Eveniment Top – 12.01.2013

Florin Orban, 12.01.2013, 11:28

Print

Premierlu român, Victor Ponta, zburâ di protili elementi a proiectului di bughet pi 2013 Premierlu român, Victor Ponta, prezentă protili lucri a proiectului di bughet pi 2013. Aşi, bughetlu ari la bazâ unâ crişteari icunumicâ di 1,8%, un deficit bughetar di 2,15% dit PIB şi un cursu valutar di 4,5 lei/euro. Uidisit cu zboarâli al Ponta, România va s-aibâ, estan, un PIB di vârâ 140 di miliardi di euro. Pâradzl’ii ţi va s-yinâ a statului va s-agiungâ la 46 di miliaradi di euro, iara hârgiuirli va s-hibâ di 49 di miliardi di euro. Dinclo di cifri, guvernul di centru-stânga di Bucureşti va s-ampuliseascâ — dzâţi Ponta — s-încl’idâ, tu 2013, ţerclu di patru an’i multu grei, întrâ cari doi di recesiuni multu lai. “Anlu aestu nu s-poati s-avem năi crişteri a arugârilor a bughetarilor icâ a pensiilor”, spusi premierlu. Pi di altâ parti, executivlu va s-ducâ ninti, tu chirolu 2013–2016, reforma a oamin’ilor ţi lucreadzâ tu sistemlu di stat, a pâradzlor daţ ti ei, a sistemlui fiscal şi di adunari a taxilor. “Avem oamin’i tu birouri ţi au di ţinţi ori ma mulţâ pâradz andicra di un yeatur, dascăl icâ poliţistu”, mai dzâsi Ponta. Varianta dit soni a proiectului di bughet va s-hibâ – easti limpidi — pomlu a moaubeţlor pi cari reprezentanţâl’ii a executivlui va li aibâ, stamina ţi va s-yinâ, Bucureşti, cu delegaţia FMI. Tu idyul chiro, tu aeşţâ dit soni an’I, Fondlu avu unâ cuvendâ multu greau tu apofasili cu impactu major luati di autorităţli români. Tu 2013, s-poati ca român’ii s-pâlteascâ taxi şi impoziti criscuti Guvernul di Bucureşti apruchie unâ ordonanţâ ţi da cali, estan, a autorităţlor locali s-creascâ icâ nu, taxili si impozitili cu 16% – rata ali inflaţii tu Românii tu aţei dit soni trei an’i. Pânâ tora agiustarea a taxilor locali eara unâ borgi zorlea pitricutâ di analtu, di la nivel ţentral. Premierlu Victor Ponta, dzâsi că maca autorităţli locali va s-ţânâ taxili si impozitili la nivelu aţilor dit 2012, lipseaşti s-discurcâ cum pot, singuri, câ ţe nu va s-l’ia ma mulţâ pâradz di la guvernu. BNR caftâ bâgari di oarâ tu ţi mutreaşti hârgiuirea a pâradzlor publiţ Tu idyul chiro tu cari executivlu îndreadzi bughetul, guvernatorlu ali Băncâ Naţionalâ ali Românii (BNR), Mugur Isărescu, dzâţi că, tu 2013, lipseaşti unâ hârgiuiri pi anarga a pâradzlor publiţ. Ama, anticipeadzâ Isărescu, politica fiscalâ di estan nu va s-mai hibâ unâ di strindzeari finanţiarâ, ma di consolidari. Guvernatorlu BNR spusi: Politica fiscalâ dit estan pistipsescu că va s-hibâ unâ normalâ, icâ nu va s-ducâ ninti vârâ agiustari, vârâ strindzeari masivâ a defiţitului, aşi cum fu tu anlu ţi tricu; va s-axeadzâ pi consolidari. Pistipsescu câ prit unâ disţiplinâ finanţiarâ cum lipseaşti — icâ unâ hârgiuiri pi anarga a pârălui public – nu ari cali ti austeritate. Şi politica monetarâ di estan va s-hibâ unâ normală — va s-mutreascâ ghini câtâ iu s-duţi inflaţia şi va s-calibreadzâ tuti instrumentili ţi li avem. Cadrul general armâni aţel a achicâserilor cu instituţiili finanţiari internaţionali”. S-poati ca Romania s-hârseascâ — disnău – di pâradl’ii daţ prit POSDRU Comisia Europeanâ va s-pitreacâ iara pâradz câtâ Românii ti Programlu Operaţional Sectorial TI Împrustarea a Resursilor Umani (POSDRU), nai ma sigur, tu şcurtu, dzâsi comisarlu european ti Ocuparea a Forţâl’ei di Lucru şi Afaceri Sociale, Laszlo Andor. Autorităţli di Bucureşti adrarâ progresi multu importanti mutrinda limpidzâmea a proiectilor prit POSDRU, ama aesti lipseaşti s-hibâ confirmati di misiunea di audit ditru inşita a meslui, mai dzâsi oficialu european. Pâlterli prit POSDRU – unlu dit nai ma importantili programi cu finantari comunitarâ di cari s-hârseaşti România — furâ dânâsiti nica dit vearâ, ti furn’iea a grealilor problemi ţi s-aflarâ tu darea şi buna imnari a proiectilor. Intemperiili afecteadzâ România Arcoarea şi sindilia acâţarâ, tu aestâ stâmânâ, Romania. Nai ma lailu fu nord-estul ali vâsâlii, iu cama multi câl’iuri naţionali şi giudeţeni furâ incl’isi, iara ma mulţâ câsâbadz armasirâ fârâ energhii electricâ. Minima termicâ dipusi pânâ la minus 30 di gradi C. Şi poleilu deadi dureri di cap şi a şoferilor, ama si pieton’ilor. Român’ii cari studiadzâ tru xeani, premiaţ Bucureşti Liga Studenţâlor Român’i ditru xeani apruchie, tu cadrul a unâ galâ andreaptâ Bucureşti, Premiili ti Excelenţâ Academicâ tu anlu universitar 2011-2012. Concursul, la cari s-înscrisirâ 200 di studenţâ, masterandzâ şi doctorandzâ fu giurizat di personalităţ dit lumea academicâ, culturalâ şi publicisticâ. Marli premiu -“Studentul Român a Anlui ditru xeani” — ifu dat al Sergiu Paşca (30 di an’i), cercetător la Universitatea Stanford dit SUA. La ediţia di tora a Galâl’ei, fu lansatâ strategia SMART Diaspora (Strategia Multidimensionalâ di Aduţeari tu Românii a Tinirilor dit Diaspora) ţi va s-lişureadzâ inearea disnău tu vâsâlii a absolvenţâlor român’i ditru xeani.