Cumu poati s’llia silă diznău vaccinarea ?
Isapea di cathi dzuuă, tru România, a infectărlor cu SARS-CoV-2 armăni ma largu tu scara a aţiloru ditu soni ndauă stămâñi, dimi scădzu. Numirlu a persoanilor diagnosticati cu Covid-19 easti di ordinlu a dzăţloru pi livelu naţionalu. Di altă parti, tru aproapea giumitati ditu giudeţili a văsiliillei nu mata s’nregistră niţi un caz, aşi că rata generală di pozitivari easti, ma largu, subunitară – aproapea 0,3%. Spitalili numata suntu loati cu asaltu, secțiile di tearapie intensivă numata lucreadză sumu zorea a dalgăllei mari di paciență, a deapoa isapea a morţăloru easti multu ñică.
Roxana Vasile, 13.07.2021, 21:05
Nica și ași, specialiști și autorităț s’asparu di varianta Delta a coronaviruslui, cari poati s’agiungă dominantă și să s’arăspândească iruşi, iuţido tru lumi. Să zburaşti cabaia, dimecu, ti patra dalgă pandemiillei cari nu va u alasă nanăparti ti di toamnă, niţi România. Emu, uidisitu cu apufusitorlli, goala turlie di ncuntrari a zñiiloru uruti a aiştei nauă dalgă easti vaccinarea a unui numiru cât cama mari di persoani. Nota bene! Tru condițiile tru cari campania națională nu scoati ici ţiva mbuveti.
Cu minduita ta să’lli da silă, coordonatorlu a aiştei, yeaturlu militar Valeriu Gheorghiță, ahurhi unu şingiru di muabeţ cu specialişti pi temi ligati di simasia ţi u ari vaccinarea. Prota muabeti fu cercetătorlu științific tru imunologie și vaccinologie di la Institutlu Cantacuzino di București, Cătălin Ţucureanu, cari spuni că nai cama buna strateghie tră s’ñicureadză urdinarea-a viruslui easti vaccinarea cu schemă completă.
Cătălin Ţucureanu: Importantu easti câtu mari easti aestă rată di vaccinare tră s’aprăftăseşţă s’u ai tu mengă cadealihea epidemia, di itia că, ma s’mutrimu la Marea Britanie, maxusu la populaţia nivaccinată, ama şi la populaţia vaccinată maş cu ună doză, videm ună arăspândeari importantă a lumakillei Delta. Dimi agiumsiră s’năstreacă unu cirecu ditu cazurli ţi li nregistra tru yinaru, tru dalga di ma ninti cu lumakea Alfa. Tru Africa di Sud, ună văsilie cari ari ună anvăleari vaccinală iuva la 5-7%, Delta yini cu ună nauă dalgă di infecţii.”
România ari, tru aestu kiro, un cirecu ditu populație vaccinată anti-Covid-19, a deapoa nai cama multi persoani feaţiră schema completă. Până la aproapea 70%, cât ş-avea pripusă autoritățli, ari, ama, cali lungă! Ti aţea, tra s’căndăsească câtu cama multă lumi, suntu ndreapti, dimi, ţentri tru locări inediti. Aşi, tu 17 di alunaru, un ţentru di turlia drive-through va s’hibă dişcllisu la ună anălţimi di 2.145 di metri, pi ună ditu nai ma spectaculoasi călliuri ditu România – Transalpina – ditu Carpațlli Meridionali. Protili 50 di persoani cari va s’facă vaccinlu tru aestu ţentru va s’amintă şi bileti la conţerti.
Autoru: Roxana Vasile
Armânipsearea: Taşcu Lala
