Eveniment Top – 18.10.2014

Prezidentul Traian Băsescu, la summit-lu Europa-Asia

România Internațional, 17.10.2014, 12:52

Prezidentul Traian Băsescu, la summit-lu Europa-Asia

Cumândisit di prezidentul a Consiliului European, Herman Van Rompuy, ş-di prezidentul ali Comisii Europene, Jose Manuel Barroso, summit-lu Europa-Asia adună, Milano, 53 di capi di vâsâlii icâ di guvernu di pi dauli continenti, întrâ cari şi caplu a statlui român, Traian Băsescu.

Aţeali dauâ dzâli di summit euro-asiatic deadirâ cali la dialog mutrinda ma multi problemi importanti ti dauli continenti, cari, deadun, reprezintâ giumitati dit PIB şi 60% dit comerţul dit lumi.

Câftânda cooperarea di turlii icunumicâ, andamusea ţânu ma multi adunări bilaterali, iu moaubetea fu ti conflictul ucrainean şi ti problema a gazilor naturali aruseşţâ ti Europa. Gioi, ti aesti dit soni dauâ temi, zburârâ liderlu di Kremlin şi cancelarlu gherman, Angela Merkel.

Uidisit cu purtătorlu di cuvendâ a liderlui arus, “nica suntu problemi di opinii tu ţi mutreaşti originea a conflictului internu ucrainean, ama şi mutrinda lucârli cari dusirâ la imnarea a evenimentilor di tora dit regiuni.” Alantâ dzuâ, Vladimir Putin zburâ cu prezidentul ali Ucrainâ, Petro Poroşenko, dinâintea a proţlor lideri europeni.

Meatri di turlii soţialâ

Tu Românii, vârâ 500 di n’ii di ficiuriţ, ţi yin dit cama di 280 di n’ii di fumel’i cu venituri multu n’iţ, va s-aibâ alocaţiili di dauâ ori ma mări, ahurhinda cu 1 di Brumar.

Easti zborlu, dzâsi ministrul a Lucurlui şi a Agiutorlui Soţial, Rovana Plumb, di alocaţia di andrupari, di agiutor ti gumeal’i, cari s-da anamisa di alocaţia di stat, pi cari u au tuţ fciorl’ii dit Românii. Ti aeşţâ pâradz, lipseaşti ca venitlu net ti cathi om dit fumeal’i s-hibâ pânâ tu 530 di lei, icâ vârâ 120 di euro.

Prit idyul actu normativ, Guvernul apruchie criştearea sumilor di pâradz ti ficiuriţl’ii dit plasamentu, ama şi dublarea a alocaţiilor di mâcari ti ficiuriţl’ii instituţionalizaţ icâ criscuţ di asistenţâl’i maternali.

Easti zborlu ti aproapea 60 di n’ii di fciori. Tu idyul chiro, dit ahurhita a anlui ţi yini, va s-creascâ di dauâ ori şi alocaţiili di cathi dzuâ ti mâcari ti oamin’ii cu dizabilităţ icâ ţi şed tu centri ayoriea, iu suntu mutriţ di asistenţâ.

Nâinti di aesti meatri, Guvernul di stânga di Bucureşti hâbârisi că, dit anlu 2015, salarlu minim brut pi icunumii va s-creascâ cu aproapea 10%, pânâ la 975 lei, vârâ 220 di euro, pensiili va s-creascâ cu 5%, iara indemnizaţiili ti oamin’ii cu problemi, cu dizabilităţ, cu 16 tru sutâ.

Dosari importanti di aruşfeti

DNA investigheadzâ tora retrocedări paranom di dzâţ di n’ii di hectare di pâduri cu un prejudiciu ti Regia Romsilva di cama di 300 di milioani di euro.

Prit aţei câftaţ tu aestu dosar suntu parlamentarl’ii PSD, Ioan Adam, Viorel Hrebenciuc şi Ilie Sârbu, anamisa di emburi giudicători, ama şi anamisa di prinţul Paul, hiu nipricânâscut a aţilui di ma ninti Rege Carol al II-lea ali Românii, şi mul’iearea aluştui.

Mări percheziţii s-adrarâ, stâmâna aestâ, şi-tu un altu dosar cânâscut — Microsoft, mutrinda contracti di ancupârari, ti cari s-pistipseaşti că furâ preferenţiali, ti sculii, a nâscântor licenţi IT. Tu dosar suntu anyrâpsiti numili a 9 minişţrâ di ma ninti dit guvernări ahât di stânga, ama şi di dreapta, a curi lâ si aduţi câbati ti trafic di influenţâ, lari di pâradz, abuz tu lucru icâ aruşfeti.

Dupu răspunsul pozitiv dat al DNA di Camera a Deputaţlor, procurorl’ii pot s-ahurheascâ urmărirea di turlii penalâ contra a deputatlui Valerian Vreme, ma ninti ministru la Comunicaţii, întrâ an’ii 2010 şi 2012.

Prit aţei câftaţ, mai suntu baia emburi, ama şi aţel di ma ninti director al SIE, Cătălin Harnagea. Tut stâmâna aestâ, deputatlu soţial-democrat Miron Mitrea fu condamnat la 2 an’i di hapsi cu executari ti luari di mitâ. Aestâ sentinţâ nu easti definitivâ.

Ebola, gaile tu tutâ lumea

Gaile tut ma mari şi meatri susto di securitati ti Europa şi SUA di furn’iea a viruslui Ebola, ţi nica nu fu vâtâmat şi cari agiunsi un mari piricul tu lumi.

Tu idyul chiro, s-greaşti tut ma multu ti unâ adunari, unâ mobilizari la nivel mondial contra aliştei problemâ, cari vâtâmâ pânâ tora vârâ 4.500 di oamin’i dit aţeali aproapea 9.000 di cazuri dit şapti vâsâlii: Liberia, Sierra Leone, Guineea, Nigeria, Senegal, Spania şi SUA.

Ca meatrâ di prevenţii, autorităţli români apufusirâ s-da 25 di milioani di lei (vârâ 5,5 milioani di euro) ti andridzearea a unui spital militar di campanii, tu un loc aproapea di Bucureşti, iu s-hibâ agiutaţ oamin’ii, cara ei va s-infecteadzâ cu Ebola.

Echipa naţionalâ di fotbal ali Românii va s-aibâ un nău antrenor

Federaţia di Fotbal di Bucureşti şi antrenorlu Victor Piţurcâ anularâ, Gioi searâ, cu apruchiarea a daulor pârţâ, contractul mutrinda ipotisea di antrenor a echipâl’ei naţionalâ ali Românii.

Imediat dupu aestu lucru, Piţurcâ anyrâpsi un contractu cu clublu Al-Ittihad, ţi easti tora pi doilu loc tu campionatlu saudit. Nâinti s-fugâ tu Golfu, aestu dit soni alâsă Naţionala pi doilu loc dit Grupa F a preliminariilor a Campionatlui European dit anlu 2016, cu şapti puncti dit trei meciuri.

România amintă mecilu cu Gârţia, cu 1-0, ama şi aţel cu Finlanda, scor 2-0, dauli tu deplasari, iara stâmâna aestâ, adră 1-1 cu Ungaria, tu Românii. Yinitorlu meci dit preliminarii easti aştiptat pi 14 di Brumar, Bucureşti, cu liderlu a grupâl’ei, Irlanda di Nord.

Armânipsearea: Cristina Mina

Ascultaţ aoa –>