Eveniment Top – 18.01.2014
Mihai Pelin, 17.01.2014, 12:08
Caplu ali vâsâlii, Traian Băsescu, s-adună Bruxelles cu prezidentul a Consiliului European, Herman van Rompuy.
România va, ca pânâ tu inşita a anlui, s-agiungâ membru a Spaţiului Schengen di libirâ urdinari – esti zborlu pi cari prezidentul Traian Băsescu îl pitricu, Gioi, Bruxelles, a prezidentului a Consiliului European, Herman van Rompuy. Tu moaubetea cu oficialu european, caplu a statlui român dzâsi că Bucureştiul arătă că da asiguripseri mutrina tin’isearea a statului di îndrept, prit buna imnari a instituţiilor a lui. Tu aestâ catandisi, el câftă ca tu yinitorlu raportu a Mecanismului di Cooperari şi Verificari pi giustiţii – cari va s-aparâ pânâ tu inşita aluştui mesu — s-hibâ dzâs tu unâ turlii obiectivâ tut andicra di buna evoluţii a instituţiilor a statlui român, cari di ma multi ori puturâ s-dânâseascâ problemili dit politicâ. Pi di altâ parti, Bruxelles, prezidentul Băsescu s-aspusi anvirinat că proiectul a gazoductului Nabucco fu dânâsit, lucru cari lipsea s-n’icşureadzâ dependenţa energeticâ ali UE andicra di Arusii.
Libirtatea di urdinari a cetăţen’ilor europen’i fu zburâtâ tu PE.
Tu Parlamentul European fu unâ largâ moaubeti mutrinda libirtatea di urdinari, dupu scutearea a restricţiilor di pi pâzarea a lucurlui ti cetăţen’ii român’i şi vâryâri. Comisarlu ti giustiţii, Viviani Reding, aspusi mutrita ali Comisii, spunândalui nica unâ oarâ că libirtatea di urdinari easti un prinţipiu european di timel’iu şi nu poati s-hibâ interzis. Tu bitisita a moaubeţlor, PE votă unâ rezoluţii, apruchiatâ di nai ma mulţâl’ii dit aţei ţi votarâ, prit cari dzâsi limpid că nu va s-da cali la alâxearea şi limitarea mutrinda libirtatea di urdinari a cetăţen’ilor europen’i. Tu motivaţii dzâsi că vâsâliili membri avurâ baia chiro sâ-şi alâxeascâ sistemili di agiutor soţial ti libira urdinari a lucrâtorilor. Mutarea aluştor restricţii di pi pâzarea a lucurlui ti român’i şi vâryâri, di la 1 di Yinaru 2014, dusi, tu nâscânti vâsâlii mebri, la gaileadz, ama fârâ di timeliu, câ ţe numirlu a imigranţilor fu multu n’ic andicra di ţi aştiptau.
Alâxerli adusi di Parlamentu a Codlui Penal sunt paranom – apufusi Curtea Constituţionalâ ali Românii.
Curtea Constituţionalâ ali Romanii apufusi că alâxerli pi cari deputaţii li adrarâ, meslu ţi tricu, a Codlui Penal sunt paranom. CCR deadi giuiapi”, aşi, la raporturli pitrcuti di Nalta Curti di Casaţii şi Giustiţii şi di protlu partid di opoziţii, PDL. Nalta Curti pistipseaşti că alâxerli nu suntu compatibili cu buna imnari a statlui di îndrept, iara tu minduita al PDL, caplu ali vâsâlii, parlamentarl’ii şi aţei cu profesii di turlii liberalâ nu mai intrâ tu categoria a funcţionarilor publiţ, lucru cari însimna că ei nu mai puteau s-hibâ cercetaţ şi pidipsiţ ti aruşfeti, abuzu tu lucru, luarea di pâradz icâ traficlu di influenţâ. Tu soni, alianţa di ţentru-stânga di la guvernari, USL, hâbârisi câ aproachi iara moaubetea andicra di Codlu Penal.
Executivlu di Bucureşti alâxeaşti nomlu mutrinda vindearea a terenurilor agricoli.
Guvernul român va s-alâxeascâ nomlu a vindearâl’ei a terenurilor agricoli, dupu ţi prezidentul Traian Băsescu câftă ca documentului s-hibâ zburât nica una oarâ. Tu noaua formâ, actul normativ spuni că terenlu nu poati s-hibâ vindut cu pâradz ma pţân’i andicra di ofertâ, iara vindearea a terenurilor ma mări di 30 di hictari lipseaşti s-hibâ apruchiatâ di unâ direcţii ahoryea înhiinţatâ. Tu idyul chiro, vinderea a unui teren va s-hibâ anulatâ maca tranzacţia va s-hibâ adratâ la un pâhă cama bun andicra di aţel dit oferta di vindeari. Ta s-hibâ limpid – şi titlul va s-hibâ alâxit şi va-s mutreascâ şi terenurili di nafoara a câsâbadzlor.
Tu Românii, referendumlu ti alâxearea a Nomlui di Timeliu va s-ibâ deadun cu alidzerli europarlamentari, tu inşita a meslui Mai.
USL şi-aspusi planlu di acţiuni politicâ tu 2014. Prit alti lucri, aestâ dit soni mutreaşti bâgarea deadun a referendumului ti alâxearea a Nomlui di Timeliu cu alidzerli europarlamentari, tu inşita a meslui Mai. Întreaga moaubeti mutrinda aestu lucru lipseaşti s-tindâ pi dauâ dzâli. Ta sâ-i creascâ şansili di apruchiari, tu sinfuniili tu cari aestu lucru nu s-poati fârâ unâ partiţipari di 50% dit numirlu a aligâtorilor angrâpsiţ pi listili electorali. Aţei ţi cumândisescu USL, premierlu soţial-democrat Victor Ponta şi liberalu Crin Antonescu spun că aestâ comasari nu va-s ducâ ici la lucri tulburi, iara opoziţia democrat – liberalâ şi reprezentanţâl’ii a minoritatâl’ei maghiarâ nu u vor ici. Liderii USL apufusirâ ca alidzerli prezidenţiali s-ahurhascâ tu prota parti a meslui Brumar, cu 45 di dzâli nâinti di bitisearea a mandatlui di prezindetu al Traian Băsescu.
Dzua a Culturâl’ei Naţionalâ fu yurtusitâ şi tu Românii şi tu xeani.
Dzua di 15 di Yinaru, cându s-amintă marli poet român Mihai Eminescu, easti yurtusitâ ahurhida cu 2011, tu cathi an, ca Dzuâ a Culturâl’ei Naţionalâ. Suntu yutusiti ma multi valori dit cultura româneascâ dit tuti domeniili – literaturâ, muzică, teatru, filmu, sculpturâ, picturâ icâ arhitectură. Tu vâsâlii şi tu xeani furâ andreapti manifestări la cari luarâ parti personalităţ dit bana culturalâ şi artisticâ. ICR yurtusi aestâ dzuâ la Berlin, cu un spectacol di teatru, la Budapesta, cu expoziţia di picturâ “Excelsior – pictori contemporan’i român’i”, la Stokcholm, cu Gabriela Melinescu şi cu Dana Dragomir, la Praga, cu rspectacolu a actorlui Emil Boroghinâ, “La steaua cari apiri”, ama şi la Londra, prit omulu di teatru Constantin Chiriac şi prit lucurlu, creaţia al Silviu Purcărete.
Apriduţearea: Cristina Mina
