Dificitlu bugetar, tru menga ali Comisie Europeana

Comisia Europeană fati timbihi că România poati s-nreghistreadza tru aestu an nai cama mari creaştiri a deficitlui bugetar dit Uniunea Europeană, aca avu nai cama marea creaştiri economică dit Europa tru anlu ti tricu. Şefa a reprezentanţal’ei di la Comisia Europeana Bucureşti, Angela Cristea, spusi, cu furn’ia ca s-lansă raportul economic tra România, că documentul cundil’eadză un singir di paradoxuri ligati di evoluţia ali economie. Ia ti spusi Angela Cristea: “Di una parte, agiundzem pi isapea ca scădzu ftuhia tru România, ama criştearea a inegalităţlor sutiali, şi easti, minduescu, nai cama marea crişteari dit Uniunea Europeană a inegalităţlor di venituri tru România. Ş-videm că aestu nu easti un fenomen punctual, ca masi una tendinţă ti furn’ia că dit 2012 şi easti, dimi, una tendinţă cari nu easti spetifică masi ti România, ca u videm aesta si tru alti stati membre dit UE şi lugursim că yilipseasti efectili globali a crizal’ei ndilicata cu efectili a globalizaril’ei”.

Daniela Budu, 16.03.2017, 12:22

Executivlu comunitar lugurseasti că România va s-bitiseasca anlu cu un deficit di 3,6 tru sută dit PIB, nai cama marli dit Uniuni. Ministurlu di Finanţi, Viorel Ştefan, declara că România nregistra rezultati economiti buni şi adăvga ti gailipsearli ti li ari Comisia Europene ca aesti suntu mutriti cu ngatan di cătra Executiv. Ia ti spusi Viorel Ştefan: “România feati progrese tru atea ti mutreasti reformili structurali, maxus tru dumenea a guvernanţal’ei, a acataril’ei tru isapi forţa di lucru si n’icsurarea a ftuhiil’ei, tru dumenea a sănătatil’ei, ama şi tru dumenea ali administraţie publica.

Voi s-cundil’edzu că, ahurhindalui cu 2016, România easti acatata tru isapi tru categoria a statilor ti nu au dezechilibri macroeconomiti, deadun cu Austria, Belgia, Estonia, Ungaria şi Marea Britanie. Guvernul şi spusi ma multi ori arada angajamentul tra s-tana deficitlu bugetar tru limitili apufusiti di Pactul di Stabilitate şi Creaştiri şi ari tru minti misuri suplimentare di n’icsurari a hargilor, ma sa s-agiunga la alaxeri di la ţintili apufusiti tru protl’I sasi mesi”.

Viorel Ştefan adăvga că s-mutreasti eficientizarea şi fatearea ma cu hairi a acţiunilor di control, cu scupolu tra criştearea a ncasărlor la buget. Ligat di evoluţia yinitoare ali economie româneşti, economistul şef a Băncal’ei Naţionala ali Românie, Valentin Lazea lugurseasti că tra s-aiba una creaştiri potenţială a PIB aprucheata di 5% anual, dimi di nivelu ti easti ananghi tra recupeararea a decalajilor ti na fac ahoryea di statili dizvoltate ale UE, lipseasti s-cilastasim tra bagarea tru lucru nascantor reformi structurali tru dumenea ali educaţie şi a sănătatil’ei şi s-hiba loati meatri tra fatearea ma cu hairi condiţiili demografiti. Nica s-ma multu, easti ananghi di una creaştiri a gradlui di amintari a fondurlor europene şi di fateari cu hairi a investiţiilor publiti.

Autor: Daniela Budu

Armanipsearea: Tascu Lala