Eveniment Top – 10.10.2015
România, agiutor tu catandisea a refugiaţior
Roxana Vasile, 09.10.2015, 12:42
România, agiutor tu catandisea a refugiaţior
România nu s-alumtâ cu o crizâ a refugiaţior. Andicra di aţeali 900 di câftări di azil tu anlu 2014, estan s-inregistrarâ maşi 44 ma multi. Şi aşi, cara va s-yinâ migranţâ, furâ andreapti unâ n’ii di locuri di apanghiu.
Tu ţi mutreaşti legislaţia naţionalâ ti agiutorul dat a aţilor cari s-adunâ, cari s-refugiadzâ tu Europa ti furn’iea a polimlor icâ a urfanâl’ei, aestâ lipseaşti alâxitâ, câ ţe catandisea nu easti para bunâ. Caplu a executivlui, Victor Ponta: Nica avem tu practico un nom dit anlu 2006, prit cari dăm, ti tuti hârgili mutrinda un refugiat politic, 3 lei pi dzuâ, iara ti hârgili a cathiunlui, 60 di bani. Guvernul, Ministerlu di Finanţi câtâpâţescu tora s-alâxeascâ sumili, câ ţe nivelu a lor easti di arâdeari, di mari arşini. Lipseaşti alâxit, tu idyul chiro, acceslu la serviţiili di sânâtati şi la anvâţari, sculii şi facultăţ dit România câftandlor documenti di la refugiaţ cari au sculia icâ universitatea asparti tu polim, lucru cari duţi, easti limpid, la niputearea di anviţari t-un sistem uidisit.
România tâcseaşti solidaritati — mai dzâsi premierlu Ponta, spunândalui şi că Guvernul va s-andrupascâ finanţiar şi logistic, pi chiro şcurtu şi di mesi, vâsâliili cari deja agiutâ refugiaţ, maxus Turchia şi Iordania.
România şi NATO
Hiindalui Gioi, Bruxelles, la andamusea tu Consiliu Nordu-Atlantic a minişţrâlor di Afireari, ministurlu român Mircea Duşa lâ câftă a soţlor dit alti vâsâlii s-bagâ tu practico meatri susto ti împrustarea a sicuritatâl’ei tu Amarea Lai.
El dzâsi că lipseaşti asiguripsearea a prezenţâl’ei pi amari a NATO tu bazinlu maritim. Mircea Duşa: Dzâşi că strategia maritimâ şi maxus strategia pi Amarea Lai, ti noi, easti di mari simasii. Tu idyul chiro, zburâi ş-ti aţea că putearea di luati a curagilui al NATO nu lipseaşti s-hibâ maşi ti unâ zonâ, lipseaşti s-mutreascâ afirearea a tutulor – şi flancul estic, ş-aţel sudic.
Nâinti, la Sevilla, tu Spanii, ministurlu di Externi, Bogdan Aurescu, luă parti la Conferinţa 2015 Multinational Ballistic Missili Defence, andreaptâ di Agenţia SUA ti Afireari Contra a Rachetilor Balistiţi. Cu aestâ furn’ii, caplu ali diplomaţii di Bucureşti dzâsi, nica unâ oarâ, că sistemlu american antirachetâ di la Deveselu, bazâ dit Sudlu ali Românii cari va s-ahurheascâ s-imnâ pânâ tu inşita a aluştui an, easti defensiv.
S-mutreaşti împrustarea a afirearâl’ei colectivâ, deadun, lucru di timel’iu ali NATO. Hiindalui t-unâ vizitâ Bucureşti, adjunctul a secretarului american di stat, Frank Rose, hâbârisi şi el că SUA, NATO şi România s-achicâsescu tora ta s-şi l’ia asiguripseri că baza di Deveselu easti ghini afiritâ di tuti piriculli, maxus di aţeali di turlii teroristâ.
Hapsi CIA tu Românii? Unâ nauâ comisii
Comisia di Afireari a Senatlui di Bucureşti câftă, Luni, a cumândisearâl’ei a aluştui for adrarea a unâl’ei nauâ comisii parlamentarâ mutrinda nâscânti hapsi CIA ţi pot s-hibâ tu Românii.
Tu idyul chiro, a Biroului Permanentu îi si dzâsi s-caftâ ofiţial scutearea la lun’inâ a documentilor ţi mutrescu vâsâlia noastrâ, documenti dit raportul a Senatlui SUA mutrinda turlii di interogări ali CIA. Aestâ câftari vini dupu andamusea pi cari senatorl’ii u avurâ cu membrii dit Comisia a Libertatâl’ei Civilâ, ali Giustiţii şi a Afacerilor Interni dit Parlamentul European, for cari investigheadzâ năili informaţii ţi bagâ România pi lista a vâsâliilor ti cari s-minduiaşti că avurâ hapsi CIA.
Unâ comisii idyea imnă tu Senat întrâ an’ii 2006-2008, ama cari nu află niţi un lucru cari s-scoatâ tu miydani prezenţa a aluştor turlii di hapsi tu Romania iu s-dzâţi că furâ ţânuţ suspecţâ di terorismu.
Cazlu Volkswagen tu Românii
Vâsâlia noastâ caftâ s-lu pitreascâ tu giudicatâ întreg gruplu Volkswagen, ta s-şi l’ia nâpoi chirerli dit vindearea cama di 100 di n’ii di amaxi ti cari sâ ştii că au emisii cama mări andicra di aţeali declarati ş-apruchiati.
Ministurlu a Mediului, Graţiela Gavrilescu, dzâsi că easti zborlu di cama di 30 di milioani di euro, hiindalor contravaloarea a unui timbru di mediu cama n’ic.
La adunarea a ghiderilor s-ţânu contu şi că taxa auto fu pâltitâ di tuţ aţei cari ancupârarâ amaxi – ti motorizari Euro 5, chiola amaxea eara dealihea dit categoria Euro 4. Proprietarii di bunâ-pisti cari şi-ancupârarâ unâ ahtari amaxi nu va s-aibâ problemi, deadi asiguripseri ministurlu Graţiela Gavrilescu.
