Eveniment Top – 15.02.2014
Moaubeţ tu USL
România Internațional, 14.02.2014, 12:17
Moaubeţ tu USL
Tu suţata di ţentru-stânga, tora la puteari tu Românii, USL, “pâzâripserli” mutrinda naua strcturâ a guvernului agiunsi, di oarâ, tu un loc fârâ di scuteari la cap. Moaubeţli dintr liberali, cari vor s-şi alâxeascâ partea a lor dit guvernu, şi soţial-democraţ bagţ sum antribari chiola şi yinitorlu al USL. Maca pripunerli a liberalilor mutrinda portofoliili di Icunumii, Sânâtati şi Finanţi nu adrarâ problemi, ti cumândisearea a Internilor şi postlui di viţepremier nu fu aşi. Niachicâserli vinirâ cându liberalii vrurâ ca edilu a Sibiului, Klaus Iohannis, s-aibâ dauâ ipotisi. PSD, aţel cari tu USL adra, deadun cu PC şi UNPR, Uniunea Soţial Democratâ (USD), apruchie pripunearea a liberalilor, ama ti cari câftarâ, ca alâxeari, suplimentarea a ipotisilor di viţepremier, di la trei la patru. PSD va ca năulu postu di viţepremier s-hibâ a PC-lui. Câ ţe pistipseaşti ca PC nu ari baia puteari s-treacâ pisti praglu electoral, PNL, doilu numir dit USL şi dit vâsâlii, nu apruchie ici aestu lucru. Moaubeţli mutrinda naua formulâ di guvernari criscu numirlu a zborurilor tu ţi mutreaşti aspârdzarea al USL, cari, dzâc analişţâl’ii politiţ, niham câti niham, agiunsi multu n’icâ ti orgoliili ahântu mări.
Curtea Constituţională — di Nomlu a descentralizâl’ei
Prit pruverdli ici limpidz, problemi greali di tehnicâ legislativâ şi reglementări ţi s-bat cap pi cap, aspusi Curtea Constituţionalâ ali Românii (CCR) apofasea mutrinda niapruchiarea (di meslu şi tricu) a Nomlui a descentralizarâl’ei. Ma multu, dzâc giudicâtorl’ii, tu nom ari termeni multu şcurţâ şi nu ari studii di impactu icâ standardi di pâhă. Pi aesti Nom a descentralizarâl’ei, giudicat ti aestu formă, di Opoziţii, Guvernul işi luă borgea dinâintea a Parlamentului tu Brumar 2013. Domeniili câftati di descentralizari earau, prota: agricultura, sânâtatea, mediul, cultura, tiniretlu şi sportul. Descentralizarea easti vidzutâ ca un pas adrat nâinti câtâ regionalizari — unlu dit nai ma mărli proiecti ali Românii dit tut chirolu di dupu comunismu.
Ligâtura româno-americanâ
SUA alavdâ sucţeslu ali Românii – ca soţ democratic cu un mari stat di îndreptu, tu catandisea tu cari aesti dauâ vâsâlii nica au şi borgi deadun, ama şi un parteneriat strategic. Aestu zbor easti a viţeprezidentului SUA, Joi Biden, dit unâ moaubeti pi tilifoni ţi u avu cu prezidentul Traian Băsescu. Cu aestâ furn’ii, analtul ofiţial american alâvdă agiutorlu pi cari România îl da tu misiun’ili NATO. Tu idyul chiro, ca semnu a ligâturlor buni di dauli părţâ, tu România va s-adarâ unâ bazâ militarâ tu sudlu ali vâsâlii şi va s-hibâ andreptu aoa şi scutlu antirachetă pi cari SUA îl va tu Europa. Cu tuti că politic şi militar, Bucureştiul şi Washingtonlu nu furâ canâoarâ ma aproapea ca tora, ligâturli ahurhiti nica dit inşita a an’ilor ’90, prit un parteneriat strategic, s-poati s-hibâ ş-cama buni. SUA nu easti prit nai ma mărl’ii investitori tu România şi, ma multu, nica nu mutâ vizili ti cetăţen’ii român’i cari vor s-ducâ aclo – iara Bucureşti aestu lucru nu easti ici ghini apruchiat.
