Eveniment Top – 08.11.2014

Premierlu soţial-democrat Victor Ponta şi primarlu a câsâbălui Sibiu, liberalu Klaus Iohannis, s-andamusescu tu doilu tur a alidzerilor prezidenţiali.

România Internațional, 07.11.2014, 11:44

Premierlu soţial-democrat Victor Ponta şi primarlu a câsâbălui Sibiu, liberalu Klaus Iohannis, s-andamusescu tu doilu tur a alidzerilor prezidenţiali.

Candidatlu a suţatâl’ei PSD-UNPR-PC, premierlu Victor Ponta, şi reprezentantul a Suţatâl’ei Criştin Liberalâ (opozitia di ţentru-dreapta), primarlu a câsâbălui Sibiu, Klaus Iohannis, va s-alumtâ, pi 16 di Brumar, tu doilu tur a alidzerilor ti prezidenţil’ia ali vâsâlii.

Tu protlu tur, aeşţâ dit soni agiunsirâ pi protili locuri tu ţi mutreaşti alidzerli a român’ilor, cari aleapsirâ dintrâ 14 candidaţ. Victor Ponta luă 40,44% dit voturi, iara Klaus Iohannis 30,37%, tu sinfuniili tu cari prezenţa la vot fu di 53,17%. Tu ţi mutreaşti doilu tur, Victor Ponta s-hârseaşti di andruparea a îndoi candidaţ ţi inşirâ dit competiţii, icâ a aţilui di ma ninti premier liberal, Călin Popescu Tăriceanu, şi a doi piloni a curentului populistu, Corneliu Vadim Tudor şi Dan Diaconescu. Tu idyul chiro, Victor Ponta aşteaptâ şi andruparea a aţilui di ma ninti director a Serviciului Român di Informaţii Externi, Teodor Meleşcanu.

Di alantâ parti, Klaus Iohannis va s-hibâ andrupât di candidatlu independentu Monica Macovei, ţentru-dreapta, ma ninti ministru ti Giustiţii. UDMR (tora la co-guvernari) ş-câlisi oamin’ii, ca tu doilu tur, s-aleagâ aşi cum minduiaşti cathi un.

Baia român’i di tru xeani inşirâ s-voteadzâ tu protlu tur

Tu diaspora, român’ii înşirâ la vot tu numir multu mari. Cama di 161.000 di român’i di nafoara ali vâsâlii — un numir recordu – votarâ tu protlu tur a alidzerilor prezidenţiali, tu aţeali 294 di secţii dicl’isi tru xeani.

Tu nâscânti di eali, proţeslu di vot fu aspartu di anvirinarea a oamin’ilor cari şidzurâ sâhâţ întregz s-aşteaptâ, iara tu nâscânţâ câsâbadz chiola ei nu amintarâ s-şi-aspunâ votlu. Suti di oamin’I şidzurâ la ahtări codzâ, tu ma multi capitali europeani. Ta s-nu treacâ iara idyea catandisi, pi 16 di Brumar, Ministerlu Român di Externi şi Biroulu Electoral Ţentral apufusirâ un stog di meatri cari s-lişureadzâ proţeslu di votari.

Aşi, român’ii di tru xeani va s-poatâ s-ascoatâ di pi site-urli bec.ro şi mae.ro, formularlu mutrinda declaraţia pi propria borgi, formular ţi lipseaşti ta s-poatâ s-voteadzâ tu doilu tur a alidzerilor prezidenţiali.

Aestu dit soni poati s-hibâ completat di titular nâinti s-intrâ la vot, ama simnarea şi triţearea a datâl’ei va s-adarâ maşi dinâintea a membrilor dit secţia di votari. Ma multu, va s-hibâ andreapti cama multi cabini di vot tru secţii.

Comisarlu European ti Politiţ Regionali, Corina Creţu vini Bucureşti ti ahurhita a Acordului di Parteneriat cu România.

