Eveniment Top – 18.04.2015
FMI alâxi tu crişteari protili estimări mutrinda imnarea ali icunumii româneascâ ti an’ii 2015 şi 2016
România Internațional, 17.04.2015, 13:26
FMI alâxi tu crişteari protili estimări mutrinda imnarea ali icunumii româneascâ ti an’ii 2015 şi 2016
Icunumia româneascâ va s-aibâ un cama mari avansu estan andicra di protlu estimat, tu minduita a Fondlui Monetar Internaţional tu aţel dit soni a lui raportu.
FMI alâxi tu crişteari, cu 0,3 proţenti, la 2,7%, estimărili mutrinda imnarea a Produslui Internu Brut ali Românii tu anlu 2015. Ti 2016, FMI aşteaptâ un proţentu di 2,9%, cama di aţel 2,5% aştiptat tu Sumedru, anlu ţi tricu.
Protlu timel’iu a aliştei imnatâ easti împrustarea a consumlui privat, pi unâ crişteari susto a amintaticlui dealihea, pi pâhadzii ţi scâdzurâ ti petrol şi pi niscânti rati a dobândâl’ei ţi agiumsirâ la niveluri minimi recordu.
Agenţia ti evaluari finanţiarâ Standard&Poors (S&P) minduiaşti că tu chirolu 2015-2018, icunumia ali Românii va s-aibâ unâ criştari di mesi di aproapea 3% pi an. Agentia confirmâ şi rating-urili ali Românii ti borgili pi chiro lungu şi scurtu tu valutâ icâ monedâ localâ, la BBB minus/A-3, perspectiva hiindaei unâ stabilâ.
Audieri tu Parlamentul European mutrinda Mecanismul di Cooperari şi Verificari pi Giustiţii bâgat tu practico ti România şi Vâryâria
Comisia ti Control Bugetar dit Parlamentul European audie, Marţâ, ma mulţâ ofiţiali român’i şi vâryâri tu ţi mutreaşti Mecanismul di Cooperari şi Verificari pi Giustiţii, bâgat tu practico a daulor vâsâlii, dupu ţi intrarâ tu UE, tu anlu 2007.
Aestu lucru vini dupu ţi bâgă zori România, cari minduiaşti că lipseaşti s-îi hibâ pricunuscut tut ţi amintă s-adarâ tu alumta contra a aruşfetâl’ei şi s-aibâ calendar limpid tu ţi mutreaşti intrarea tu spaţiul di libirâ urdinari Schengen.
Procurorlu şef a Direcţil’ei Naţionalâ Antiaruşfeti, Laura Codruţa Kövesi, dzâsi că vigl’iarea europeanâ avu un rol di mari simasii ti alâxearea a sistemlui giudiţiar şi tu alumta cu aruşfetea. Ea adusi aminti că polimlu cu aruşfetea nu lipseaşti s-hibâ dânâsit di alti turlii di catandisi politiţi, ama şi că lipseaşti ca svâsâlia s-asiguripseascâ baia instrumenti ti vâtâmarea aluştui flagel.
Tu Romanii, alumta contra a aruşfetâl’ei la nivel analtu easti dip impresionantâ, spusi secretarlu general ali CE, Catherine Day, tu chirolu a audierilor dit PE, ama dzâsi ş-că lipseaşti criştearea a progresilor tu domenea a giustiţil’ei şi dânâsearea a aruşfetâl’ei ş-la nivel inferior.
Pi di altâ parti, Coaliţia România Curatâ şi Societatea Academicâ Românâ scoasirâ unâ “Hartâ a aruşfetâl’ei localâ”, ţi aspuni zonili dit Românii naima aguditi di aestu flagel.
Tu caplu a tutulor a curi lâ si aduţi câbati, dupu capitalâ, yin giudeţili Maramureş şi Bacău, la polu alantu hiindalor Sălaj, Mehedinţi, Teleorman, Botoşani. Harta fu adratâ pi timeilu a ma multi dati pitricuti di DNA, di aeşţâ dit soni 5 an’i.
