Eveniment Top – 13.02.2016

Nica niham pânâ la alidzerli locali dit Românii

Roxana Vasile, 12.02.2016, 12:42

Guvernul tehnocrat ali Românii apufusi, N’iercuri, ca alidzerli locali s-dizvârteascâ Duminicâ, 5 di Cireşar. Ti andridzearea aluştor tu nai ma buni sinfunii, icâ ti alidzerea a consilierilor locali, giudeţeni şi a primarlor, executivlu deadi di la bugetlu di stat ma mulţâ pâradz andicra di cât deadi cu patru an’i ninti — cama di 350 di milioani di lei, vârâ 75 di milioani di euro.

Candidaturili pot s-hibâ pitricuti tu chirolu 11 – 26 di Apriiur. Campania electoralâ va s-ahurheascâ pi 6 di Maiu şi va s-ţânâ 30 di dzâli. Cara va s-alumtâ cu vârâ balotaj icâ fraudâ di turlii electoralâ, un nău tur va s-hibâ andreptu pi19 di Cireşar.

Anvirinat di Nomlu electoral di tora, şi cu scupolu ta s-bagâ tu practico votlu tu dauâ tururi, Partidlu Naţional Liberal hâbârisi că va s-pitreacâ tu giudicatâ Guvernul. Coprezidentul a liberalilor, Alina Gorghiu, dzâsi: Nu ari democraţii tu Românii, maca nu va s-amintăm s-bâgăm tu practico dauâ tururi di scrutin. Cara va s-avem maşi un gol tur, primarl’ii cari va s-iasâ di pi ipotisi va s-hibâ iuva la 15-17 proţenti. Tu sinfuniili tu cari nomlu va s-da cali ş-ti doilu tur, va s-triţem di 70% di primari năi pi ipotisi”. Lipseaşti spus că dupu alidzerli locali di veara ţi yini di toamna, yin aţeali legislativi.

Strategii di turlii guvernamentalâ contra a urfanâl’ei

România trapsi mutrita a premierlui Dacian Cioloş – ari baia oamin’i ţi suntu sum praglu a urfanâl’ei, iara 1,7 milioani dit ei suntu cilimean’i. Ti andruparea lor, Executivlu apruchie, stâmâna aestâ, unâ strategii pi chiro lungu ti alumta cu urfan’iea.

Caplu a Executivlui mindui un stog di meatri cari s-measticâ pâradzl’ii di la buget cu aţei europen’i. Dacian Cioloş: La amintari, s-asiguripsim, dincolo di un agiutor ti control la yeatur, di turlii medicalâ, vaccinuri şi s-avem angâtan ca tuţ ficiuriţl’ii s-aibâ identitati. Sunt cazuri di cilimean’i a curi fumel’i nu au casâ, un loc stabil, ş-ti aţea ei armân fârâ identitati. S-andridzem Programlu Naţional Cathi ficiuric tu grădiniţâ“ cu-ndauâ meatri cari s-agiutâ la ancupârarea di lucri ti sculii, stran’i icâ, vitamini. Tu idyul chiro, lipseaşti s-n’icşurăm abandonlu a sculiilor.

Sânâtatea la român’i

Alumta cu bolili custuseaşti cama pţân andicra di tratarea aluştor, iara efectili a unui program di prevenţii poati s-veadâ tu vârâ ţinţi-dzaţi an’i. Ahurhindalui di la aesti prinţipiu, ma mulţâ parlamentari liberali pitricurâ unâ iniţiativâ di turlii legislativâ uidisit cu cari român’ii cari nu vor s-l’ia parti la programili naţionali di prevenţii tu sânâtati pot s-hibâ bâgaţ zorlea s-pâlteascâ, întreg icâ nu, hărgili a tratamentilor, cara va s-lândzidzască. Proiectul — multu zburât — easti tu moaubeti publicâ pânâ la 1 di Marţu.

Pi di altâ parti, Ţentrul Naţional di Vigl’ieari şi Control a Bolilor Transmisibili hăbărisi că gripa a poruclui agudi 8 oamin’i tu prota stâmână a meslui Şcurtu. Cu tut, iarna aestâ, 9 român’i chirurâ dupu ţi luarâ viruslu AH1N1. Yeaţârl’ii sunt pi lucru şi dupu ţi ma mulţâ ficiuriţ cu ilichii di sum doi an’i furâ internaţ tu spitali dit Bucureşti şi dit Argeş cu infecţii digestivi greali, cari lâ deadi problemi renali a nâscântor di ei.

Cumândisearea ANAF, scoasâ di pi ipotisi

Daniel Diaconescu luă tuti atribuţiili di prezidentu temporar, di oarâ, ali Agenţii Naţionalâ di Administrari Fiscalâ dit Românii. Hâbarea vini dupu ţi premierlu Dacian Cioloş l-u scoasi di ipotisi, Gioi, pi Gelu Diaconu di la cumândisearea ali instituţii.

El şi viţeprezidentul ANAF – şi el scos di pi lucru – Mihai Vătăşoiu, suntu câftaţ penal t-un dosar di aruşfeti tu cari suntu câftaţ şi diputaţl’ii Mădălin Voicu (PSD) şi Nicolae Păun, reprezentantu tu Parlamentu ali minoritati ghifteascâ. Ti aeşţâ doi dit soni, procurorl’ii contra-aruşfeti câftarâ arestarea preventivâ. Al Mădălin Voicu şi al Nicolae Păun lâ si aduţi câbati di luari ţi ufiliseari paranom icâ ici cum lipsea – a pâradzlor europen’i tu nâscânti proiecti ti comunităţli di ghifţâ

Tu minduita a procurorilor, tu chirolu 2010-2015, sum zborlu că va s-agiutâ n’ii di ghifţâ s-şi-aflâ di lucru, ei andreapsirâ un plan prit cari deturnarâ cama di 6 milioani di euro ti interesi personali.

Protlu torţionar român — ahapsi

La 90 di an’i cât ari, aţel di ma ninti comandantu a Hapsil’ei di la Râmnicu Sărat, dit Sud-Estul ali Românii, Alexandru Vişinescu fu pitricut tu hapsi, N’iercuri, dupu-ndauâ sâhăţ dupu ţi fu condamnat definitiv di Analta Curti di Casaţii şi Giustiţii la 20 di an’i di hapsi ti infracţiun’i contra ali umanitati. Easti protlu ahtari caz dit instanţili româneşţâ cari mutreaşti fapti dit chirolu comunistu.

Întrâ an’ii 1956 şi 1963, cându Vişinescu cumândisea hapsea, mulţâ deţinuţ politic — ţi nu apruchiau regimlu comunistu — tricurâ prit catandisi greli, inumani di banâ.

Giudicâtorlu Valentin Şelaru exiyiseaşti: Vişinescu Alexandru, tu ipotisea di cap a Penitenciarlui Râmnicu Sărat, ti furn’ii di turlii politicâ, el bâgă tut colectivlu a deţinuţlor la tratamenti di torturâ fizicâ, psihicâ şi vâtâmari. Moartea a deţinuţlor yinea, aşi, dupu un chiro lungu, ama greu di torturâ fizicâ şi psihicâ. Uidisit cu ma mulţâ oamin’i di isturii, cama di 600 di n’ii di român’i furâ bâgaţ ahapsi tu furn’ii politiţi tu chirolu a comunismului dintrâ 1947 şi 1989.