Eveniment Top – 02.08.2014

România Internațional, 01.08.2014, 13:17

Apili aputrusirâ Sudlu şi Sud-Vestul ali Românii

Aproapea tutâ stâmâna, Sudlu şi Sud-Vestul ali Românii furâ sum coduri aroş, portocaliu icâ galbin di ploi. Tu nâscânti hori, aesti coduri furâ ş-ti api ş-chiameti. Apili luarâ şi oamin’i şi multi lucri dit curţâli a horilor. Cama di dauâ n’ii di casi dit aproapea dauâ suti di câsâbadz şi n’ii di hectari di teren furâ inundati, iara cama di unâ n’ii di oamin’i fudzirâ di aclo. Apili asparsirâ ma multi căl’uri naţionali, giudeţeni şi comunali. Baia câsâbadz armasirâ fârâ curentu electric, dupu ţi ma mulţâ stâlchi di analtâ tensiuni câdzurâ ti furn’iea a vintului.

Suti di pompieri, jandarmi şi poliţişţâ agiutarâ la ascâparea a oamin’ilor ţi earau ti piricul. Autorităţli ţentrali şi locali furâ ş-eali sum alertâ şi s-adunarâ ta s-îl’i agiutâ pi mâraţl’ii sinistraţ. Furâ pitricuti aclo mâcări, apâ, pături ti anvâleari etc, iara Guvernul agiută cu pâradz ta s-n’icşureadzâ ghiderli adrati di api.

Prota alâxeari bugetarâ dit 2014

Guvernul ali Românii apruchie, Gioi, prota alâxeari bugetarâ, unâ bunâ, dit estan. Nai ma mulţâl’ii pâradz va îl’i ia Ministerili ti Sânâtati, Educaţii, Afireari, Transporturi, Lucru şi Icunumii. Şi Ministerlu a Mediului va s-li’a îndoi pâradz, ama maşi ti lucrări di andridzeari a câsâbadzlor mutrinda afirearea di inundaţii.

Di ma mulţâ pâradz va s-hârseascâ şi Autoritatea Electoralâ Permanentâ ti andridzearea a alidzerilor prezidenţiali dit Brumar. Tu minduita a Consiliului Fiscal, prit aestâ apofasi, Executivlu arucâ greulu pi bugetili a an’ilor ţi yin, câ ţe pistipseaşti, nu para ghini, că va s-yinâ ma mulţâ pâradz ţi pânâ tu inşita aluştui an. Aestu dit soni Consiliu dzâţi că alâxearea bugetarâ nu mutreaşti impactul a scâdearâl’ei a pâradzlor daţ ti asiguripserli soţiali cu 5% ti angajator, meatrâ pi cari Guvernul caftâ s-u bagâ tu practico di la 1 di Sumedru.

Omlu ţi cumândiseaşti PSD, premierlu Victor Ponta, şi-aspusi ofiţial candidatura la alidzerli ti prezidentu dit Brumar

Premierlu român, soţial-democratlu Victor Ponta şi-hâbârisi ofiţial candidatura ti alidzerli prezidenţiali dit Brumar. Tu zboarâli a lui electorali, Ponta câftă s-aspunâ că el mutreaşti unâ mari alâxeari, dupu dzăţ di an’i di catandisi greali, di conflictu, pi sţena politicâ româneascâ, icâ unâ nauâ turlii di prezidentu, bun ti dun’ieau, ti societati.

El vru s-pitreacâ şi un zbor di politicâ externâ şi adusi aminti di România, ca un bun soţ ali SUA şi Ghermânia, ama şi di România — vâsâlii ca bun exemplu ti viţin’ii a ei -.Moldova, Sârbia şi Ucraina. Pânâ tora şi-mai aspusirâ candidaturli Klaus Iohannis, caplu a protlui partid di opoziţii, PNL (ţentru-dreapta), vidzut ca ş-ca protlu contracandidat al Ponta, liderlu UDMR (la co-guvernari), Kelemen Hunor, şi aţel di ma ninti ministru di Externi şi Giustiţii, Cristian Diaconescu, di partea PMP.

Reacţia a Bucureştiului la protestili a român’ilor di Cernăuţi contra a frontului di polim dit Estul ali Ucrainâ

Ministerlu di Externi di Bucureşti şi-aspusi gailelu andicra di catandisea cari dusi la protestili a român’ilor dit regiunea Cernăuţi dit Ucraina, tu ţi mutreaşti proţeslu di andridzeari militarâ a tin’irilor ucrainen’i, ahurhit di autorităţli di Kiev.

Tu idyul chiro, MAI mutreaşti ghini aestu lucru ţi deadi cali la mări gaileadz ş-tu fumeili di român’i di aclo, ama şi la nivelu a opinâl’ei publicâ dit Românii. Şi tu Udălu a Deputaţior di Bucureşti, viţeprezidentul ali Comisei ti comunităţli di român’i dit tru xeani, Bogdan Diaconu, s-aspusi ponlu mutrinda autorităţli di Kiev, cari caftâ s-li’a tiniri român’i ta sâ l’îi pitreacâ tu prota linii a polimlui, şi nu ucrainien’I, aşi cum lipseaşti.

Aesti reacţii yin unâoarâ cu baia protesti a roman’ilor di aclo, ahurhiti dupu ţi suti di tini’ri avurâ dimândari ti încorporari. Oamin’ii dzâsirâ că va s-aputruseascâ iara căl’iurli anamisa di câsâbălu Cernăuţi, maca nu va s-li’a carti anyrâpsitâ că nu va s-hibâ zorlea pitricuţ s-alumtâ contra a pro-aruşilor dit Estul ali Ucrainâ.

Dacian Cioloş – pripus di România ti un nău mandat di comisar european ti agriculturâ icâ ti portofoliul di împrustari regionalâ

Guvernul ali Românii l-u pripusi pi Dacian Cioloş ti un nău mandat di comisar european ti agriculturâ. Aestâ pripuneari a Executivlui easti andrupâtâ ş-di prezidentul Traian Băsescu.

Tu ilichii di 45 di an’i, Dacian Cioloş easti comisarlu european ti agriculturâ şi împrustari regionalâ, dit Şcurtu 2010. El easti omlu ţi ahurhi alâxearea a Politicâl’ei Agricolâ Deadun. Tu Românii, Cioloş fu ministru a Agriculturâl’ei tu chirolu 2007 – 2008.

4 echipi româneşţâ di fotbal tu treilu tur a Ligâl’ei Europa şi a Ligâl’ei a Campion’ilor

Viţecampioana ali Romanii la fotbal, Astra, dit Giurgiu, amintă acasâ, cu scorlu di 3-0 mecilu cu echipa cehâ Slovan Liberec, tu prota manşâ a treilui tur a Ligâl’ei Europa. Tut cu cehi giucarâ şi aţei di la Petrolul dit Ploieşti, cari, tut acasâ, bitisirâ isa gioclu, scorlu 1-1, cu Viktoria Plzen.

Tu idyea Ligâ Europa, CFR dit Cluj, chiru cu 1-0, tu deplasari, dinâintea a echipâl’ei Dinamo Minsk, dit Belarus. N’iercuri, tu prota etapâ a treilui tur preliminar a Ligâl’ei a Campion’ilor, Steaua Bucureşti bitisi mecilu cu scorlu di 2-2, tu Kazahstan, cu FK Aktobe.

Giocurli retur, ti triţearea tu grupili aluştor dauâ mări competiţii, suntu aştiptati stâmâna ţi yini.

Armânipsearea: Cristina Mina