Dacia și Ford nâpoi ş-ahurhescu lucărlu
Corina Cristea, 04.05.2020, 18:25
Asociaţia Europeană a Producătorlor Auto avea faptâ isapi, tru bitisita-a meslui apriiur, că, pi nivelu european, meatrili ţi eara loati tru contextul a pandemiillei di coronavirus zňiipsescu cama di 1,1 miliuňi di lucrâtori ditu dumeni, a deapoa producţia kiru cama di 2 miliuňi di autovehiculi. Datili mutrindalui România spunea că easti zborlu ti naima pţânu 20 ňilli di locuri di lucru și di unâ producţie nirealizatâ cari s’aprukea di 69 di ňilli di aftukinati. “Producţia locală di autoturismi avea loatâ silâ tru meslu şcurtu 2020, cu unâ creştiri tru anu di aproapea 8% andicra di idyiul mesu a anlui ţi tricu, după un avansu di aproximativ 3% tu kirolu a anlui 2019”, aduţi aminti Elena Geageac, consultantu Diloitte România, cundillinda că aestu sector aduţi ti vindeari 37% ditu exporturli româneşti.
Naparti di ţifri, industria auto ditu România s’arâdâpseaşti cadealihea anamisa di nai cama zňiipsiti lumăki icunomiţi, atelli doi mări producători auto locali — Automobile Dacia și Ford România — ş’avea dânâsitâ lucărlu tru a daua giumitati a meslui marţu, unâ ş’unâ ţi s’avea apufusitâ catastisea di ananghi di itia a pandemiillei di COVID-19. Tru idyiul kiro, producătorlli di componente auto, ţi suntu tru ligâturi comerciale em cu atelli doi mări constructori aduşi aminti, em şi cu alțâlli di nafoara-a Româniillei, ș-ňicurarâ ili nica ș-u-ncllisirâ activitatea temporar. Ahurhearea, nica şi graduală, a producțiillei la Uzinili Dacia di la Mioveni și di cătră Ford tu căsăbălu Craiova, dauli tru notlu ali României, fu aștiptată cu niarâvdari și nâdie di lucrâtorlli a aţiloru dauâ companii, cari furâ pitricuţ tru șomaj tehnic.
Mioveni, Gruplu francez Renault apufusi ahurhearea diznău a lucărlui, ahurhinda ditu 21 di apriliu, tru dauă uzine, pi bază di voluntariatu, diitia ca ditu 4 di mai să s’toarnâ la lucru şi alanţâ lucrâtori. Tut ditu 4 di mai, constructorlu american Ford nâpoi ahurhi, etapizat, maşi tru un golu schimbu, producția ditu România, simultan cu atea ţi u ari tru Germania și Spania. Giumitati dit aţelli aproapea 6 ňilli di lucrâtori s-turnarâ a huzmeti, tru condiții di protecție cama mari, idyea cum atelli di Mioveni, dimecu. Tu kirolu a perioadâllei tru cari activitatea di producţie fu dânâsitâ furâ spusi şi bâgati tru practico meatri trâ vigllearea-a lucrâtorloru tru perspectiva turnarillei a aiştoru la huzmeti.
Easti zborlu ti meatri cari ţânu di igienizari şi securitati, bâgati tu practico riguros, lucrâtorlli hiinda hâbâisiţ ti ananghea câ lipseaşti s’tiňiseascâ apofasili loati ti vigllearea-a sănătatillei a lor şi a soţloru. Ditu arada a meatrilor s’arâdâpsescu instalarea-a hâlăţloru di scanari a temperaturâllei la cathi poartâ di intrari, purtarea-a măștilor di protecție, ama și ţânearea distanțâllei faptâ urminiii andicra di atelli di anvârliga. A lucrâtorloru lâ si asiguripseaşti acceslu la materiali di nâscârseari uidisiti, hiinda fapti, tutu aşi, cilâstâseri acşi câ urdinarea anamisa di casâ și loclu di lucru să s’dizvârteascâ tru condiții di sigurlâki.
Ngrăpsearea: Corina Cristea
Armânipsearea: Taşcu Lala
