Eveniment Top – 13.09.2014
Corina Creţu — comisar evropean ti politiţ regionali
România Internațional, 12.09.2014, 12:31
Corina Creţu — comisar evropean ti politiţ regionali
Prezidentul aleptu a năului Executiv comunitar, Jean-Claude Juncker, aspusi structura ali Comisii ti chirolu 2014-2019. România, prit eurodeputata Corina Creţu, va s-ţânâ portofolilu Politiţ Regionali, cu un buget di 350 di miliardi di euro şi cari s-aibâ angâtan di criştearea icunumicâ şi adrarea di locuri di lucru – prinţipii hâbârisiti ca proti lucri ti mutreari tu programlu politic al Jean-Claude Juncker: Cu aestâ nauâ Comisii, him tin’isiţ, ama avem şi borgea s-dăm cali la unâ nauâ anchisitâ tu Evropa, s-ahurhim s-lucrăm ta s-mutrim ti unâ catandisi geopoliticâ greauâ şi s-aduţem pi calea aţea buna icunumia dit Uniunea Evropeanâ. Vrem s-mutăm unâ Uniuni cari s-aibâ locuri di lucru şi crişteari di turlii icunumicâ.”
Lucrul că România ari tora borgea s-aibâ angântan di politiţli di împrustari regionalâ easti, tu minduita a premierlui Victor Ponta, un sucţes a Bucureştiului.
Năi sancţiun’i ti Arusii
Prezidentul Barack Obama dzâsi că SUA easti anamisa di Uniunea Evropeanâ tu ţi mutreaşti nicânti sancţiun’i ma greali contra ali Ausii ti intervenţia a ei tu vâsâlia Ucraina — iara aesti sancţiun’i mutrescu sectoarili di afireari, di finanţi şi energii.
Obama spusi şi câ năili sancţiun’i va s-creascâ izolarea di turlii politicâ ali Moscovâ şi va s-atingâ icunumia ali Arusii. Dit 12 di Yismârciun, năili sancţiun’i furâ bâgati ş-tu practico. Aesti dit soni sancţiun’i caftâ n’icşurarea a acceslui la pâzărli di capital ti mărli companii petrolieri şi di afireari aruseşţâ.
Pi di-alantâ parti, Moscova hâbârisi că îndreapsi meatri di retorsiuni ti vâsâliili ocţidentali cari aproachi sancţiun’i contra ei. Tora ayoniea, premierlu Dmitri Medvedev dzâsi că Arusia nu va s-tacâ dinâintea aluştor sancţiun’i, ş-poati chiola s-nu mai alasâ aeroplanili a vâsâliilor dit Ocţidentu s-azboairâ tu spaţilu a ei. Tu idyul chiro, marea vâsâlii dit Estu poati s-nu mai aproachi importul di amaxi şi produsi dit industra lişoarâ.
Nomuri di impactu soţial
Proiectul di nom cari mutreaşti n’icşurarea ali contribuţii ti asiguripserli soţiali cu ţinţi proţenti la angajator fu apruchiat, stâmâna aestâ, tu Udălu a Deputaţlor di la Bucureşti.
Ministrul di finanţi, Ioana Petrescu, dzâţi că suntu resursi cari s-compenseadzâ n’icşurarea a veniturilor la buget, ahât ti inşita aluştui an, ama şi ti anlu ţi yini. Tu meslu Alunar, prezidentul Traian Băsescu hâbârisi că andrupaşti aestâ meatrâ, ama pitricu textul tu Parlamentu ti unâ nauâ examinari, câ ţe ari îndauâ rezervi andicra di sustenabilitatea aliştei dit soni
Un altu actu normativ fu apruchiat di parlamentari, icâ aţel mutrinda amnistia fiscalâ ti mami, pensionari şi bugetari, cari s-hârsirâ di niscânţâ pâradz, ama fârâ timel’iu, ti furn’ia a nâscântor calculi ţi nu furâ buni. Ministerlu a Lucurlui estimeadzâ că easti zborlu di vârâ 20.000 di mami, 50.000 di pensionari şi 25.000 di bugetari, iara nomlu va s-intrâ tu practico ahurhinda cu 1 di Yinaru 2015.
Pâradzl’ii va s-hibâ daţ nâpoi tu rati isa, pi un chiro maxim di 5 an’i. Chiola pistipsi că suntu gesturi di turlii electoralâ, opoziţia apruchie documentili.
Evoluţia ali icunumii româneascâ
Performanţili di turlii icunumicâ ali Românii aspun că aestâ dit soni agiunsi unlu dit liderl’i, tu ţi mutreaşti redresarea evropeanâ, împrustarea a ei trincânda aştiptărli, cu un PIB tu crişteari cu 3,5% tu 2013 şi cu perspectivi buni ti 2014, uidisit cu un studiu ţi mutreaşti piricul di vâsâlii — adrat di Coface.
Pâradzl’ii nai ma mulţâ vinirâ dit sectorlu agricol, ama şi dit industrii, maxus dit producţia di amaxi, cari exportă ma multu tru xeani. Uidisit cu studiul, criştearea PIB-lui ali icunumii româneascâ întricu tuti aştiptărli, nai ma marea crişteari hiinda di 5,1%, înreghistratâ tu aţei dit soni trei meşi.
Proţl’ii factori ţi agiutarâ criştearea di anlu ţi tricu furâ exporturili, maxus aţeali di produsi agricoli şi amaxi. Pi di altâ parti, tu anlu 2013, producţia agricolâ româneascâ s-mută la 17 miliardi di euro, icâ vârâ 5% dit producţia agricolâ ali UE, exiyisescu analişţâl’ii Coface. Aştiptărli mutrinda producţia agricolâ dit 2014 sunt turlii-turlii, ama s-poati ca recolta s-hibâ cama n’icâ andicra di 2013. Tu idyul chiro, exporturili va s-hibâ nica determinati di câftarea di amaxi năi, cari agiutâ multu industria româneascâ.
Unâ nauâ scuteari dit ipotisi al Traian Băsescu?
Caplu a Senatului, Călin Popescu Tăriceanu, ahurhi acţiun’ili ti scutearea dit ipotisi a prezidentului Traian Băsescu.
El pripusi a liderilor dit grupurili parlamentari propus şi un calendar ti aestu dit soni lucru: pi 23 di Yismârciun, Parlamentlu lipseaşti s-da votlu final mutrinda suspendarea, iara pi 2 di Brumar s-hibâ-ndreptu referendum-lu, unâoarâ cu protlu tur a alidzerilor prezidenţiali.
Tu minduita al Călin Popescu Tăriceanu, purtata a prezidentului nu tin’iseaşti cadrul constituţional, câ ţe, di multi ori, el alâsă s-veadâ că andrupaşti niscânti partidi tu campania electoralâ.
Armânipsearea: Cristina Mina
