Dosarlu ali Revoluţiei dit 1989 – pusputeari penală lardzită
Corina Cristea, 03.11.2016, 12:10
Dupu aproapea 27 di ani di la cădearea a regimlui Ceauşescu, procurorl’i di la Secţia a Parchetilor Militare u lardzira pusputearea penală in rem tru “dosarlu ali Revoluţie” tra infracţiuni contra ali uminitati şi tra faptili ti s-featira după 22 di andreu 1989. Incidentili armate fapti tru ateali dzali tru un numir mari di localităţ spuni că s-feati lucarlu după un plan di nainti apufusitu, cari avea tru scupo priloarea a putearil’ei di cătra nail’i lideri şi legitimarea a aistor – sa spuni tru comunicatlu a Parchetlui, parastisitu di procurorlu Marian Lazăr: Dit actili a dosarlui iasi tru videala că, tra sa u tana tru mana putearea, prit acţiunile disvartiti şi meatrili apufusiti, naua cumanduseari politică şi militară instaurată după data di 22 di andreu 1989 dusi la vatamarea, pliguirea prit tufikiseari, vătămarea a integritatil’ei fizica şi psihica, respectiv ixikea di libirtati tra un numir mari di persoane, fapte cari s-aradapsescu la condiţiili di tipicitate a infracţiunil’ei contra ali uminitati.”
Faptili spun ca avea un plan după cari s-lucra. Aestu avea tru scupo ta s-agiunga la una catastisi di alathusi tru arada a forţilor armate, prit ampartarea a cumandusearil’ei di la Ministerlu ali Apărari Naţionala şi difuzarea a nascantor ordini, rapoarti şi informaţii false, scutearea pi geadei şi armatusearea a banatorlor, respectiv vrea tra s-agiunga la un polim tivil tru cari să s-ampuliseasca unităţ armatusiti di la Ministerlu ali Apărari Naţionala şi a Ministerlui di Interne ica a idyiului minister, cu scupolu tra sa u pril’ia putearea şi legitimarea a nailor lideri. Tra bagarea tru practico a aistui plan fu ufilisita Televiziunea Română cari dimanda comunicati lahtaroasi şi nascanti ori false, tăl’iarea a ligăturlor telefoniti şi s-aduca la cumandusearea a ministerilor di forţă a nascantor fosti cadri militare ti tin’isea naua cumanduseari politico-militara, cu consecinţa tra sa scoata tru migdani un polim psihologic şi mediatic cari dusi la vatamari, sa spuni tru comunicat.
Uidisitu cu un documentu a parchetlui militar di pi ningă Analta Curte di Casaţie şi Justiţie, cama di 1.200 di oamin’i murira tru evenimentele dit andreu 1989, 800 dit aeşta după 22 di andreu, dimec dupa cadearea a regimlui. Fura cama di 5.000 di pliguiţ şi alti ndaua n’il’i di insi fura privats paranom di libirtati şi tran’ipsit. Discl’idearea diznau a dosarlui ali Revoluţie – dosar cari dusi la condamnări dalga dupu dalga la CEDO tra România — s-fati dupu ndoi mesi di anda procurorlu general interimar, Bogdan Licu, cafta tra s-hiba discl’isa diznau ancheta. Uidisitu cu Bogdan Licu, ceareaia di clasari a dosarlui, tru sumedru 2015, fu niantimil’eată şi paranom, a deapoa ncadrarea juridică a faptilor s-feati cu alathusi.
Autor: Corina Cristea
Armanipsearea: Tascu Lala
