâ cu cât ASTRA ari trei milioan’i di clienţâ, dit cari pesti dauâ milioani ş-luarâ asiguripserli ti casi.

Lista di yitrii compensati va s-intrâ tu practico di 1 di Apriiur, unâoarâ cu pachetlu di timel’iu di serviţii di turlii medicalâ

Ministerlu român di Sânâtati pitricu ti moaubeti publicâ naua listâ di yitrii compensati şi fârâ di pâradz. Dupu şasi an’i fărâ niţi unâ alâxeari, pi listâ furâ bâgati 130 di yitrii năi, icâ cu indicaţii năi di tratamentu. Aestu nom cari yini la 1 di Apriiur, da cali la năi yitrii, cama buni tu ţi mutreaşti pâhălu. Lista di yitrii compensati va s-intră tu practico unâoarâ cu pachetlu medical di timel’iu. Aestu dit soni va s-poatâ s-lu ia maşi aţei ţi suntu asiguraţ, iara pachetlu minim maşi aţei fârâ asiguripseri. Pachetlu minim asiguripseaşti serviţii medicali di urgenţâ, di vigl’ieari a nâscântor boli, consultaţii di mutreari a mul’ierilor ţi aşteaptâ ficiurţ, ama şi aţilor ţi amintarâ, ama şi activităţ di suportu, di andrupari.

Investitorl’ii dit Românii, ici haristusiţ di catandisea politicâ

Catandisea politicâ dit Românii agudeaşti mediul icunumic, lucru cari duţi la taxi ma mări şi salarii cama n’iţ ti popul şi adarâ griutăţ la câftarea a investitorilor xen’i. Aestu lucru lu aspusi secretarlu general a Suţatâl’ei ti Împrustarea ali Românii, Steven van Groningen. El dzâsi că România lipseaşti s-aibâ unâ strategii sectorialâ, iara alâxerli legislativi s-hibâ adrati tu aestâ strategii, cu analizâ di impactu şi cu un chiro şcurtu di bâgari tu practico, di 6-12 meşi. Suţata, cari adunâ patru dit nai ma mărli organizaţii di investitori dit vâsâlii, easti adratâ di Camera di Comerţu Americanâ tu Românii, di Consililu a Investitorilor Xen’i, di Suţata a Oamin’nilor di Afaţeri dit România şi di Romanian Business Leaders.