Bucureşti fu lansat Acordul di Parteneriat întrâ România şi Comisia Europeanâ. Actul aspuni di turlia cum va s-hibâ ufilisiţ pâradzl’ii europen’i, structurali şi di investiţii, tu yinitorl’ii an’i şi fu lansat dinâintea a Comisarlui European ti Politicâ Regionalâ, românca Corina Creţu.

Documentul fu minduit şi pâzâripsit deadun cu experţâl’ii europen’i – pi un chiro di aproapea un an. Executivlu uuropean adoptă, tu meslu Augustu, Acordul cu România, cari fu aţea de-al XI-a vâsâlii membrâ ali Uniuni Europeanâ a curi îi fu apruchiat aestu documentu.

Tu chirolu 2014 – 2020, România ari hâiri di pâradz europen’i di aproapea 43 di miliardi di euro, dit cari vârâ 22 di miliardi suntu fonduri di coeziuni. Pâradzl’ii lipseaşti s-hibâ ufilisiţ ti proiecti mutrinda infrastructura, sânâtatea, educaţia, împrustarea a comunităţlor locali şi adrarea di năi locuri di lucru.

Banca Naţionalâ ali Românii scâdzu prognoza mutrinda rata a inflaţil’ei ti bitisita a anlui 2014.

Banca Naţionalâ ali Românii scâdzu prognoza ţi mutreaşti inflaţia, tu inşita aluştui an, di la 2,2 la 1,5%. Guvernatorlu BNR, Mugur Isărescu, dzâsi că aestâ catandisi easti prota, ti furn’ia a scâdearâl’ei ali cotaţii a petrolui, a stabilitatâl’ei a pâhălui la gazi naturali, a unâl’ei recoltâ bunâ tu România, ama şi a criştearâl’ei a importurilor dit vâsâliili ţi nu mai au ligâturi di turlii comercialâ cu Arusia.

Tu minduita a caplui a Bancâl’ei Ţentralâ, stabilizarea a inflaţil’ei aştiptatâ ti anlu ţi yini, poati s-da cali la sinfunii cari s-agiutâ la criştearea icunumicâ pi chiro lungu. Pi di altâ parti, BNR n’icşură iara dobânda di politicâ monetarâ, cu 0,25 di puncti proţentuali, la 2,75% pi an, ama şi ratili a rezervilor minimi ti pasivili tu valutâ, di la 16 la 14%.

Tu idyul chiro, previziun’ili di toamnâ ali Comisii Europeanâ aspun că România inşi dit recesiuni, avânda unâ crişteari di 1% a PIB tu treilu trimestru, andicra di doilu, dupu dauâ scâderi unâ dupu alantâ. Uidisit cu prognoza, România va s-aibţ unâ crişteari icunumicâ di 2% tu anlu 2014, tu scâdeari ama andicra di prota estimari, di 2,5%.

Consumlu privat şi exporturili furâ protili motoari ţi agiutarâ criştearea, ama pi di altâ parti, investiţiili nu agiutarâ ici.

Maşi unâ dit echipili româneşţâ di fotbal ţi agiunsirâ tu Liga Europa mai ari şansi s-treacâ ma largu.

Campioana ali Românii la fotbal, Steaua Bucureşti, bitisi, tu deplasari, cu scorlu di 2-2, cu echipa portughezâ Rio Ave, tu un meci dit grupa J a Ligâl’ei Europa.

Cu 7 puncti, stelişţâl’ii suntu pi doilu loc tu grupâ, dupu ucrainenn’ii di la Dinamo Kiev, cari amintarâ mecilu cu echipa danezâ Aalborg, cu 2-0.

Tu grupa D, viţecampioana ali Românii, Astra, dit Giurgiu, bitisi isa, 1-1, pi terenlu a ei, gioclu cu ghinicânâscuta echipâ scoţianâ Celtic Glasgow şi nu mai ari ici şansi s-ducâ ma largu tu primvearea europeanâ. Dit grupa ali Astra ama, treaţi ma largu Red Bull Salzburg dit Austria, ţi amintă mecilu cu Dinamo Zagreb (Croatia).

Armânipsearea: Cristina Mina

Ascultaţ aoa –>