Eveniment Top – 14.03.2014
Catandisea di Ucraina
România Internațional, 14.03.2014, 12:27
Catandisea di Ucraina
România nica armâni cu gaile cu ţi mutreaşti catandisea greauâ di Ucraina şi s-alumtâ, şi la nivel european şi euro-atlanticu ti arâhatea ti vâsâlia viţinâ. Ti aestâ, aduţem aminti di vizita di lucru ţi u adră şeflu ali diplomaţii di Bucureşti, Titus Corlăţean, Luni, la Kiev, dupu ţi fu câlisit di omologlu a lui ucrainean, Andri Deşciţa. Colâţean, cari mai zburâ di baia ori şi cu prezidentul interimar, Olexandr Turcinov, şi cu premierlu Arseni Iaţeniuk, i-aspusi a reporterlui di la Radio România la Kiev că România andrupaşti calea europeanâ ali Ucrainâ. Tu ţi mutreaşti consultarea a poplui dii Crimeea mutrinda alichirea ali Arusii la regiunea iu nai ma mulţâl’ii u vor aestâ dit soni, România pistipseaşti că aestu lucru easti paranom. Bucureşti, prezidentul Traian Băsescu dzâsi şi el că România andrupaşti independenţa şi suveranitatea ali Ucrainâ.
Nomlu a ţertificatilor verdzâ
Prezidentul Traian Băsescu apruchie nomlu a ţertificatilor verdzâ, spunândalui că nu va s-îi si aducâ câbati di criştearea a pâhălui ali energhii electricâ. Ţertificatili verdzâ sunt acti ţi aspun că unâ parti dit energhia electricâ yini di la sursi ţi nu chier. Premierlu Victor Ponta dzâsi câ niapruchiarea aluştui nom di Traian Băsescu putea s-aibâ ligâturâ cu intereslu aluştui mutrinda andruparea a companiilor privati sâ ş-li’a nâpoi cama ayoniea, prit criştearea a pâhălui tu facturâ, investiţia ţi u adrarâ tu energhia regenerabilâ. Tu minduita a premierlui, prit aestu nom va s-hibâ data na nâparti scunchirea ali energhii tu industrii şi popul, câ ţe aestu ţâni, di oarâ, la 11% dit întreglu consum di electricitati ti cari sunt dati ţertificati verdzâ. Fârâ aestu nom, nivelu va s-criştea, dit Apriiur, la 15%. Sindicalişţâl’ii dit metalurgii, unâ ramurâ industrialâ ţi mâcâ” baia energhii, protestarâ tu aesti dit soni dzâli ti apruchiarea aluştui nom.
Marli scandal mutrinda carnea aspartâ
Cama di 100 di percheziţii ţi li adrarâ procurorl’ii di la vâtâmari organizatâ tu Bucureşti şi tu mai multi giudeţi dit România dusirâ la baia arestări Acţiun’ili mutrirâ aspârdzearea a dauâ grupuri organizati, cu infracţiun’i di evaziun’i fiscalâ, lari di pâradz, bâgarea pi pâradz a nâscântor mâcări asparti icâ trafic di influenţâ. Uidisit cu anchetatorl’ii, membrii dit aesti grupări, ţi s-află pi ma multi niveluri, luarâ, cu agiutorlu a nâscântor societăţ comerţiali dit Românii, carni şi oauâ dit Olanda, Polonia, Marea Britanii şi Ghermania, fârâ s-pâlteascâ TVA. Dapoaia, cându li vindurâ aoa, icâ prit bâgarea ali unâ taxâ, icâ “pi ascumta”, multu sum pâhălu di pi pâzari. Unâ altâ turlii di evaziuni mutreaşti ancupârarea a produsilor dit alti vâsâlii UE, ama iu membrii aţilor grupări înreghistreadzâ vinderi psfefti câtâ firmi fantomâ dit Vâryârii, Ungaria icâ Cipru, marfa hiinda vindutâ tu Românii fârâ s-hibâ înreghistratâ tu acti contabili. Tu minduia a anchetatorilor, pâradzl’ii chiruţ trec praglu di 15 milioani di euro. Ei aflarâ suti di toni di carni icâ produsi dit carne, iara dit duchen’i scoasirâ vârâ 19 tone.
Cazlu Vona
Ministerlu român di Interni îi pitricu a şeflui ali vâsâlii tuti actili ţi lipseau ti declararea a aţilui ţi cumândiseaşti partidlu parlamentar extremistu Jobbik dit Ungaria vâţinâ, Vona Gabor, ca om di niapruchiat tu Românii. Hâbarea vini di la premierlu Victor Ponta, cari dzâsi că, maca prezidentul, ca şef al CSAT, aproachi aestu lucru, apofasea va s-intrâ di-unâoarâ cu practico. Acţiunea a Executivlui di Bucureşti ahurhi dupu ţi, Luni, la Târgu Mureş, ma mulţâ membri dit Jobbik luarâ parti la unâ manifestari ţi dusi la alumti cu autorităţli. Ei aurlarâ ti autonomia a locurilor dit aşi-dzâslu Ţinut Secuiescu, zonâ dit România iu maghiarl’ii sunt cama mulţâ. Prezidentul Traian Băsescu lâ aspusi a politicien’ilor dit Ungaria, ţi suntu tora tu campanii electoralâ şi cari va s-yinâ tu Românii, sâ tin’iseascâ tuti nomurli şi maxus Nomlu di Timel’iu ali vâsâlii. Tu un mesaj anzrâpsit ş-pi internet, pi unâ frândzâ di moaubeti, di socializari, Vona Gábor dzâsi că Traian Băsescu şi Victor Ponta icâ furâ dezinformaţ, icâ adarâ vârâ gioc politic contra a maghiarilor.
Târgul di Turism
Aproapea 300 di companii di turismu şi-aspun pânâ Dumânicâ ofertili la Târgul di Turismu ali Românii, dişcl’is Bucureşti. Agenţiili di turismu n’icşureadzâ pâhadzl’ii cu pânâ la 50% ti vacanţili tu vâsâlii icâ tru xeani. Un studiu ali unâ companii di ţerţetari aspuni că un român dit ţinţi nu fu tu vacanţâ tu anlu ţi tricu, iara estimărli ti estan criscurâ niham. Aşi, 22% dintrâ român’i nu fudzirâ tu vacanţâ tu anlu ţi tricu, iara tu aestu an giumitati dintrâ aţei ţi furâ antribaţ dzâsirâ câ vor s-ducâ iuva tora veara. Vârâ tril’imi di ei ş-andregu yinitoarea vacanţâ tâşi 2015. Aestu studiu fua drat tu meslu Şcurtu, pi 1.078 di persoani di pisti 18 ani.