Infrastuctura dit Românii
Comisarlu european ti împrustari regionalâ, Corina Creţu, vini tu Românii, iu s-dusi s-veadâ, deadun cu ministurlu a Transporturilor, Ioan Rus, unâ parti dit autosucachea Sebeş-Turda, un proiectu di mari simasii ti CE.
Proiectul adarâ parti dit reţeaua europeanâ di transport TEN-T, pâltit cu pâradz comunitari. Aestâ autosucachi lipseaşti s-hibâ bitisitâ pânâ la giumitatea a anlui ţi yini şi va s-asiguripseascâ ligâtura cu Autosucachea Transilvania şi Culoarlu IV european di transportu cari va s-ducâ la Amarea Lai
.
Pi di altâ parti, tronsonlu Piteşti-Sibiu agiumsi protlu ti bitiseari tu strategia di transportu ali Românii, câ ţe aşi caftâ CE. Lucrâtorl’ii di la uzina di amaxi Dacia Renault di Mioveni inşirâ la protesti stâmâna aestâ, câftândalor a Guvernului s-nu amânâ lucrărli, câ ţe aestu lucru easti piricul ti locurli a lor di lucru.
Polimlu a zboarilor Arusia — România — NATO s-duţi ninti
Tu aeşţâ dit soni meşi, ameninţărili ali Moscovâ mutrinda ma multi vâsâlii europeani iu furâ bâgati elementi dit scutlu american antirachetâ, sum cumândisearea NATO, criscurâ.
Aestu dit soni avertismentu vini di la caplu a Statlui Major al armatâl’ei arusâ, generalu Valeri Gherasimov, cari dzâsi Gioi, ca vâsâlii ca Romania şi Polonia, cari va s-andrupascâ ahtări elementi, va s-hibâ ţinti a Moscovâl’ei.
Aşi cum fu cathi oarâ, şi reacţiili a ofiţialilor di Bucureşti şi a responsabililor NATO nu amânarâ. Tu un mesaj bâgat pi unâ reţea di socializari, premierlu Victor Ponta iara nu apruchie ameninţărili di la ofiţialii ali Federaţii Arusâ şi dzâsi că aestu lucru nu aspari autorităţli români şi niţi nu alâxeaşti strategia ali Românii.
Purtâtorlu di cuvendâ al NATO, Oana Lungescu, deadi nica unâ oarâ asiguripseri că sistemlu di afireari antirachetâ a Alianţâl’ei nu easti contra ali Arusii.
Exerciţii di turlii militarâ sum cumândisearea NATO – tu Românii
Tu catandisea ti tora mutrinda sicuritatea dit regiuni, tu Românii s-adarâ dauâ mări exerciţii militari multinaţionali sum cumândisearea NATO. Tu Sud- Estul ali vâsâlii, cama di 2200 di militari şi tehnicâ di alumtâ dit România, SUA Marea Britanii şi Republica Moldova l’iau parti, pânâ pi 30 di Apriiur, la exerciţilu Wind Spring 2015 (Vimtu di primuvearâ 2015).
Aestu lucru mutreaşti stabilitatea şi sicuritatea regionalâ, maxus tu aestâ di tora greau catandisi, dit partea esticâ ali NATO. Şi tu câsâbălu Câmpia Turzii s-dizvârtescu exerciţii militari la cari l’iau parti cama di 350 di militari american’i şi aproapea 300 di militari român’i.
Comandantul a Forţilor Aerieni Americani dit Europa, general-locotenentul american Darryl Roberson, dzâsi că aesti acţiun’i sunt ca un zbor a soţlor dit NATO, turnat câtâ Arusia, ama şi un zbor ţi-aratâ că SUA caftâ s-asiguripseascâ stabilitatea a Europâl’ei.
Ascultaţ aoa –>
Armânipsearea: Cristina Mina
