Eveniment Top – 06.09.2014
Bucureştiul apruchie aeroplanili di alumtâ ali NATO pi teritoriul ali Românii
România Internațional, 05.09.2014, 12:40
Bucureştiul apruchie aeroplanili di alumtâ ali NATO pi teritoriul ali Românii
România deadi cali a aeroplanilor di alimtâ ali NATO pi teritoriul a ei. Hâbarea vini N’iercuri di la caplu ali vâsâlii, Traian Băsescu, dupu unâ andamusi a Consiliului Suprem di Afireari ali Vâsâlii, ţi luă aestâ apofasi dupu ţi catandisea dit Ucraina viţinâ s-adră cama lai.
Ayoriea di aeroplanili di alumtâ, pi teritoriul ali vâsâlii va s-poatâ s-dânâseascâ 200 di militari, piloţ, mecani şi oamin’I cari s-andreagâ aparatili.
Vizita a premierlui roman, Victor Ponta, tu China
Protlu – ministru roman, Victor Ponta, adră unâ vizitâ ofiţialâ tu China, dupu ţi fu câlisit di omologlu a lui di Beijing, Li Keqiang, dupu ţi ş-el vini Bucureşti, tu meslu Brumar, 2013, cându fu andreaptâ aoa Andamusea China .- Evropa Ţentralâ şi di Estu.
Doil’ii ofiţiali s-aspusirâ hârsiţ di ligâturli di turlii politicâ di dauli părţâ şi apufusirâ împrustarea a alâxerilor icunumiţi, prit proiecti deadun tu domenii cum suntu agricultura, energia icâ infrastructura. Tu minduita al Ponta, di mari simasii suntu patru proiecti di investiţii tu domenea energeticâ: Grupurili 3 şi 4 di la Ţentrala Nuclearâ Cernavodă, Tarniţa, Rovinari şi Complexul Energetic Hunedoara. Aesti dit soni proiecti, ţi asiguripsescu independenţa energeticâ ali Românii şi putearea a ei ta s-exportâ energii tu vâsâliili dit regiuni, ca Republica Moldova, suntu di turlii strategicâ.
Caplu a Guvernului di Bucureşti s-dusi şi la unâ andamusi icunumicâ, iu vinirâ reprezentanţâl’ii a protilor companii şi instituţii bancari chinezi ţi au icâ vor s-adarâ afaţeri tu Românii. Premierlu român fu aştiptat aclo di caplu a statlui, Xi Jinping, iu analtul demnitar chinez zburâ andicra di poziţia constantâ ali Românii tu aeşţâ dit soni 65 di an’i di ligâturi diplomatiţi mutrinda dauli vâsâlii.
Tu anlu 2014, România alină 17 poziţii tu clasamentul mondial mutrinda competitivitatea di turlii icunumicâ
România fu pi loclu 59 tu lumi la competitivitatea icunumicâ, tu un clasamentu adrat cathi an di Forumlu Icunumic Mondial. Andicra di anlu ţi tricu, România alină 17 poziţii. Tu toplu regional, România easti dupu vâsâlii ca Turchia şi Vâryâria, ama nâintea ali Ungarii icâ Croaţii.
Pi protili locuri s-află Elveţia, Singapore şi SUA. Raportul ali Competitivitati Globalâ 2014 – 2015 fu adrat pi timel’iu a opiniilor aspusi di 15 n’ii di directori di companii dit cama di 140 di vâsâlii.
Pi di altâ parti, uidisit cu Institutlu National di Statisticâ, industria agiută nai ma multu la criştearea ali icunumii româneascâ tu proţl’ii şasi meşi estan, iara agricultura şi construcţiili nu agiutarâ ici.
Audierea a candidatâl’ei ali Românii ti loclu di comisar european la Bruxelles
Candidata ali Români ti un postu di comisar european, eurodeputata soţial-democratâ, Corina Creţu, fu audiată, Gioi, Bruxelles, di yinitorlu prezidentu ali CE, Jean Claude Juncker.
Purtâtoarea di cuvendâ ali Comisii hâbârisi ca tu yinitoarea CE va s-hibâ nauâ mul’ieri, dit intreglu di 28, numirlu minimum stabilit ca naua echipâ al Juncker s-l’ia votlu tu Legislativlu comunitar. Yinitorlu cap a executivlui european va s-aspunâ, dzâlili ţi yin, naua struturâ ali Comisii, dupu audierea a tutulor candidaţlor pripuşi, di vâsâliili membri, ti ipotisili di comisari.
Naţionala ali Românii di fotbal gioacâ cu Gârţia tu protlu meci dit preliminariili Euro 2016
Naţionala di fotbal ali Românii va s-gioacâ Duminicâ, Pireu, tu Gârţii, contra a echipâl’ei dit aestâ vâsâlii, gazdâ tu preliminariili a Campionatlui European dit 2016.
Dauli echipi s-andamusirâ şi tu toamna a anlui ţi tricu, cându, dupu ţi amintâ acasâ şi adră egal Bucureşti, Gârţia dusi ma largu tu Cupa Mondialâ dit Brazilia.
Dit grupa preliminarâ ti Euro mai adarâ parti Ungaria, Finlanda, Irlanda di Nordu şi Insulii Feroe. Dit cathi grupâ trec ma largu protili dauâ echipi, ama şi nai ma buna formaţi di pi treilu loc dit aţeali 9 grupi, alanti 8 echipi di pi trei lipsinda s-gioacâ la baraj. Aţea dit soni oarâ cându România dusi la un turneu final, fu la Euro 2008.
Armânipsearea: Cristina Mina
Ascultaţ aoa –>
